Klei Aê Diê Blŭ: II Klei Yăl Dliê 20:1-4
Êlan kliăng: “Snăn Y‑Jôsaphat huĭ leh anăn čuăn duah Yêhôwa, leh anăn mtă klei kăm ƀơ̆ng huă tar ƀar čar Yuđa.” (II Klei Yăl Dliê 20:3)
Klei êmuh ksiêm mĭn: Ya klei truh dleh dlan mtao Y‑Jôsaphat dôk găn (dlăng thiăm II Klei Yăl Dliê 19:1-4)? Si klei mtao wĭt ngă tơdah ñu thâo kral phŭn knhal kơ klei dleh dlan anei? Ya klei brei ih ngă tơdah mâo klei čuăn ngă leh soh čhuai leh, leh anăn dôk tlă anăp hŏng klei Aê Diê ƀuah?
Y‑Jôsaphat jing mtao tal pă kơ ƀuôn ala mtao Yuđa. Ñu jing sa čô mtao thâo huĭ mpŭ kơ Aê Diê leh anăn mâo klei Aê Diê hơêč hmưi (II Klei Yăl Dliê 17:3-4). Klei dleh dlan hlăm kdrêč 20 truh “Leh klei anăn” (êlan 1), mblang jing, hlăk leh mtao Y‑Jôsaphat ngă klei bi mguôp hŏng phung mtao jhat ƀai tĭng ƀuôn ala mtao Israel, Y‑Ahap čiăng ksŭng blah phung Siri (II Klei Yăl Dliê kdrêč 18), leh anăn khua pô hưn êlâo Y‑Jêhu hưn kơ ñu klei Aê Diê ăl ngêñ, đru ñu thâo kral klei soh čhuai ñu ngă leh, snăn yơh mtao mbĭt hŏng phung ƀuôn sang kmhal kơ klei soh (II Klei Yăl Dliê 19:2-4). Leh anăn, phung Môap, Amôn leh anăn phung Mêun bi mguôp mbĭt hriê bi blah hŏng Israel. Anei jing sa phung kahan lu êdimi găn Êa ksĭ Djiê čiăng nao plah mă ƀuôn Êngêđi, jing sa krĭng lăn dŏ Yuđa. Snăn yơh, dưi thâo kral klei bi blah anei kbiă hriê mơ̆ng klei soh mtao Y‑Jôsaphat ngă êlâo kơnăn. Mta phŭn tinei ya ngă mtao Y‑Jôsaphat kmhal leh kơ klei soh ƀiădah Aê Diê ăt bi kmhal mơh? Brei drei hdơr snei, klei pap brei klei soh amâo mblang jing lăm lui boh tŭ jhat mơ̆ng klei soh anăn ôh. Kdlưn hĭn kơnăn, knhuah tŭ ư klei mkra bi kmhal ba klei tŭ dưn kơ pô ngă klei soh, đru diñu thâo kral klei jhat kjham mơ̆ng klei soh, mbĭt hŏng đru diñu hưn mdah klei kmhal sĭt leh.
Dôk ti anăp klei dleh dlan prŏng prĭn anei, ngă kơ mtao “Y‑Jôsaphat huĭ” leh anăn kyuanăn yơh “čuăn duah Yêhôwa” (êlan 3). Ñu thâo kral klei bi blah anei kbiă hriê mơ̆ng klei soh ñu yơh, anei jing sa klei dleh dlan kơ klei hdĭp myang, kyuanăn ăt brei klei mgaih mkra myang mơh. Hĭn mơh, knhuah mtao Y‑Jôsaphat mă tŭ, brei ƀuh klei ñu kmhal jing sĭt. Mơ̆ng klei anei, drei thâo snei, tơdah čuăn ngă sa klei soh čhuai leh anăn tlă anăp hŏng klei Aê Diê ƀuah, brei drei kmhal mtam, amâo lŏ duah êlan mgang kơ klei soh pô ngă leh ôh, brei drei tŭ ư jih boh jhat mơ̆ng klei soh drei ngă leh, leh anăn êran nao mtam kơ Aê Diê tơdah tuôm hŏng klei dleh dlan truh.
Mtao Y‑Jôsaphat amâo knŏng kmhal klei soh hŏng Aê Diê ôh, ƀiădah wăt lŏ “Mtă klei kăm ƀơ̆ng huă tar ƀar čar Yuđa” leh anăn jih jang ƀuôn sang hmư̆ gưt klei mtao iêô mthưr (êlan 3-4). Wăt tơdah klei bi blah kbiă hriê mơ̆ng klei soh mtao Y‑Jôsaphat pô, ƀiădah jih jang phung ƀuôn sang Yuđa thâo săng, kyua mơ̆ng klei soh khua kiă kriê srăng dưi ba hriê boh jhat kjham kơ jih jang phung ƀuôn sang. Kyuanăn, dôk ti anăp klei dleh dlan anei, amâo djŏ ôh knŏng pô ngă soh kmhal kơ klei soh leh anăn tui duah Aê Diê, ƀiădah brei mbĭt hŏng jih jang phung ƀuôn sang mơh. Anei jing knhuah hdĭp brei Phung Sang Aê Diê bi mâo hĕ, tơdah dôk ti anăp klei soh leh anăn klei dluh lĕ phung ayŏng amai adei drei. Brei thâo bi khăp, bi đru rŭ hdơ̆ng pô, hlăm klei bi blah myang, sa ai kmhal kơ klei soh leh anăn tui duah Khua Yang.
Tơdah ngă soh, si ngă drei khăng lŏ mgang, bi lĕ kơ pô mkăn amâodah kmhal kơ klei soh mtam?
Wah lač: Ơ Khua Yang, bi mni kơ Khua Yang kyua klei jăk Ih ăt pioh kơ kâo, wăt êjai kâo dôk ngă soh hŏng Ih. Akâo Khua Yang brei kơ kâo ai tiê luă gŭ thâo kmhal kơ klei soh čiăng mâo klei pap brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Êphêsô 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
