Bơtho Khôi Juăt 32:19-25
“Kră Yang khan: Inh gô ôn muh măt Inh ưh pă lăng lu sư wă lăng lăng tuch-luch lu sư thoi yơ, lu sư minh adrĕch hơlĕnh kơnê̆ dêh, jơ̆ lu kon mă ưh kơ tơnăp.” (Bơtho Khôi Juăt 32:20)
Nơ̆r jet tơchĕng pơwao:
– ‘Bok Kei-Dei pơm tơdrong kiơ lăm tơdrong pơgơ̆p hăm kon pơlei Israel?
– Kon pơlei Kră Yang pơm kiơ na Kră Yang ‘Bok Kei-Dei blĕk?
– Kră Yang teh bơtho kon pơlei Sư thoi yơ?
– ‘Bai pơhrăm ‘nâu wă tơ’blŏk kơ lu bơ̆n tơdrong kiơ?
Pơtrơp ‘moi kiơ̆ minh tơdrong jô̆ tơdrong yoch kon pơlei Israel noh nơ̆r chih roi gah tơdrong mă krưp noh ‘Bok Kei-Dei gô pơm ăn kơ kon pơlei, tơdrong mă blŭng a ‘Bok Kei-Dei pơkă noh gô achăng kon pơlei Israel (trong 19). ‘Bok Kei-Dei khan gô pơm tơpă, Sư gô ôn muh măt đơ̆ng lăm kon pơlei, yua kơ đơ̆ng lu sư ưh pă thoi kon pơlei ‘lơ̆ng rơgoh thoi sơ̆, mă-lei jing minh adrĕch pơm yoch kơnê̆, ưh kơ chu yom.
Ưh kơ đei bu kĕ hlôh tơdrong ‘Bok Kei-Dei hil blĕk dêh dang yơ kơplah ‘bôh kon pơlei Sư kơkuh kơ lu rup yang mă ưh kơ yua kiơ, lăm kơplah noh lu sư achăng Kră Yang mă Tơ’ngla pơjing lu sư, dŏng pơklaih lu sư păng pơjing lu sư jing minh adrĕch, lĕch đơ̆ng tơdrong ưh kơ chu yom noh jing pơm ăn kơ kon pơlei Israel tơplih kơ tơdrong đei yua hla ‘nhot đơ̆ng teh jang sa, jing pŭ iŏk jĭ jăn păn hnong păng tơdrong truh kơnê̆ đơ̆ng lu bơngai ayăt tơgar iŏk dêh char. Nguaih kơ noh, trong 21 khan tơpăt đơ̆ng rŏng sư kư̆m “pơm kơ lu sư ‘ngeng” wă khan Kră Yang pơm pơklai lu sư hăm tơdrong krao wơ̆n “minh adrĕch adrung mă lŭch hloh” gah khôi juăt mă-lei jing kon pơlei Sư yua kơ đơ̆ng lui kơ Kră Yang Yêsu. Kư̆m thoi noh, tơdrong mă trăp dêh noh Kră Yang phak kon pơlei Sư ưh kơ sĭ ăn tơdrong jĭ jăn truh ‘nâu dah tơdrong truh noh nai, mă tơpă Kră Yang pơkă khan gô achăng tŭk lu sư, trŏ tơpă, ưh kơ đei tơdrong kiơ mă tih hloh kơ Tơ’ngla mă dŏng pơklaih kon pơlei Israel. Tơ’ngla đei pơjing lu sư jing minh adrĕch gah Sư, Tơ’ngla wei lăng sư kơplah mă oei hli krê lăm tơdrong arih hlôi lăm dôm jơhngơr, Tơ’ngla chông ba lu sư truh tơ dêh char mă Kră Yang pơkă wă kơ đei iŏk tơdrong arih tôm mah kơplah oei tơ teh ‘lơ̆ng đei đak sut lơ, dang ei tă kơ achăng lu sư, tơdrong noh ưh kơ phara kiơ pơrăm tơhiong.
Kră Yang ‘Bok Kei-Dei bơih Tơ’ngla ‘bĕnh kơ tơdrong ‘mêm mơnat, mă-lei ưh kơ thoi noh mă Sư kư̆m ưh kơ achăng dah ưh kơ băt gah tơdrong arih lu bơ̆n đêl pơm yoch ưh kơ wă chu tơbral mă Kră Yang yua lơ tơdrong wă kơ tơ’blŏk, lu bơ̆n ưh wă kơ pơm plơ̆ truh tơdrong rai tih tăl hơgăl jing pơm kơ Kră Yang achăng lu bơ̆n thoi sư đei achăng kon pơlei Sư. Trŏ tơpă ưh kơ đei tơdrong kiơ mă gleh pơmat hloh noh Kră Yang achăng tŭk, đơng tơdrong noh bơih mă lu bơ̆n đei tơ’bơ̆p gleh pơmat lăm tơdrong arih hăm lu tơdrong pơmat mă ưh kơ băt lê̆ adrol păng gĭt kăl dêh noh tơhiong lê̆ anih mă đêl đơ̆ng jing kon Kră Yang ‘Bok Kei-Dei.
Kơkuh kơ Kră Yang ‘Bok Kei-Dei, Ih bơih Tơ’ngla pơjing inh păng dŏng pơklaih inh, apinh Ih mơnat ăn tơdrong yoch lăm chăl arih inh, apĭnh Ih tơgŭm inh băt mơn kơdih đơ̆ng Yang Bơhngol ‘Lơ̆ng chrih tơ’blŏk, wă tơgŭm arih pơm ăn kơ Kră Yang lăp đon, yua Anăn Kră Yang Yêsu Krist. Amen.
Hăm đei tơdrong yoch kiơ Kră Yang wă kơ lu bơ̆n achăng tŭk mă lu bơ̆n oei pơlơ̆k pơm yoch dơ̆ng?
Đŏk Sơ̆p Hla bơar ‘Bok Kei-Dei lăm pêng sơnăm: Luka 21
Kênh Youtube BHKTHN:
