Tĭt 3:3-7
“Mă-lei ‘Bok Kei-Dei khan tơbăt ăn kơ bơ̆n Sư ‘mêm mơnat tơpă kơ bơ̆n na Sư wă pơklaih bơ̆n đơ̆ng tơdrong yoch.” (Tĭt 3:4)
Nơ̆r jet tơchĕng pơwao:
– Yua kơ đơ̆ng kiơ kon bơngai trŏ kơ hiong răm mălei đei dŏng pơklaih?
– Pêng ‘nu Yang ‘Bok Kei-Dei đei dan hơmet tơdrong dŏng pơklaih kơ kon bơngai thoi yơ?
– Bơ̆n gơh klaih yua kơ đơ̆ng ‘Bok Kei-Dei mơnat, na lu bơ̆n athei arih thoi yơ?
Trong 3 păng trong 4 pơma kơ ‘bar tơdrong tơplơ̆ băl gah kon bơngai. Nơ̆r “mălei” pơtơm đơ̆ng trong 4 tơ’bôh đei tơdrong tơplih băl hlĭch dêh sơ̆ bơ̆n ưh kơ băt tơpă tơdrong ‘Bok Kei-Dei, mălei dang ei ‘Bok Kei-Dei khan tơbăt ăn kơ bơ̆n Sư ‘mêm mơnat tơpă păng Sư pơklaih bơ̆n đơ̆ng tơdrong yoch (trong 3-4). Yua kơ tơdrong ‘mêm hăm kơ kon bơngai bơ̆n, ưh kơ đei yua đơ̆ng minh tơdrong jang ‘lơ̆ng kiơ ôh.
Lăm nơ̆r ‘Bok Kei-Dei năr ‘nâu tơ’bôh pêng anăn ‘Bok Kei-Dei oei hơdai lăm tơdrong dŏng pơklaih kon bơngai. ‘Bok Kei-Dei mơnat kơ bơ̆n ăn Yang Bơhngol ‘Lơ̆ng ôp rơgoh tơdrong yoch bơ̆n, tơpŭ ming nao păng tơplih ‘nao yua kơ đơ̆ng Kră Yang Yêsu chu lôch tang tơ’long pơglang yua kơ tơdrong yoch kon bơngai bơ̆n. Thoi noh, na bơ̆n đơ̆ng ‘Bok Kei-Dei mơnat ăn đĕch na jô̆ bơ̆n bơngai ‘lơ̆ng tơpăt, Sư ăn kơ bơ̆n jing kon Sư păng bơ̆n arih ling lang păng Sư ning mônh (trong 4-7). Kon bơngai bơ̆n đei tơdrong yoch pơm pơmat akâu bơ̆n kơdih, pơm ‘lơ̆ng weh đơ̆ng tơdrong kơnê̆… na gơh klaih ưh ôh, mălei yua kơ đơ̆ng ‘Bok Kei-Dei mơnat ăn đĕch yua kơ đon lui. ‘Bok Pôl đei bơtho: “Mă-lei ‘Bok Kei-Dei Sư oei ‘mêm mơnat kơ bơ̆n tơpă; mă khan bơ̆n bơngai dang lôch yua kơ tơdrong yoch, mă-lei dang ei bơ̆n kư̆m dang Sư tơiung lu bơ̆n thoi Yêsu Krist boih. Bơ̆n gơh klaih đơ̆ng tơdrong yoch yua kơ Sư mơnat ăn. Păng bơ̆n kư̆m dang ‘Bok Kei-Dei atŏk tơ plĕnh hơdai hăm Yêsu Krist boih. Păng dang bơ̆n oei hơdai hăm Sư tơ plĕnh, yua kơ bơ̆n pôm đon pơgơ̆p hơdai hăm Yêsu Krist.” (Êphêsô 2:4-6).
“Mă đĭ kơ nhôn bơngai Juđê kư̆m pơm thoi noh mơ̆n sơ̆. Nhôn kư̆m hưch-hanh kơ tơdrong âu tơdrong to, pơm kiơ̆ kơ nhôn wă kơdih kơnê̆ dêh, trŏ kơ ‘Bok Kei-Dei hil thoi lu bơngai nai tơpă.” (trong 3). Jing bơngai lui kơ Kră Yang, đơ̆ng Yang Bơhngol ‘Lơ̆ng ăn tơdrong arih ‘nao. Na Sư tơplih bơ̆n lăm rim năr wă kơ bơ̆n rai nhen Sư hloh. Thoi noh, na đơ̆ng rŏng kơ bơ̆n lui kơ Yêsu Krist bơih pơih jơhngơ̆m wă kơ Yang Bơhngol ‘Lơ̆ng mơ̆t pơgơ̆r lăm chăl arih bơ̆n. Kơplah bơ̆n chu kơ Yang Bơhngol ‘Lơ̆ng. Na Sư gô ăn thim jơhngơ̆m ‘nao păng tơgŭm bơ̆n wă jing ‘nao rim năr. Athei băt bơnê kơ Kră Yang hăm tơdrong jang gĭt kăl jing kon ‘Bok Kei-Dei tơpă, athei tơnăp kiơ̆ Kră Yang mă tơ’bơ̆p tơdrong chơt hiôk dah ưh, kơjăp arih lăm tơdrong hơmĕng Kră Yang Yêsu gô jur iŏk lu bơ̆n arih ling lang hăm Sư tơ pơlei ‘lơ̆ng. Phŏ lăp năr đei tơdrong pơhlŭ, pơlong lăng dah bơ̆n pơ̆k răm kơplah bơ̆n kiơ̆ Kră Yang athei iung kơdih, gơnang kơ Yang Bơhngol ‘Lơ̆ng na yak năm hơdai Kră Yang rim năr.
Kơkuh bơnê kơ Kră Yang ‘Bok Kei-Dei Tơ’ngla mă ăn ‘Bok dŏng pơklaih kon bơngai, lăm ei đei inh, Hơpơi apinh Yang Bơhngol ‘Lơ̆ng thim ăn jơhngơ̆m pran ‘nao wă kơ inh kĕ yak kiơ̆ Kră Yang ding truh năr tôch. Yua anăn Kră Yang Yêsu Krist, Amen.
Lu bơ̆n pơkă wă arih trŏ thoi Kră Yang dŏng pơklaih bơ̆n thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 21
Kênh Youtube BHKTHN:
