Klei Aê Diê Blŭ: Klei Bi Hriêng 19:9-12.
Êlan kliăng: “Mnuih mâo klei thâo mĭn jing pô amâo djăl ăl, leh anăn jing klei guh kơang kơ ñu amâo yap ôh klei arăng bi msoh kơ ñu.” ( Klei Bi Hriêng 19:11)
Klei êmuh ksiêm mĭn: Si ngă mtao Y-Salômôn mtô anak ñu dôk dơ̆ng hlăm anôk phat kđi? Dua rup klăk mgar mơ̆ng sa čô mtao ya klei čiăng mñă kơ mnuih thâo mĭn? Si knuih brei phung đăo bi êdah tơdah mâo klei bi mmiă leh anăn tơdah dôk ti anăp khua kiă kriê?
Mtao Y-Salômôn mtô anak ñu kơ klei thâo mĭn hlăm anôk phat kđi. Tal sa, brei mnuih thâo mĭn hlăm Khua Yang djă pioh klei kpă ênô hlăm klei mĭn, klei ngă. Klei hưn luar, klei blŭ luar jing klei ngă soh amâo srăng tlaih ôh mơ̆ng klei bi kmhal. Tal dua, brei mnuih thâo mĭn mâo klei thâo mtrưm hŏng klei êngal kyuanăn amâo dưi ôh brei sa čô mnuih mluk jing khua kiă kriê. Wăt tơdah mâo đa đa phung hlŭn hŏng klei diñu kriăng kreh khua diñu jao kơ diñu kiă kriê anak khua diñu (dlăng Klei Bi Hriêng 17:2), ƀiădah păt čiăng jih hnơ̆ng hdĭp leh anăn klei jing brei bi djŏ hŏng hnơ̆ng klei dưi leh anăn klei thâo mĭn pô arăng jao klei dưi kiă kriê. Mnuih mluk amâo guôp ôh hŏng knhuah hdĭp mdrŏng sah ƀai hĭn êjai hŏng klei ñu kiă kriê mnuih thâo mĭn, mdrŏng sah. Tal tlâo, mnuih thâo mĭn thâo răng nanao kơ knuih ñu pô, amâo djŏ ôh kyua klei ăl snăn ngă klei dôk dơ̆ng, phat kđi kƀah klei thâo mĭn. Anôk phat kđi amâo djŏ knŏng tui duah mă klei dưi hŏng klei amâo dưi ôh, ƀiădah wăt mĭn mơh kơ klei bi grăng, ai tiê jăk čiăng ba hriê boh tŭ dưn. “Amâo yap ôh klei arăng bi msoh” čiăng lač kơ klei amâo mâo rŭ ênua.
Sa anôk yuôm bhăn hlăm êlan 12, pô čih hdruôm hră bi êdah dua rup bi klăk mgar mơ̆ng sa čô mtao; sa jing msĕ si êmông gu bi êdah kơ klei ktang leh anăn klei jhŏng, leh anăn kdrêč ăt dôk jing êa nguôm ti rơ̆k ba hriê klei hdĭp. Êmông gu ba hriê klei djiê, bi mdjiê, dleh mâo pô dưi bi kdơ̆ng, ƀiădah klei pap ba hriê klei hdĭp. Mnuih thâo mĭn thâo weh đuĕ mơ̆ng klei ngêñ mtao jing pô phat kđi, leh anăn tui duah klei pap mơ̆ng diñu (Klei Bi Hriêng 16:1-14).
Hlăm klei hdĭp mâo nanao klei amâo thâo bi djŏ leh anăn klei amâo mtăp mđơr. Klei amâo mtăp mđơr truh hlăm djăp anôk, wăt hlăm anôk phat kđi msĕ mơh. Mâo lu mnuih knang kơ klei mplư mdưm, klei mnêč diñu, amâo uêñ ôh klei soh djŏ čiăng tui duah ngăn dŏ amâodah klei tŭ jing kơ diñu pô. Tơl kơ diñu lĕ hlăm klei kčŭt snăn diñu ngă klei sun ngăn lĕ čiăng tlaih mơ̆ng klei bi kmhal amâodah bi kmhal êdu đuč. Jih jang klei soh bi mguôp mbĭt, leh anăn ênoh mưn kơ klei soh jing klei djiê (Rôm 6:23) amâo djŏ knŏng hlăm klei hdĭp anei ôh ƀiădah wăt kơ ênuk êdei msĕ mơh. Aê Diê čiăng phung ƀuôn sang Ñu hdĭp mdê hŏng lăn ala, brei mâo klei thâo mĭn mơ̆ng Aê Diê; mâo klei mĭn, klei ngă huĭ mpŭ kơ Ñu. Brei drei hdĭp hŏng klei ênuah ênô, hdĭp djŏ hŏng klei jing anak Aê Diê, thâo ư̆ ăn kơ klei ăl leh anăn hdĭp hŏng klei thâo pap. Ti djiêô anăn, brei thâo luă gŭ, êdu êun msĕ mơh, gĭr hdĭp bi mơak kơ Khua Yang leh anăn ñĕ đuĕ mơ̆ng klei khua kiă kriê ngêñ.
Si ngă drei bi êdah klei thâo mĭn tơdah bi mâo kđi?
Ơ Khua Yang, kâo bi mni kơ Ih bi hriăm leh kâo êbat hlăm klei kpă ênô čiăng mâo klei êđăp ênang, klei mơak mñai. Ơ Khua Yang brei bĕ kơ kâo mâo klei thâo mĭn čiăng kâo thâo tĭng knal djŏ leh anăn đru kâo thâo răng kriê kơ knuih kâo pô msĕ mơh. Đru kâo hdĭp thâo bi mơak kơ Ih leh anăn bi mơak kơ khua kiă kriê msĕ mơh čiăng kơ kâo mâo klei êđăp ênang.
Dlăng Klei Aê Diê Blŭ hlăm tlâo thŭn: Y-Êskiêl 40:38-41:12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
