Klei Aê Diê Blŭ: II Klei Yăl Dliê 33:12-13
Êlan kliăng: “Tơdah ñu dôk hlăm klei knap mñai, ñu kwưh kơ Yêhôwa Aê Diê ñu pap brei, leh anăn bi luă gŭ ñu pô êdimima ti anăp Aê Diê kơ phung aê ñu” (II Klei Yăl Dliê 33:12)
Klei êmuh ksiêm mĭn: Tơdah dôk hlăm klei knap mñai hlăm sang war, ya klei Mtao Manasê ngă leh? Si ngă Aê Diê lŏ wĭt kơ Mtao Manasê? Ya drei srăng ngă tơdah tuôm hŏng klei knap mñai, klei lông dlăng?
Phung Asiri hing ang jing phung măk ƀai snăk hŏng phung mnă, kyuanăn diñu kă Mtao Manasê hŏng klei săng đai leh anăn đoh ba kơ ƀuôn Ƀaƀilôn amâo mdê ôh hŏng sa drei hlô mnơ̆ng, hêñ snăk. Dôk hlăm sang war bŏ hŏng klei knap mñai, ñu kwưh kơ Yêhôwa Aê Diê ñu pap brei, knŏng tơdah luč jih klei mdrŏng sah kơh, Mtao Manasê lŏ hƀlŏk kơ klei soh ñu. Mơ̆ng sa čô hur har kkuh mpŭ kơ rup yang, ară anei jing hĕ sa čô mnă kơ phung kkuh rup yang snăn ñu thâo rup yang phung tue amâo dưi bi mtlaih ñu ôh. Êlâo adih ñu jing mgao leh anăn bi mčhur ai ngêñ Aê Diê (êlan 12), ară anei ñu bi luă ñu pô ti anăp Aê Diê, kmhal kơ klei soh, akâo kơ Aê Diê pap brei leh anăn bi mtlaih ñu. Tơdah Mtao Manasê wah lač kơ Aê Diê snăn Aê Diê “tŭ klei ñu kwưh, hmư̆ klei ñu akâo” (êlan 13). Aê Diê mă bruă, bi mtlaih ñu, atăt ñu wĭt kơ ƀuôn Yêrusalem brei ñu lŏ jing mtao kiă kriê čar Yuđa. Hlăk anăn, Mtao Manasê thâo kral kơ Yêhôwa jing Aê Diê. Yêhôwa jing Aê Diê ñu, knŏng Aê Diê yơh dưi bi mtlaih ñu leh anăn hmư̆ klei ñu wah lač mơ̆ng sang war hlăm čar tue.
Tơdah mâo klei knap mñai, arăng khăng mâo sa hlăm dua knuih. Amâodah bi khăng ai tiê hĭn, msĕ si Mtao Ahas, jing aê Mtao Manasê. Klei Aê Diê Blŭ brei thâo, “Mtao Ahas anei êjai ñu mâo klei knap mñai, ñu klah đuĕ hĭn mơ̆ng Yêhôwa” (II Klei Yăl Dliê 28:22). Amâodah kmhal kơ klei soh msĕ si Mtao Manasê, “dôk hlăm klei knap mñai”, ñu kmhal kơ klei soh, “bi luă gŭ ñu pô êdimima ti anăp Aê Diê kơ phung aê ñu” (II Klei Yăl Dliê 33:12). Kyuanăn, Aê Diê pap brei kơ Mtao Manasê leh anăn lŏ bi kơrŭ ñu, bi Mtao Ahas amâo mâo sa klei đru mơ̆ng Aê Diê ôh.
Tăp năng Khua Yang yua klei knap mñai bi luč jih mnơ̆ng drei khăp čiăng, mnơ̆ng drei yap jing klei sĭt nik kơ klei hdĭp drei, čiăng kơ drei lŏ thâo săng, lui hĕ klei mgao, ai tiê khăng, amâodah ya klei amâo bi mơak kơ Khua Yang ôh. Tơdah mâo klei dleh dlan knap mñai, luč jih djăp mta mnơ̆ng, hlăk anăn arăng srăng thâo jih jang dŏ pô mâo jing dŏ Aê Diê leh anăn mơ̆ng Aê Diê sơăi brei leh. Tơdah Aê Diê čiăng Ñu srăng lŏ sua mă jih jang msĕ si Y-Yôp lač leh snei: “Yêhôwa brei, leh anăn Yêhôwa lŏ sua mă leh; hơêč hmưi bi mni kơ anăn Yêhôwa” (Y-Yôp 1:21). Mmông drei tuôm hŏng klei knap mñai êdima hlăm klei duah ƀơ̆ng huă, hlăm klei suaih asei mlei…hlăk anăn yơh drei ƀuh drei čiăng mâo Khua Yang hĭn. Drei srăng ƀuh drei amâo dưi knang ôh kơ rup yang amâodah kơ sa mta mnơ̆ng hlăm lăn ala anei, ƀiădah knŏng Khua Yang yơh jing anôk drei knang. Kyuanăn, tơdah mâo klei lông dlăng, klei knap mñai, đăm drei bi khăng ai tiê ôh, ƀiădah bi luă gŭ bĕ drei pô êdimima ti anăp Khua Yang leh anăn iêo kwưh kơ Ñu.
Drei bi luă gŭ drei pô leh anăn wah lač kơ Khua Yang mơ̆ tơdah mâo klei knap mñai?
Wah lač: Ơ Khua Yang, hlăm klei dleh dlan Ih brei truh kơ kâo, đru kâo bi luă gŭ kâo pô, kmhal kơ klei soh leh anăn iêo wah lač kơ Ih, kyuadah knŏng Ih yơh hmư̆ asăp kâo, lŏ wĭt lač leh anăn bi mtlaih kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
