Klei Aê Diê Blŭ: Klei Kbiă 30:11-16.
Êlan kliăng: “Grăp čô phung arăng yap srăng brei sa mkrah sêkel tui si sêkel mơ̆ng adŭ doh jăk (sa sêkel jing dua pluh gêra), sa mkrah sêkel anăn jing mnơ̆ng myơr kơ Yêhôwa” (Klei Kbiă 30:13).
Klei êmuh ksiêm mĭn: Hlei phung brei jao prăk bi tui kơ ñu pô kơ Yêhôwa Aê Diê? Ya ngă phung mdrŏng leh anăn phung ƀun brei jao prăk mdŭm? Ya ngă phung đăo kơ Krist amâo dưi lŏ brei prăk bi tui klei hdĭp ôh? Si bruă klam phung drei hlăm bruă đru mguôp hŏng Sang Aê Diê?
Ơ ƀĭng dôk hmư̆! Phung ƀuôn sang Aê Diê ruah brei jao prăk bi tui kơ diñu pô. Bruă anei mơ̆ng klei bhiăn jing grăp čô anak êkei tal êlâo jing dŏ Aê Diê sơaĭ, leh anăn mŭt leh hlăm Lăn Aê Diê ƀuăn snăn brei bi tui hŏng prăk (Klei kbiă 13:1-16). Klei bhiăn anei dưi pŏk mlar kơ grăp cô mnuih kyua jih jang jing dŏ Aê Diê sơaĭ. Hlăm klei ksiêm dlăng ênoh mnuih, phung mơ̆ng pluh dua thŭn kơ dlông, amâo kah mbha ƀun mdrŏng brei ênoh prăk mkrah sêkel hlăm Sang yang čiăng blei mnơ̆ng myơr čuh hrô kơ klei soh leh anăn dŭm klei bhiăn ngă yang mkăn “čiăng đăm mâo klei ruă tưp hdơ̆ng phung diñu tơdah ih yap diñu” (êlan 12). Sa sêkel mâo ênoh sa drei biăp (Bruă Lêwi 5:15), anăn ênoh mkra mkrah sêkel amâo đei dleh ôh kơ phung ƀun čiăng brei. Wăt tơdah Aê Diê iêô mthưr phung ƀuôn sang Aê Diê ruah jing brei mđing bi đru, ƀiădah hlăm bruă anei Aê Diê amâo kah mbha phung mdrŏng amâodah ƀun ôh kyua grăp čô mnuih mâo ênoh yuôm msĕ sơăi ti anăp Aê Diê.
Klei Aê Diê Blŭ brei thâo jih jang drei jing ngă leh klei soh bi kdơ̆ng hŏng Aê Diê hlăm klei blŭ, bruă ngă leh anăn wăt hlăm klei mĭn, kyua anăn grăp čô mnuih čiăng sơăi klei Aê Diê pap brei. Bruă bi mdjiê mnơ̆ng hlăm knăm bi tui klei soh hlăm ênuk Klei Bi Mguôp Hđăp jing rup Êđai Biăp Aê Diê srăng tuh êrah čiăng djiê hrô kơ jih anak mnuih. Hlăm ênuk Klei Bi Mguôp Mrâo, Aê Diê amâo lŏ tŭ kơ mnơ̆ng jing mnơ̆ng djiê hrô ôh kyua Khua Yang Yêsu hriê leh ti lăn ala jing mnuih, tŭ klei knap mñai ti kyâo bi kal čiăng bi mtlaih anak mnuih sa blư̆ djăp leh. Čiăng dưi mŭt hlăm Ƀuôn Ala Mtao Aê Diê, phung mdrŏng wăt phung ƀun brei thâo kơ klei soh pô amâo dưi blei hŏng prăk ôh ƀiădah hŏng klei hdĭp Khua Yang Yêsu Pô Bi Mtlaih, Pô Hrih Mjing (I Y‑Pêtrôs 1:18-19). Kyua klei pap, Khua Yang Yêsu mprăp brei leh kơ drei amâo guôn tla ya ênoh ôh. Drei tŭ mă klei bi mtlaih, dưi jing phung ƀuôn sang Ƀuôn Ala Mtao kyua knŏng klei đăo kơ Khua Yang Yêsu.
Phung đăo kơ Krist hruê anei mâo Aê Diê mtă brei hdĭp hưn bi sĭt kơ Ñu, mâo wăt bruă bi êdah knuih hdĭp klei khăp, kah mbha kơ phung mâo klei čiăng, mkŏ mjing klei hdĭp êpul êya ƀrư̆ hruê ƀrư̆ msĕ Khua Yang hĭn, hiu hưn klei khăp leh anăn klei bi mtlaih Khua Yang kơ lu mnuih ka đăo. Dŭm bruă anei brei mâo prăk čiăng hlue ngă, grăp čô phung đăo amâo lŏ “brei prăk bi tui” ôh ƀiădah mâo bruă klam bi mguôp prăk mah pô hlăm bruă Aê Diê hŏng klei čŏng ngă leh anăn hơ̆k mơak (II Kôrantô 9:7).
Si drei dôk myơr kơ bruă Aê Diê?
Wah lač: Ơ Khua Yang Yêsu, kâo bi mni lač jăk kơ Ih bi mtlaih leh kâo, brei kâo dưi jing anak Ih leh anăn sa anăn mrâo jing phung đăo kơ Krist. Akâo kơ Khua Yang brei kâo hdơr knga nanao kơ Aê Diê, myơr jih klei hdĭp kơ Ih leh anăn hdĭp klei hdĭp mrâo bi guh kơang Anăn Ih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 46:4-11; 47:1-9; 48:1-14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
