Khiavdim 30:11-16
Nqe cim
“Txhua tus uas sau npe yuav tsum them nyiaj kom puv ntoob li uas tau kom tseg, muab luj kom hnyav ntaus nqi raws nraim li nomtswv kevcai. Txhua tus yuav tsum them cov nyiaj no ua khoom fij rau kuv” (Khiavdim 30:13).
Lus nug rau sawvdaws xav:
- Leejtwg yuav tsum them nyiaj txhiv txojsia rau tus Tswv?
- Vim licas tus muaj thiab tus pluag raug them nqi tib yam?
- Vim licas cov ntseeg Tswv Yexus tsis them nyiaj txhiv txojsia lawm?
- Peb muaj feemxyuam licas nyob hauv kev fij nyiaj txiag rau Pawg Ntseeg?
Tus Tswv haivneeg yuav tsum them nyiaj txhiv txojsia ib yam li them se taubhau neeg. Tes haujlwm no yog ua raws txojcai txhua tus tub hlob puavleej yog Vajtswv tug thiab thaum mus nyob hauv lub tebchaws coglus tseg lawm yuav tsum siv nyiaj los txhiv (Khiavdim 13:1-16). Txojcai no tau nthuav dav rau txhua tus vim sawvdaws puavleej yog Vajtswv tug. Thaum txheeb npe cov pejxeem, cov neeg muaj nees nkaum xyoo rov saud, tsis hais tus muaj tus pluag los yuav tsum raug them tus nqi yog ib nrab sekhee nyiaj rau hauv lub Tsevntaub siv coj los muas tsiaj theej txhoj thiab siv rau lwm yam kevcai, ua li no lawv “thiaj tsis raug kev puastsuaj” (nqe 12). Ib sekhee nyiaj yuav tau ib tug yaj (Levis Kevcai 5:15), yog li ntawd ib nrab sekhee yuav tsis ua nyuaj dhau rau cov neeg pluag nrhiav tuaj them. Txawm yog hais tias tus Tswv nqua hu Nws haivneeg yuav tsum sib pab, los tes haujlwm no tsis xaiv tus muaj tus pluag vim txhua tus puav leej tsim txiaj ib yam tabmeeg tus Tswv.
Vajluskub qhia hais tias peb txhua tus puav leej ua txhaum tawmtsam tus Tswv tsis hais los ntawm tej lus hais, tes haujlwm thiab hauv kev xav, yog li ntawd sawvdaws cheemtsum tau tus Tswv zam lub txim. Qhov uas tua tus tsiaj theej txhoj hnub ua kevcai fij khoom daws txim tiam Vajluskub Qub, yog ua yamntxwv txog Vajtswv tus Menyuam Yaj yuav tsum raug tuag txhiv tibneeg ntiajteb tej kev txhaum. Nyob tiam Vajluskub Tshiab, Vajtswv tsis txais yuav tej tsiaj tua ua khoom fij lawm vim tus Tswv Yexus tau los yug ua neeg, raug tuag saum tus ntoo khaublig txhiv tibneeg tej kev txhaum tib zaug xwb txaus lawm. Yuav kom tau mus nyob hauv Vajtswv lub Tebchaws, tus muaj tus pluag yuav tsum zeem paub hais tias, yus tej kev txhaum siv nyiaj txiag los txhiv yeej tsis tau, tiamsis tsuas yog los ntawm Cawmseej Yexus tus uas tsim txhua yam cov ntshav xwb thiaj tau (I Petus 1:18-19). Los ntawm txojkev hlub, tus Tswv Yexus tau pub dawb rau peb, tsis yuav ib qhov nqi li. Peb tau txais kev cawmdim, tau ua pejxeem Ntuj Ceebtsheej tsuas yog los ntawm txojkev ntseeg Tswv Yexus xwb.
Cov ntseeg niaj hnub nimno tau tus Tswv samhwm kom ua lubneej ua timkhawv rau Nws, tsis hais hlub lwm tus, pab lwm tus, txhim kho zej zos kom yim hnub yim zoo thooj tus Tswv, tshajtawm tus Tswv txojkev hlub thiab txojkev cawmdim rau cov uas tsis tau ntseeg. Tej uas hais los no cheemtsum nyiaj txiag pab thiaj ua tiav, cov ntseeg tsis them “nyiaj txhiv txojsia” lawm, tiamsis muaj feem fij nyiaj txiag pab ua tus Tswv tes haujlwm los ntawm lub siab dawb paug thiab zoo siab hlo (II Kauleethaus 9:7).
Peb fij tej qhov txhia chaw rau kev ua tus Tswv haujlwm licas?
Thov Vajtswv
Tswv Yexus, ua Koj tsaug vim Koj tau cawm nyuam yaus dim, pub rau nyuam yaus tau ua Koj ib tug menyuam thiab tau lub npe tshiab hu hais tias tus uas ntseeg Tswv Yexus. Thov pab nyuam yaus nco ntsoov Koj tej txiaj ntsig, fij tagnrho nyuam yaus lubneej rau Koj thiab ua lubneej tshiab ua rau Koj tau koobmeej. Amees.
Nyeem Vajluskub peb lub xyoos: Ntawv Nkauj 46:4-48:14
Tshooj Youtube BHKTHN: https://www.youtube.com/c/bhkthn
