Pajlug 19:9-12
Nqe cim:
“Yog koj txawj xav, koj yuav tsum tswj kom tau koj txojkev chim. Txawm yog luag ua tsis yog rau koj los puam chawj, koj ua li ntawd zoo dua” (Pajlug 19:11).
Lus nug rau sawvdaws xav:
- Vajntxwv Xalumoos qhia menyuam yuav tsum ua licas thaum nyob ntawm rooj txiav txim?
- Ob daim duab sib txawv hais txog Vajntxwv ob tug cwjpwm qhuab ntuas tus muaj tswvyim txog yam dabtsi?
- Tus ntseeg yuav tsum qhia tshwm tus yamntxwv twg thaum tu plaub ntug thiab thaum sawv tabmeeg tej nomtswv?
Vajntxwv Xalumoos qhia menyuam txog tej tswvyim thaum nyob ntawm lub rooj txiavtxim. Thib ib, tus neeg muaj tswvyim hauv tus Tswv yuav tsum muaj kev ncajncees nyob hauv kev xav thiab tes haujlwm. Ua timkhawv tsis tseeb, hais lus dag, ces yog ua txhaum thiab yuav raug rau txim. Thib ob, tus neeg muaj tswvyim yuav tsum muaj kev xav meej pem, tsis cia tus neeg ruam tswjhwm. Txawm yog muaj qee tug qhev vim nquag thiab ua haujlwm zoo, tau tus tswv txib saibxyuas tus tswv cov menyuam (saib Pajlug 17:2), tiamsis feem ntau lubneej thiab lub meejmom yuav tsum phim lub peevxwm thiab kev txawjntse ntawm tus neeg tau tsa los saibxyuas. Tus neeg ruam twb tsis phim tau lubneej zoo ces yuav hais dabtsi txog qhov uas yuav kav tus neeg muaj tswvyim thiab muaj meejmom. Thib peb, tus neeg muaj tswvyim paub tswj tus kheej tus cwjpwm, tsis vim tej kev chim ua rau hais lus, lossis txiav txim ruam. Nyob hauv lub rooj txiav txim tsis yog tsuas nrhiav kev yeej swb xwb, tiamsis tseem nrhiav kev txhim kho thiab sib raug zoo kom tau ntau yam muaj qabhau ntxiv. Nqe lus: “Txawm yog luag ua tsis yog rau koj los puam chawj” yog xav hais txog qhov uas tsis ua phem pauj lwm tus.
Ib qhov tseemceeb nyob hauv nqe 12, tus sau tshooj Pajlug hais txog ob daim duab sib txawv ntsigtxog Vajntxwv ob tug cwjpwm; xubthawj hais txog tus tsov ntxhuav, muab piv rau lub zog loj thiab kev nruj tsiv, thiab txuas ntxiv yog hais txog kob nag rau tej nroj tsuag ua rau ciaj sia. Tsov ntxhuav ua rau txojsia tu, tsis muaj leejtwg yuav kovyeej, tiamsis nplooj siab zoo ua rau ciaj sia. Tus neeg muaj tswvyim yuav tsum paub qaij vajntxwv uas yog tus txiav txim tej kev chim thiab nrhiav kev txaus siab ntawm lawv (saib Pajlug 16:10-14).
Nyob hauv lubneej yeej yuav muaj plaub ntug thiab kev tsis ncajncees. Kev tsis ncajncees tshwmsim txhua qhov, tsis hais hauv lub rooj txiav txim. Coob tug muaj tswvyim phem, dagntxias lwm tus kom tau nyiaj txiag lossis tau meejmom. Txog thaum raug kom mus rau nomtswv ces lawv ntsaws nyiaj xiab kom dim lossis raug txim sib. Tej kev txhaum sib txuas ua ntu zus, thiab nqi zog ntawm kev txhaum yog kev tuag (Loos 6:23), tsis yog tsuas tuag tiamno xwb, tiamsis tseem raug tuag rau tiam tomntej thiab. Tus Tswv xav kom Nws cov menyuam yuav tsum ua neej txawv neeg ntiajteb, yuav tsum muaj tus Tswv lub tswvyim ; yuav tsum muaj tej kev xav thiab tes haujlwm hwm tus Tswv. Peb yuav tsum ua neeg ncajncees, ua phim lub meejmom tus Tswv muab pub, paub tswj tus kheej tus cwjpwm thiab ua lubneej zoo. Nrog rau tej ntawd, yuav tsum paub txo hwjchim, ua siab mos muag, ua haum tus Tswv siab thiab paub qaij nomtswv tej kev chim.
Thov Vajtswv,
Tus Tswv, ua Koj tsaug vim Koj qhia nyuam yaus ua neej ncajncees kom tau lubneej kaj siab, zoo siab. Thov Koj pub nyuam yaus muaj tswvyim zeem paub qhov txhaum, qhov yog thiab paub tswj tus kheej tus cwjpwm. Thov pab nyuam yaus ua tau lubneej haum Koj siab thiab haum tej nomtswv siab kom nyuam yaus lubneej muaj kev kaj siab. Amees.
Peb qhia tshwm lub tswvyim licas thaum muaj plaub ntug?
Nyeem Vajluskub hauv peb lub xyoo: Exekees 40:38-41:12
Kênh Youtube BHKTHN:
