Klei Aê Diê Blŭ: Y-Yôsuê 5:1-8
Êlan kliăng: “Kyuadah phung ƀuôn sang Israel êbat leh pă pluh thŭn hlăm kdrăn tač, tơl jih jang phung êkei bi blah kbiă leh mơ̆ng čar Êjip djiê kyua diñu amâo gưt asăp Yêhôwa ôh. Yêhôwa kat asei leh kơ diñu amâo srăng brei diñu ƀuh ôh čar gơ̆ kat asei leh kơ phung aê diñu đưm čiăng brei kơ drei, čar mâo êa ksâo leh anăn êa hnuê êbeh dlai.” (Y-Yôsuê 5:6)
Klei êmuh ksiêm mĭn: Ya ngă Aê Diê mtă kơ Y-Yôsuê ngă klei khăt klĭt kơ phung ƀuôn sang Aê Diê? Si klei bi kmhal kơ hlei pô hlăm phung ƀuôn sang Aê Diê amâo tŭ klei khăt klĭt? Si Khua ƀĭng kna Y-Pôl mtô kơ “Klei khăt klĭt hlăm mngăt”?
Tơdah jih phung mtao phung Amôrit leh anăn jih phung mtao phung Kanaan dôk huĭ hyưt kyua klei myang găn êa krông Yurdan Aê Diê ngă leh kơ phung ƀuôn sang Israel snăn Aê Diê lŏ mtă kơ Y-Yôsuê mprăp ngă klei khăt klĭt kơ phung ƀuôn sang Aê Diê. Anei jing wưng djŏ guôp kyua hlăk êjai phung ƀuôn sang Aê Diê dôk ruă knap khăt klĭt, snăn phung mtao ti êngao dôk rŭng răng, huĭ hyưt kyua anăn amâo jhŏng ksŭng ngă ôh. Kyua phung êkei tŭ leh klei khăt klĭt hlăk dôk ti Êjip djiê leh jih hlăm kdrăn tač kyua amâo gưt asăp Aê Diê kyua anăn diñu amâo ƀuh ôh krĭng mâo êa ksâo leh anăn êa hnuê êbeh dlai Aê Diê ƀuăn brei. Ară anei, Aê Diê mtă brei ngă klei anăn kơ anak čô diñu. Phung anei brei dưi khăt hlue si klei čuăn mơ̆ng klei bhiăn čiăng dưi dưn klei ƀuăn Aê Diê.
Grăp čô phung êkei Yuđa brei tŭ klei khăt klĭt hlăk spăn hruê leh amĭ kkiêng čiăng dưi dôk ti gŭ klei bi mguôp hŏng Aê Diê mkŏ mjing leh hŏng Y-Abraham. Hlăm klei bi mguôp anăn, Aê Diê ƀuăn brei kơ djuê ana ñu dưi kriê dlăng lăn (Klei Mphŭn Dơ̆ng 17:8), mjing ñu jing ama kơ lu phung găp djuê mnuih (Klei Mphŭn Dơ̆ng 17:5). Djuê ana ñu srăng lar msĕ si mtŭ hlăm adiê leh anăn msĕ si čuah ti hang êa ksĭ leh anăn jih jang phung găp djuê hlăm lăn ala srăng mâo klei jăk jĭn kyua phung anak čô ñu (Klei Mphŭn Dơ̆ng 22:17-18). Grăp čô êkei Yuđa amâo mâo klei khăt klĭt hlăm asei mlei ñu ôh arăng srăng bi luč hĕ ñu mơ̆ng phung ƀuôn sang Aê Diê, dlăng jing ñu gao leh klei kâo bi mguôp Aê Diê (Klei Mphŭn Dơ̆ng 17:14).
Khua ƀĭng kna Y-Pôl mtô klei khăt klĭt jing čiăng êdi, ƀiădah knŏng jing klei bi knăl ti êngao đuč čiăng lač kơ sa čô mnuih dôk ti gŭ klei bi mguôp hŏng Aê Diê, dưi pioh hjăn kơ Ñu, đăo knang hlăm klei Aê Diê ƀuăn leh anăn srăng gưt asăp Ñu. Phung ƀuôn sang Israel mâo leh klei khăt klĭt êlâo anăn, tŭ klei Y-Môis ngă ƀaptem hlăm biut knam leh anăn hlăm êa ksĭ, ƀiădah amâo bi mơak kơ Aê Diê ôh kyua anăn djiê leh hlăm kdrăn tač (I Kôrantô 10:1-2). Ñu bi hmô klei khăt klĭt čiăng dưi jing ƀuôn sang bi mguôp Aê Diê hŏng klei ƀaptem čiăng dưi jing phung ƀuôn sang Aê Diê hlăm Phung Sang Aê Diê. Wăt tơdah phung Yuđa anei mâo mă leh klei bi knăl ti êngao mơ̆ng klei bi mguôp ƀiădah amâo mâo klei bi mlih hlăm lam hlăm klei hdĭp ôh, amâo “lui klei kđeh tluh” (Kôlôs 2:11), amâo gưt asăp Aê Diê kyua anăn amâo mâo klei pap năng djŏ diñu srăng mâo, anăn jing krĭng Aê Diê ƀuăn brei. Lu mnuih hlăm phung drei ăt tŭ leh ƀaptem, mâo anăn pia phung đăo kơ Krist, ƀiădah tơdah amâo “lui klei kđeh tluh”, amâo gưt asăp Aê Diê, amâo gưt kơ Yang Mngăt Jăk, snăn drei ăt srăng bi luč klei jăk mơak Aê Diê brei kơ pô.
Drei ƀuh mâo ya klei bi mlih hlăm klei hdĭp pô leh tŭ klei ƀaptem?
Wah lač: Ơ Khua Yang, akâo kơ Ih đru kâo thâo klei hdĭp sa čô mnuih đăo kơ Krist sĭt, thâo gưt asăp Yang Mngăt Jăk čiăng mâo klei jăk mơak Aê Diê ƀuăn leh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
