Hơriso 103:8-13
“Yua kơ plĕnh kơjung đơ̆ng teh dang yơ. Na tơdrong ‘mêm sư dang noh mơ̆n, kơ lu bơngai bu mă hli yom kơ Sư.” (Hơriso 103:11)
Nơ̆r jet tơchĕng pơwao:
– Tơdrong ayơ đei lăm Kră Yang pơm kơ Sư blĕk kơ bơngai kơnê̆?
– Kră Yang tơ’bôh tơdrong ‘mêm thoi yơ?
– Bơ̆n athei arih thoi yơ kơplah băt kơ Kră Yang bơih ‘mêm mơnat?
Sơ̆p hla bơar ‘Bok Kei-Dei tơbăt ‘Bok Kei-Dei bơih Tơ’ngla tơpăt: “Yua kơ Kră Yang ‘Bok Kei-Dei oei hơdai iĕm, jơ̆ Kră Yang ‘Bok Kei-Dei băt gar, tơdah lu iĕm kơkuh kơ yang nai Kră Yang ‘Bok Kei-Dei hil mĭl kơ iĕm păng Sư gô pơlôch tơhiong iĕm đơ̆ng kơpal teh âu” (Bơtho Khôi juăt 6:15; Nahum 1:2-3). Tơdrong tơpăt Kră Yang pơm kơ Sư blĕk hil hăm lu bơngai ưh kơ đei chu nơ̆r păng hăm lu bơngai pơm kơnê̆: “Kră Yang ‘Bok Kei-Dei jơ̆ Kră Yang sek tơlang tơpăt, Mă-lei rim năr Kră Yang ‘Bok Kei-Dei oei hil.” (Hơriso 7:11).
Phŏ phŏ lơ wơ̆t bơ̆n pơm kơ Kră Yang blĕk hil yua kơ tơdrong yoch bơ̆n. Mălei bơnê kơ Kră Yang na Sư kư̆m Kră Yang ‘Bok Kei-Dei ‘mêm mơnat. Yua kơ đơ̆ng tơdrong ‘mêm mơnat pơm kơ Kră Yang hiơ̆ kơ blĕk hil, păng “Sư ưh kơ chrih kơ bơ̆n ling lang ôh; Kŭm huay kơ hil mĭl khŏm khŏm mơ̆n.” (trong 9). Tơdrong ‘lơ̆ng tơpăt pơm kơ Kră Yang wă sek tơlang tơdrong yoch păng trŏ kơ phak tơpă. Mălei hăm jơhngơ̆m ‘mêm pơm kơ Sư mơnat. Sư pơm kơ bơ̆n ưh kơ kiơ̆ kơ tơdrong yoch bơ̆n pơm, kư̆m ưh kơ pơm ‘mong kiơ̆ kơ tơdrong kơnê̆ bơ̆n! Pơm tơ ‘long pơglang, tơdrong tơpăt păng ‘mêm mơnat ‘Bok Kei-Dei đei Kră Yang Yêsu pơm pơkeh kơplah Sư khan: “Dôm tơdrong đang bơih” (Yôhan 19:30). Yua kơ tơdrong tơpăt. ‘Bok Kei-Dei wă phak tơdrong yoch kon bơngai. Mălei yua kơ jơhngơ̆m ‘mêm mơnat, Sư dan tơdrong phak noh kơ Kon Pôm Sư păng đơ̆ng tơdrong noh tơ’bôh tơdrong ‘mêm Sư wă dŏng lu bơ̆n. “Noh jơ̆ tơdrong mơnat đơ̆ng Kră Yang. Na lu bơ̆n oei arih, tơdrong ‘mêm Sư ưh kơ đei laiyơ tôch;” (Nhơ̆m hmoi 3:22).
Tơdrong ‘mêm mơnat Kră Yang pơm kơ tơdrong tơ’bưh bơ̆n hăm Sư ưh kơ sĭ thoi lăp hăm Tơ’ngla pơjing tôm tơmam đĕch na kư̆m thoi ‘Bă hăm kon mơ̆n (trong 13). Tơ’ngla Kră Yang Yêsu khan kơ Mari thoi âu: “Thoi noh Yêsu khan: Ih ‘nĕ kơ rôp Inh, yua kơ Inh ưh tam mă tŏk wih tơ ‘Bă Inh. Ih năm khan kơ lu ‘nhŏng oh Inh wă kơ sư băt kơ Inh wă tŏk wih tơ ‘Bă Inh, Sư kư̆m ‘Bă lu iĕm mơ̆n; tơ Kră Yang Inh, Sư kư̆m Kră Yang iĕm mơ̆n.” (Yôhan 20:17). Tơdrong tơpăt păng tơdrong ‘mêm Kră Yang đei bơtho pơjĭ kơplah lu bơ̆n pơm yoch wă kơ bơ̆n jing bơngai ‘lơ̆ng. Jơ̆ tơmam mă đei man đơng ‘mui teh, bơ̆n athei dan akâu jăn bơ̆n lăm tơpang ti Tơ’ngla ‘lơ̆ng tơpăt păng tơdrong ‘mêm wă kơ Sư man bơ̆n jing tơmam mă ‘lơ̆ng hloh. Minh ‘nu bơngai wơ̆ ‘lŏ rim năr rai nhen Kră Yang hloh. Tơdrong mă bơ̆n kăl kơ ‘blŏk răk ‘noh “Na tơdrong ‘mêm Sư dang noh mơ̆n, kơ lu bơngai bu mă hli yom kơ Sư” (trong 11). Tơdrong tơpăt păng tơdrong ‘mêm Kră Yang ling lang druh kiơ̆ bơ̆n. Kơlih kơ thoi ei bơ̆n ‘nĕ kơ yua đơ̆ng tơdrong ‘mêm Kră Yang na ưh kơ hli yom kơ Sư. Arih rai băt hli yom kơ Kră Yang, bơ̆n rai mơn băt tơdrong iơ̆m dim tơdrong ‘mêm tih Kră Yang hăm bơ̆n.
Ơ ‘Bă mă ‘lơ̆ng tơpăt păng ‘mêm mơnat! Bơnê kơ Ih yua kơ Ih man pơjing inh jing kon Ih. Apinh Kră Yang tơgŭm inh arih băt hli yom kơ Ih păng ‘mêm mơnat dih băl wă kơ Ih krôp gom inh ling lang, yua kơ đơ̆ng tơdrong iơ̆m dim tih tin Ih. Krao khan yua Anăn Kră Yang Yêsu Krist, Amen.
Bơ̆n arih hăm trŏ thoi tơdrong ‘mêm Kră Yang ‘măn kơ bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Amôt 4
Kênh Youtube BHKTHN:
