Rôm 12:1-8
“Ơ lu ‘nhŏng oh, bơ̆n băt boih ‘Bok Kei-Dei ‘mêm kơ bơ̆n tôch bơneh dang noh, na bơ̆n athei pơjao akâu bơ̆n kơ Sư, ‘nĕ pă pơm yoch, pơm kiơ̆ kơ Sư đĕch, noh na Sư lăp đon kơ bơ̆n.” (Rôm 12:1)
Nơ̆r jet tơchĕng pơwao:
– ‘Bok Pôl krao pơtơm bơngai lui kơ Yêsu pơyơ̆r tơdrong kiơ kơ Kră Yang?
– Tơdrong kơkuh trŏ đei tơ’bôh thoi yơ?
– Lu bơ̆n đei sơng iŏk tơdrong hlôh wao gơh hơgei păng oei yua thoi yơ?
Yua kơ đơ̆ng tơdrong ‘mêm ‘Bok Kei-Dei ‘măn kơ bơ̆n, ‘bok Pôl bơtho bơngai lui athei pơyơ̆r akâu jăn pơm tơmam soi arih păng ‘lơ̆ng rơgoh na ‘Bok Kei-Dei lăp đon. Akâu jăn lu bơ̆n đêl pơm yoch bơih na dang ei ‘bơ̆p anăp Kră Yang nhen thoi lôch bơih, ưh kơ đei tơdrong tơ’bưh kiơ hăm Kră Yang. Đơ̆ng năr bơ̆n lui sơng iŏk Kră Yang Yêsu, na lu bơ̆n đei chăl arih ‘nao, tơdrong arih đei Yang Bơhngol ‘Lơ̆ng pơgơ̆r. thoi noh, akâu jăn bơ̆n bơ̆n jing hnam Yang Bơhngol ‘Lơ̆ng đei tơdrong arih păng ‘lơ̆ng rơgoh. Na ‘Bok Kei-Dei lăp đon gah tơdrong bơ̆n pơjao akâu jăn bơ̆n lăm tơdrong kơkuh trŏ, wă khan bơ̆n arih rai jê̆ đei tơdrong tơ’bưh hăm Kră Yang.
Tơdrong kơkuh trŏ kăl kơ đei tơdrong arih ‘lơ̆ng ưh kơ pơm kiơ̆ thoi lu bơngai ưh kơ lui. Pơma pha ‘biơ̆ ưh kơ arih kiơ̆ chăl arih so kiơ̆ kơdih akâu wă mălei gơnang kơ Yang Bơhngol ‘Lơ̆ng wă kơ Sư tơplih đon tơchĕng bơ̆n. Bơngai lui yak kiơ̆ đon lui gơnang kơ Kră Yang păng chu kiơ̆ kơ Sư chông anhăk kiơ̆ thoi Sư wă ‘lơ̆ng dêh păng ‘lơ̆ng tôm tơdrong lăm ‘Bok Kei-Dei. Lu bơ̆n athei băt kơnăl trŏ tơdrong gĭt kăl bơ̆n lăm ‘Bok Krist, ưh kơ đei tơchĕng tơdrong pơang mălei athei đei jơhngơ̆m đon iơ̆m dim, arih kiơ̆ đon lui kơ Kră Yang ‘Bok Kei-Dei ăn kơ rim bơngai.
‘Bok Pôl đei tơ’bôh rup lăm akâu jăn đei lơ chăl wă kơ lu bơ̆n ‘bônh kơ ‘bôh bơ̆n kơdih đei lăm hnam dơnŏ Kră Yang. Lăm akâu jăn đei lơ chăl păng lơ chăl ưh kơ gơh jang hrơ̆p hơdai băl. Kư̆m thoi ei mơ̆n, lu bơ̆n kư̆m dai phara băl mălei lu bơ̆n minh pôm akâu jăn lăm ‘Bok Krist. Kră Yang ăn kơ rim ‘nu lu bơ̆n tơdrong gơh hơgei phara băl, đei mơ’nah gơh pơma khan lê̆ adrol, mơ’nah gơh bơ̆jang tơdrong jang ‘nâu, đei mơ’nah gơh chă bơtho đe, mơ’nah chă pơlung đe, mơ’nah gơh tơgŭm đe, đei mơ’nah dơ̆ng gơh pơgơ̆r hnam dơnŏ sư, kư̆m đei mơ’nah băt mơnat kơ đe, v.v… Rim ‘nu kơ bơ̆n gơh phara băl. Lu bơ̆n wang hơdai tơiung bơ̆jang kơ Kră Yang. Thoi noh na minh ‘nu bơngai gơh bơ̆jang lơ tơdrong jang lăm hnam akŭm thoi ei na bơ̆n ưh kơ gơh pơang kơ đe. Rim ‘nu kơ lu bơ̆n kăl kơ băt Kră Yang ăn tơdrong gơh hơgei phara băl păng yua iŏk tơdrong noh gơh đei yua tơpă. Rim chăl lăm akâu jăn Kră Yang Yêsu tă kơ gĭt kăl lei lăi băl ngăl. ‘Bơ̆t anăp Kră Yang, bơngai khan lê̆ adrol, bơtho nơ̆r Kră Yang, gĭt lei lăi thoi lu bơngai năm ngôi pơlung, băt tơgŭm lu ‘nhŏng oh bơngai lui, păng tơgŭm băl wơ̆ tơ̆l thoi Kră Yang wă.
Ơ Kră Yang, inh bơnê kơ Ih đei ăn kơ inh tơdrong arih ‘nao, akâu jăn arih păng ‘lơ̆ng rŏ gơh bơnê kơ Ih đei ăn kơ inh tơdrong gơh hơgei păng jơ năr wă bơ̆jang. Apinh Ih tơgŭm inh băt iơ̆m dim, đĭ jơhngơ̆m kơkuh kơ Kră Yang rim năr trŏ ‘lơ̆ng. Kră Yang lăp đon. Krao khan yua anăn Kră Yang Yêsu Krist, Amen!
Lu bơ̆n oei pơyơ̆r kơ Kră Yang tơmam arih păng ‘lơ̆ng rơgoh dah mă tơmam lôch ôm păng kơnê̆?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 6
Kênh Youtube BHKTHN:
