Yausuas 5:1-8
Nqe cim:
“Cov txivneej uas muaj hnubnyoog ua taus tubrog uas los nram tebchaws Iziv los tuag tas lawm, rau qhov lawv tsis mloog tus TSWV lus. Tej ntawd yog muaj raws li tus TSWV tau coglus tseg hais tias, yuav tsis pub lawv mus pom lub tebchaws av rog thiab zoo qoob uas nws tau coglus tseg rau lawv cov yawgkoob lawm” (Yausuas 5:6)
Lus nug xav:
– Vim li cas Vajtswv kom Yausuas ua kevcai txiav rau Nws haivneeg?
– Txoj kev rau txim rau cov uas tsis ua kevcai txiav yog dabtsi?
– Timthawj Paulus qhia txog “Kevcai txiav sab ntsujplig” zoo li cas?
Thaum cov vajntxwv Amaules thiab cov Kana-as tabtom ntshai txog tej txujci uas Vajtswv tau ua rau cov Yixalayees hla dhau tus Dej Yauladees, ces thaum ntawd Vajtswv kuj hais kom Yausuas npaj ua kevcai txiav rau Nws haivneeg. Thaum no yog lub sijhawm uas tsis ntshai vim thaum cov Yixalayees ua kevcai txiav tabtom mob, ces lwm haivneeg cov vajntxwv los kuj tabtom txhawj ntshai tsis kam ntaus Vajtswv haivneeg. Vim cov txiv neej uas twb ua kev cai txiav nram tebchaws Iziv twb tuag tas rau tom tiaj suabpuam lawm vim lawv tsis mloog Vajtswv lus lawv thiaj tsis pom lub tebchaws uas Vajtswv cog lus muaj mis thiab zib ntab. Lub sijhawm no, Vajtswv tsa lawv cov menyuam xeeb ntxwv sawv dua. Lawv cov no yuav tau ua kevcai txiav raws li Vajtswv txoj kevcai lawv thiaj tau txais Vajtswv tej lus cog tseg.
Txhua tus txiv neej Yixalayees yuav tsum ua kevcai txiav thaum tau yim hnub lawm kom lawv thiaj tau txais Vajtswv tej lus cog tseg rau Anplahas lawm. Hauv txoj kev coglus ntawd, Vajtswv yuav pub rau Anplahas tau ib thaj av los ua nws tug (Chivkeeb 17:8), thiab ua rau nws dhau los ua yawgkoob rau txhua haivneeg (Chivkeeb 17:5). Nws cov xeebntxwv yuav coob npaum li cov hnub qub saum nruab ntug, npaum li cov suabzeb nraum ntug hiavtxwv thiab los ntawm Anplahas cajces txhua haivneeg hauv ntiajteb no yuav tau txais koob hmoov (Chivkeeb 22:17-18). Cov txiv neej Yixalayees uas tsis ua kevcai txiav yuav raug cais tawm ntawm Vajtswv haivneeg thiab raug suav hais tias yog cov uas tsis mloog lus thiab rhuav Vajtswv tej lus cog tseg (Chivkeeb 17:14).
Timthawj Paulus qhia hais tias ua kevcai txiav yog yam uas cheemtsum, tiamsis tsuas yog lub cim sab nraum cia qhia hais tias nws yog tus tabtom nyob hauv Vajtswv kev cog lus tseg, cais mus ib cag rau Nws, ntseeg ruaj rau Vajtswv tej lus cog tseg thiab mloog Nws lus. Cov Yixalyees uas twb ua kevcai txiav ua ntej ntawd lawd twb tau Mauxes muab lawv ua kevcai raus dej rau hauv cov tauv huab thiab hauv dej hiavtxwv, tiamsis lawv tsis ua neej haum Vajtswv siab, lawv thiaj tuag tas rau tom tiaj suabpuam (1 Kauleethaus 10:1-2). Paulus muab txoj kevcai txiav kom tau ua Vajtswv haivneeg nyob hauv txoj kev coglus piv rau txoj kevcai raus dej kom tau ua Vajtswv haivneeg hauv Pawg ntseeg. Txawm cov Yixalayees no twb tau txais lub cim sab nraum ntawm txoj kev coglus los sab hauv lawv lub siab yeej tsis muaj kev hloov pauv “lub siab uas pheej yuam nej lub cev mus ua txhaum” (Kaulauxais 2:11), lawv thiaj tsis tau yam koob hmoov uas tsimnyog lawv tau, ntawd yog lub tebchaws uas Vajtswv coglus. Peb coob leej twb ua kevcai raus dej, muaj npe yog tus ntseeg tiamsis yeej tsis tso lub neej nqaij tawv, tsis mloog Vajtswv lus, tsis ua raws Vaj Ntsujplig qhia, ces peb yeej yuav ua plam tej koob hmoov uas Vajtswv pub rau peb lawm.
Thov Vajtswv,
Tus Tswv, thov pab kom nyuam yaus ua tau ib tug ntseeg tiag tiag. Thov qhia nyuam yaus kom mloog thiab ua raws li Vaj Ntsujplig tej lus qhia, kom nyuam yaus tau txais tej koob hmoov uas Koj tau cog lus tseg lawm. Nyuam yaus tuav Tswv Yexus Khetos lub npe thov Amees.
Peb pom muaj yam dabtsi hloov tom qab uas ua kevcai raus dej lawm?
Nyeem Vajluskub hauv peb lub xyoo: Malakaus 6
Kênh Youtube BHKTHN:
