Klei Aê Diê Blŭ: Klei Bi Hriêng 11:24-26
Êlan kliăng: “Sa čô kmah srăng đĭ mdrŏng hĭn, leh anăn hlei pô đru arăng, arăng srăng đru ñu msĕ mơh.” (Klei Bi Hriêng 11:25).
Klei êmuh ksiêm mĭn: Ya ai tiê klei mĭn leh anăn si ênhă êlan yua mnơ̆ng mnuă brei bi mâo hĕ? Ya boh tŭ dưn srăng mă tŭ tơdah tui tiŏ knhuah hdĭp leh anăn ênhă êlan yua mnơ̆ng mnuă bi djŏ? Ya klei drei kñăm čiăng hlăm klei duah prăk kăk?
Lu mnuih lač hdĭp ti lăn ala anei brei duah djăp ênhă êlan mkăm pioh ngăn drăp ktang lu ktang jăk. Ƀiădah lĕ, Klei Aê Diê Blŭ hưn mdah sa ênhă êlan bi mklăk hŏng klei anăn, “Sa čô mnuih brei hŏng klei kmah, ƀiădah ăt đĭ mdrŏng hĭn” (êlan 24a). Boh blŭ “brei” yua 9 blư̆ hlăm Klei Aê Diê Blŭ čiăng lač “rah hwiê hŏng klei kmah”. Boh blŭ anei lač kơ ai tiê klei mĭn thiê brei hŏng klei kmah, amâo tĭng yap ƀiă lu ôh. Leh anăn ênhă êlan hdĭp tui si Klei Aê Diê Blŭ mtô tinei, rah lu hĭn srăng “đĭ mdrŏng hĭn” msĕ si sa čô ngă hma rah lu srăng wiă lu (II Kôrantô 9:6).
Hlăm ênuk anăn mâo lu mnuih mkăm pioh mdiê braih leh anăn mjhua klei luč liê boh mnga yan adiê kăp mđĭ mdrŏng, ƀiădah mnuih kpă ênô amâo srăng ngă snăn ôh, “ƀiădah hlei pô čhĭ gơ̆ srăng mâo klei jăk jĭn” (êlan 26b). Knhuah hdĭp “mnuih kpă ênô” hŏng mnơ̆ng mnuă yap ñu pô knŏng jing mnuih kiă kriê, mâo bruă klam yua mnơ̆ng mnuă kăp ba klei tŭ dưn kơ pô mkăn. Rup bi hmô mnuih kpă ênô Y‑Yôsep tơdah Khua Yang brei ñu ƀuh êlâo, êdei kơ kjuh thŭn trei bŏ srăng truh kjuh thŭn ư̆ êpa, leh anăn hlăk kjuh thŭn ư̆ êpa truh, ñu pŏk hjiê čhĭ mdiê kơ jih jang mnuih (Klei Mphŭn Dơ̆ng 41:56; 42:1-5).
Brei drei thâo kral mâo Aê Diê dôk mbĭt leh anăn brei mâo bruă klam kơ bruă drei ngă ti anăp Ñu. Thâo săng jih jang mnơ̆ng drei mâo jing mơ̆ng Aê Diê brei pioh yua kơ klei Ñu kñăm čiăng, leh anăn brei thâo săng klei tŭ dưn kơ arăng jing yuôm, amâo mjhua klei drei mâo kăp duah klei tŭ dưn kơ drei pô ôh. Lăn ala lač klei kñăm čiăng knhal tuč hlăm bruă čhĭ mnia jing boh mnga ƀiădah Klei Aê Diê Blŭ mtô drei snei, klei kñăm čiăng knhal tuč kơ jih jang bruă jing bi guh kơang kơ Aê Diê, jing klei tŭ dưn kơ ƀuôn sang leh anăn kơ pô mkăn (I Kôrantô 10:31; Philip 2:4). Tơdah ruah sa anôk mă bruă čiăng mkăm pioh amâodah ruah sa mta mnơ̆ng čiăng čhĭ mnia, drei tuôm êmuh mơ̆ si ngă mnơ̆ng anăn ba klei tŭ dưn kơ ƀuôn sang, amâodah anôk drei mă bruă mâo bruă tŭ dưn kơ ƀuôn sang mơ̆?
Sa čô mnuih dlăng klei tŭ dưn kơ pô mkăn jing kdlưn hĭn kơ klei tŭ dưn kơ ñu pô srăng mă tŭ klei hơêc hmưi, “Sa čô kmah srăng đĭ mdrŏng hĭn, leh anăn hlei pô đru arăng, arăng srăng đru ñu msĕ mơh” (êlan 25). “Đru arăng” čiăng lač “brei mnăm êa bŏ trei, bi msah djhăp”. Israel jing čar ngă bruă lŏ hma kyuanăn êa jing mta phŭn yuôm êdimi, leh anăn ênhă êlan kơ klei hdĭp mngăt myang tinei jing pô kăp thiê brei êa krih đang hma kơ pô riêng gah sĭt nik ăt srăng mâo klei krih êđăp mơh.
Si ngă drei dôk yua ya klei drei mâo hŏng klei djŏ leh anăn tŭ dưn kơ ƀuôn sang mơ̆?
Wah lač: Ơ Khua Yang, bi mni kơ Khua Yang kyua klei Ih brei êbeh dlai kơ klei hdĭp kâo. Akâo Ih brei kâo thâo yua jih klei Ih brei čiăng ba klei tŭ dưn kơ arăng.
Dlăng Klei Aê Diê Blŭ hlăm tlâo thŭn: Klei Mmuñ Hđăp 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
