II Xwmtxheej Vajntxwv 20:1-4
Nqe cim:
“Yehausafas ntshai heev, nws thiaj thov tus Tswv pab. Yog li ntawd, vajntxwv thiaj samhwm kom cov pejxeem sawvdaws ua kevcai yoo mov thoob lub tebchaws Yudas.”(II Xwmtxheej Vajntxwv 20:3)
Lus nug rau sawvdaws xav:
– Vajntxwv Yehausafas tabtom ntsib raug yam kev nyuam twg? (saib ntxiv II Xwmtxheej Vajntxwv 19:1-4)?
– Yehausafas ua li cas thaum nws paub qhov keebtiv ntawm tej teebmeem?
– Peb yuav ua dabtsi thaum txiav txim siab yuam kev thiab Vajtswv qhia paub?
Yehausafas yog tus vajntxwv tim plaub kav lub tebchaws Yudas. Nws yog ib tug vajntxwv hwm Vajtswv thiab tau Vajtswv foom koob hmoov (II Xwmtxheej Vajntxwv 17:3-4). Qhov teebmeem hauv tshooj 20 tshwm “tsis ntev tom qab no” (nqe 1), txhais tau hais tias tom qab uas Vajntxwv Yehausafas mus koom nrog cov vajntxwv phem kav tebchaws Yixalayees uas yog koom Ahaj tua cov Xilias (II Xwmtxheej Vajntxwv18), thiab tus cevlus Yehus twb ceebtoom rau Yehausafas txog qhov uas Vajtswv chim heev, Yehausafas thiaj zeem paub nws qhov txhaum thiab nrog cov pejxeem lees txim (II Xwmtxheej Vajntxwv 19:2-4). Tom qab ntawd, peb lub tebchaws Mau-am, Amoos, thiab cov neeg Me-unis koom tes tuaj tua cov Yixalayees. Nov yog ib pab tubrog coob heev hla hiavtxwv tuag tuaj txeeb lub nroog Ekedis, ib thajchaw nyob hauv tebchaws Yudas. Yog li, peb pom tias kob tsovrog no pib ntawm Yehausafas tej kev txhaum los. Qhov teebmeem yog vim li cas Vajntxwv Yehausafas twb lees txim tiamsis Vajtswv tseem rau txim thiab? Yuav tsum nco ntsoov hais tias Vajtswv txojkev zam txim tsis tau txhais hais tias tso kev txhaum dhau mus. Dua li ntawd, tus cwjpwm txais yuav qhov uas Vajtswv rau txim ua rau muaj nqis rau tus neeg ua txhaum, pab kom nws pom kev txhaum txaus ntshai heev, thiab muaj lub siab tso kev txhaum tseg.
Thaum ntsib tej teebmeem loj li no, ua rau Vajntxwv “Yehausafas ntshai heev” thiab qhov ntawd ua rau nws “thov tus Tswv pab” (nqe 3). Yehausafas zeem paub kob tsovrog no yog tuaj ntawm nws qhov kev txhaum tuaj, nov yog hais txog sab ntsujplig, yog li lub tswvyim pab kuj yog sab ntsujplig xwb. Dua li ntawd, qhov uas Vajntxwv Yehausafas ua kuj qhia paub nws txojkev lees txim yog tseeb. Txij ntawd los, peb kawm paub tias thaum txiav txim siab ua yuam kev thiab hnov Vajtswv qhia ces yuav tsum lees txim sai sai, tsis txhob mus nrhiav kev daws lossis liam txim, yuav tsum lees txais qhov nqi zog ntawm txojkev uas yus ua thiab tig los cuag Vajtswv thaum ntsib teebmeem.
Vajntxwv Yehausafas tsis yog lees txim ib leeg rau tus Tswv xwb tiamsis nws tseem “samhwm kom cov pejxeem sawvdaws ua kevcai yoo mov thoob lub tebchaws Yudas” thiab tej pejxeem sawvdaws txaus siab ua li nws hais (nqe 3-4). Txawm yog qhov no los ntawm Yehausafas txojkev txhaum los los, cov pejxeem Yudas paub tseeb tias tus thawjcoj ua txhaum ces yuav raug rau cov pejxeem huvsi. Yog li ntawd, ntsib qhov teebmeem no, tsis yog tus neeg ua txhaum thiaj lees txim thiab nrhiav tus Tswv xwb, cov pejxeem los yuav tau ib yam nkaus. Qhov no yog tus cwjpwm uas Pawg Ntseeg cheemtsum muaj thaum ntsib tej kev txhaum thiab tej uas yus ua tsis tau. Cia li sib hlub, sib pab hauv kob tsovrog sab ntsujplig uas yog koom siab lees txim nrhiav tus Tswv.
Thov Vajtswv,
Tus Tswv, nyuam yaus ua Koj tsaug vim Koj ua siab ntev thaum ua txhaum rau Koj. Thov Koj pub kom nyuam yaus muaj lub siab txo hwjchim lees txim kom tau txais Koj kev zam txim. Nyuam yaus tuav Tswv Yexus lub npe thov, Amees.
Thaum ua txhaum, peb pheej hais daws yus zaj, liam txim los yog lees txim tamsim ntawd?
Nyeem Vajluskub hauv peb lub xyoo: Efexus 1
Kênh Youtube BHKTHN:
