LĐ Êyiptơ 32:7-10
“Iĕm ‘nĕ tơchĕng khan iĕm gơh hơlĕnh kơ ‘Bok Kei-Dei, yua kơ Sư băt tôm tơdrong. Bơ̆n pơtăm găr kiơ gô đei plei ‘nei tơpă.” (Galati 6:7)
Nơ̆r jet tơchĕng pơwao:
– Kră Yang ‘Bok Kei-Dei lăng thoi yơ gah tơdrong yoch?
– Kră Yang ‘Bok Kei-Dei pơm plơ̆ thoi yơ hăm tơdrong yoch kon pơlei?
– Dang ei đei tơ’blŏk păng tơbăt kơ lu bơ̆n tơdrong kiơ?
Chăl dang ei, lơ bơngai kiơ̆ trong wă lei lăi, ưh kơ đei tơdrong kiơ trŏ dah glăi, ưh kơ đei tơdrong kiơ sĭt, tôm tơdrong mơ̆ng kơ rim ‘nu băt kơdih. Yua kơ thoi noh, tơdrong yoch kư̆m lăng nhen wă lei lăi, thoi noh đon lui khul bơngai lui iŏk lăm sơ̆p hla bơar noh bơih Nơ̆r Kră Yang ‘Bok Kei-Dei. Tơdrong yoch ưh kơ gơh tơblang kiơ̆ kơ tơdrong tơchĕng kon bơngai. Mă-lei đơ̆ng Kră Yang ‘Bok Kei-Dei. Dah ‘Bok Kei-Dei khan yoch noh bơih tơdrong yoch!
Kơplah lăng ‘bôh kon pơlei kơkuh kơ rup rơmo pơm păng maih, Kră Yang khan kơ Môis: “yua kơ lu kon pơlei pơla ih, lu bơngai mă ih đei chông tơlĕch lu sư đơ̆ng char Êyiptơ, lu sư pơm glăi răm bơih” (trong 7). “Glăi răm” wă khan kơdâu truh tơ tơdrong hiong răm, pơchah, pơlôch đĭ. Kră Yang ‘Bok Kei-Dei tơblang lăm trong 8-9, “glăi răm” noh jing “achăng trong Inh tơtă” păng “Lu sư man pơm rup kon rơmo kơdih lu sư bơih, lu sư kơkuh păng pơyơ̆r tơmam soi kơ rup noh” klaih kơ noh lu sư khan; “’nâu yang ih, tơ’ngla mă đei chông tơlĕch ih đơ̆ng char Êyiptơ!” noh wă tơ ‘bôh “arăng kơ̆l” wă khan kon pơlei Israel glăI răm pơm yoch hăm Kră Yang ‘Bok Kei-Dei yua kơ lu sư ưh kơ pơm kiơ̆ nơ̆r Kră Yang, kơkuh kơ rup yang, ră roi tơdrong glăi, pơma plơ̆ ưh kơ wă mơ̆ng nơ̆r Kră Yang ‘Bok kei-Dei.
Lơ bơngai lui oei hơđơ̆ng yua kơ lăng kơdih oei lui ‘lơ̆ng, ưh kơ pơm pơyô kư̆ kă, pơlôch bơngai, dah tơtông klĕ, mă-lei hăm đei lai-yơ lu bơ̆n lăng kơdih păng ‘bôh hli kơplah lơ wơ̆t pơm yoch hăm Kră Yang yua ưh kơ pơm kiơ̆ nơ̆r Kră Yang bơtho, yua kơ dan bơ̆n kơdih dah bơngai bu nai dah jên tơmam tơplih anih Kră Yang ‘Bok Kei-Dei. Păng yua kơ đơ̆ng “arăng kơ̆l” hăm nơ̆r Kră Yang bơtho dah hăm tơdrong tơdra Kră Yang tơbăt.
Mă khan Kră Yang ‘Bok Kei-Dei oei bơtho tơ’bôh ‘bok Môis gah pơm Anih Akŭm Bơsŭn, Sư kư̆m jing pơdơh wă khan kơ sư Môis gah tơdrong yoch kon pơlei (trong 7) tơdrong yoch bơih noh tơdrong glăi tih hăm Kră Yang ‘Bok Kei-Dei thoi noh kăl kơ hơmet adrol kơ mơ̆t hơdai lăm tơdrong lui. ‘bơ̆t anih ‘noh, Kră Yang ‘Bok Kei-Dei ưh kơ kư̆m kơ krao bơngai Juđe “kon pơlei Inh” mă-lei noh “kon pơlei…..ih” (trong 7). Đơ̆ng tơdrong yoch pơgăn tơdrong tơ’bưh kon pơlei hăm kon pơlei Sư (Êsai 59:1-2).
Lơ bơngai roi kơdih khan bơngai lui mă-lei oei ưh kơ pơm kiơ̆ Nơ̆r Kră Yang, oei ưh kơ hiôk dih băl hăm ‘nhŏng oh. Mă khan oei bơwei tơdrong pơm giĕng păng năm kiơ̆ tơdrong lui lăm hnam akŭm, mă-lei athei ‘blŏk Kră Yang ‘Bok Kei-Dei ‘BÔH lu bơ̆n pơm yoch (trong 9) Kră Yang ‘Bok Kei-Dei lăng areh kơ tơdrong yoch, păng đei minh tơdrong chă trong hơmet đĕch hăm tơdrong yoch, noh pơrăm pơlôch (trong 10). Đơ̆ng noh, athei pơ’lơ̆ng hăm tơdrong arih bơ̆n kơdih yua kơ “ ‘Bok Kei-Dei, Sư băt tôm tơdrong. Bơ̆n pơtăm găr kiơ gô đei plei ‘nei tơpă.” (Galati 6:7).
Kơkuh kơ Ih, ơ Kră Yang apĭnh Ih tơgŭm inh arih ‘lơ̆ng rơgoh, yua kơ Ih Kră Yang ‘lơ̆ng tơpăt, apinh ăn kơ inh pơ’lơ̆ng pơm kiơ̆ nơ̆r Ih bơtho păng apĭnh tơgŭm inh huei kơ bu nai hloh kơ Ih, krao khan yua anăn Kră Yang Yêsu Krist. Amen.
Lu bơ̆n kăl kơ pơm thoi kơplah puh pơ̆k lăm tơdrong yoch?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Êsai 1
Kênh Youtube BHKTHN:
