Klei Aê Diê Blŭ: Klei Bi Hriêng 20:24; 3:5-7
Êlan kliăng: “Yêhôwa yơh atăt gai knhuang mnuih, snăn si mnuih dưi thâo săng êlan ñu pô?” (Klei Bi Hriêng 20:24)
Klei êmuh ksiêm mĭn: Si mblang “Yêhôwa yơh atăt gai knhuang mnuih”? Si ngă anak mnuih dưi thâo săng êlan pô? Ya klei ih thâo kơ grăp knhuang êlan pô dôk hlăm kngan Aê Diê sơăi?
Anak mnuih kčah hdră êlan pô čiăng ngă, ƀiădah Yêhôwa bi mklă amâodah kriê dlăng grăp knhuang. Klei anei lŏ mñă Klei Bi Hriêng 16:9 “Klei mĭn mnuih ruah êlan ñu čiăng ngă, ƀiădah Yêhôwa atăt gai knhuang ñu”. Tơdah grăp knhuang anak mnuih jing kyua Aê Diê sơăi atăt gai, snăn si drei thâo săng êlan pô? Anak mnuih ti lăn ala anei dưi ruah êlan pô, hdră tă kơ klei hdĭp pô, ƀiădah hlue ngă leh anăn boh tŭ jăk amâodah hơăi kyua Aê Diê bi mklă.
Snăn drei knŏng thâo săng êlan pô tơdah drei mâo klei thâo mĭn mơ̆ng Aê Diê. Klei thâo mĭn, thâo săng anak mnuih kƀah nanao, drei amâo thâo ôh ti anôk pô nao leh anăn ăt kăn thâo mơh ti anôk kñăm. Hĭn mơh, grăp čô si ngă čiăng thâo săng êlan pô kyua Aê Diê bi mklă grăp knhuang, leh anăn klei tŭ mơ̆ng bruă diñu ngă anăn dôk hlăm hdră kčah Aê Diê. Kyua anăn, brei drei knang kơ Yêhôwa đăm ôh knang kơ klei thâo pô čiăng akâo kơ Aê Diê mtô djŏ êlan pô nao.
Mơ̆ng đưm, aduôn aê drei ăt thâo “Klei mĭn mơ̆ng anak mnuih, klei tŭ jing mơ̆ng Aê Diê”. Anak mnuih mâo dŭm êtuh êbâo klei ksiêm yap mdê mdê ƀiădah Aê Diê jing Pô bi mklă klei tŭ jing amâodah hơăi. Sa klei bi hmô, lu blư̆ tơdah drei kčah sa hdră prŏng, čiăng ngă lu bruă, ƀiădah aguah mdih pĭt snăn jơ̆ng ruă, wăt sa knhuang êbat ăt kăn dưi yŏng jơ̆ng mơh, knŏng dôk đih amâo dưi ngă sa mta bruă ôh. Hlăk anăn kơh drei thâo săng sa knhuang êbat pô ăt jưh hlăm Aê Diê. Anăn jing hlăm asei mlei, ka lač ôh hlăm ai tiê amâodah mngăt. Anei jing mta phŭn ya ngă Mtao Salômôn mtô anak kơ klei huĭ mpŭ kơ Aê Diê mơ̆ng dŭm kdrêč tal êlâo hlăm hdruôm hră Klei Bi Hriêng snei:“Knang kơ Yêhôwa hŏng jih ai tiê, đăm knang ôh kơ klei mĭn ih pô. Hdơr bĕ kơ Ñu hlăm jih êlan ih êbat, leh anăn Ñu srăng bi kpă êlan ih. Đăm yap ih pô thâo mĭn ôh; huĭ mpŭ bĕ kơ Yêhôwa leh anăn đuĕ bĕ mơ̆ng klei jhat” (Klei Bi Hriêng 3:5-7).
Tơdah drei huĭ mpŭ kơ Aê Diê, Ñu srăng hrăm mbĭt hŏng drei hlăm djăp êlan, leh anăn Yang Mngăt Jăk srăng ktrâo kơ drei êlan Ñu. Khua Yang Yêsu lač: “Yêsu lač kơ gơ̆, “Kâo jing êlan, klei sĭt nik, leh anăn klei hdĭp; amâo mâo pô dưi nao kơ Ama, knŏng hŏng kâo.” (Y‑Yôhan 14:6). Čang hmăng grăp čô drei tơdah huĭ mpŭ kơ Aê Diê, nao djăp êlan hŏng Khua Yang wĭt kơ Sang Ama leh anăn dưi dưn klei hdĭp lă lar ti Ƀuôn Ala Mtao Adiê lă lar.
Diih huĭ mpŭ kơ Khua Yang mơ̆ng klei wah lač akâo kơ Ñu hlăm djăp mta hdră kčah mơ̆ng klei hdĭp pô mơ̆?
Wah lač: Ơ Khua Yang, akâo kơ Ih đru ai tiê kâo huĭ mpŭ nanao kơ Ih leh anăn êbat hlăm ktuê êlan Ih. Akâo kơ Aê Diê đru kâo thâo luă gŭ jao jih djăp boh tŭ hlăm kngan Ih leh anăn mđing kơ klei hdĭp lă lar Aê Diê brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 11:16-12:10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
