II Xwmtxheej Vajntxwv 33:12-13
Nqe cim:
“Thaum Manaxes raug kev txomnyem ntawd, nws thiaj txo hwjchim thiab tig rov los cuag tus Tswv uas yog nws tus Vajtswv, thiab nws thov tus Tswv pab nws.” (II Xwmtxheej Vajntxwv 33:12)
Lus nug rau sawvdaws xav:
– Thaum raug txomnyem, nyuaj siab hauv tsev lojcuj, Vajntxwv Manaxes ua li cas?
– Vajtswv teb Vajntxwv Manaxes zoo li cas?
– Peb cheemtsum ua dabtsi thaum raug txomnyem, sim siab?
Vim cov neeg Axilias nto npe hais tias cov neeg ua phem rau cov neeg raug ntes mus ua qhev, yog li lawv thiaj ntes Vajntxwv Manaxes thiab cab mus rau tebchaws Npanpiloos zoo li ib tug tsiaj, ua rau txajmuag ntsuav. Nyob hauv tsev lojcuj txomnyem, vajntxwv tau thov nws tus Tswv uas yog Vajtswv pab. Tsuas yog thaum raug poob tagnrho tej kev npluanuj, Vajntxwv manaxes thiaj tsim dheev los. Tus neeg kub siab lug pemlom, nimno raug cov neeg pemlom kaw hauv tsev lojcuj; yog li vajntxwv mam paub hais tias lwm haivneeg tej mlom pab tsis tau nws. Ua ntej ntawd vajntxwv khavtheeb thiab ua rau tus Tswv “chim” (nqe 6), nimno vajntxwv txo hwjchim tabmeeg Vajtswv, lees txim, thov Nws zam txim thiab cawm. Thaum Vajntxwv Manaxes thov Vajtswv pab ces “Vajtswv hnov nws tej lus thov thiab teb nws” (nqe 13). Vajtswv ua haujlwm, Nws cev tes pab, tso vajntxwv rov los hauv lub nroog Yeluxalees ua vajntxwv kav tebchaws Yudas. Lub sijhawm ntawd, Vajntxwv Manaxes zeem paub hais tias tus Tswv yog Vajtswv. Nws yog vajntxwv tus Vajtswv, tsuas yog Nws tib leeg xwb thiaj cawm tau vajtxwv thiab hnov nws tej lus thov puag hauv tsev lojcuj nyob hauv lwm haivneeg lub tebchaws.
Thaum ntsib kev txomnyem, tibneeg pheej muaj ob tug cwjpwm. Xws li siab tawv dua, zoo li Vajntxwv Ahas, uas yog Vajntxwv Manaxes yawg. Vajtswv Txojlus qhia paub “thaum raug kev txomnyem, Vajntxwv Ahas yim ua txhaum tawmtsam tus Tswv” (II Xwmtxheej Vajntxwv 28:22). Lossis lees txim zoo li Vajntxwv Manaxes, “thaum raug txomnyem”, vajntxwv lees txim, “txo hwjchim tabmeeg Vajtswv tus uas yog nws yawgkoob tus Vajtswv” (II Xwmtxheej Vajntxwv 33:12). Vim qhov no, Vajntxwv Manaxes tau Vajtswv zam txim thiab siv dua, tiamsis Vajntxwv Ahas tsis tau txais tus Tswv kev pab.
Vajtswv muaj peevxwm muab tau tej kev txomnyem los ua kom yam uas peb nyiam ploj mus, yam uas peb saib tsimtxiaj ua neej tshem mus, kom peb tsim dheev, tso kev khavtheeb, tawv ncauj, lossis yam uas tsis haum Vajtswv siab. Thaum raug txomnyem, nyuaj siab, thaum poob txhua yam, tibneeg yuav zeem paub tias txhua yam yus muaj puavleej yog tus Tswv li thiab yog Nws pub xwb. Yog Vajtswv xav ces Nws yeej yuav tshem mus ib yam li Yauj hais: “Tus Tswv muab txhua yam rau kuv, nimno tus Tswv coj rov qab. Thov kom sawvdaws qhuas nws lub npe.” (Yauj 1:21). Thaum lub sijhawm uas peb ntsib tej kev txomnyem hauv kev khwv noj haus, kev ua haujlwm, dag zog… ces lub sijhawm ntawd yog lub sijhawm uas peb cheemtsum Vajtswv heev dua. Peb yuav pom tias yus tso siab tsis tau rau ib tug mlom twg lossis ib yam dabtsi nyob hauv ntiajteb no, tsuas yog Vajtswv xwb thiaj yog qhov chaw cia siab. Yog li ntawd, thaum ntsib kev sim siab, txomnyem, thov kom peb tsis txhob tawv ncauj, tiamsis cia li txo hwjchim tabmeeg Vajtswv thiab thov Nws pab.
Thov Vajtswv,
Tus Tswv, thaum nyob hauv lub tsamthawj uas Koj pom zoo kev txomnyem raug nyuam yaus, thov Koj qhia nyuam yaus txo hwjchim, lees txim thiab thov Koj pab, vim tsuas yog Koj tib leeg thiaj hnov, teb thiab cawm tau. Nyuam yaus tuav Yexus Khetos lub npe thov, Amees.
Peb puas txo hwjchim thov Vajtswv thaum ntsib kev txomnyem?
Nyeem Vajluskub hauv peb lub xyoo: II Xwmtxheej Vajntxwv 16
Kênh Youtube BHKTHN:
