Malakaus 1:32-39
32 Thaum hnub poob qho uas yuav tsaus ntuj muaj neeg coj tej neeg uas muaj mob thiab tej neeg uas raug dab tuaj cuag Yexus. 33 Tej neeg zejzog tuaj nyob nraum qhovrooj. 34 Yexus kho txhua tus uas muaj mob zoo huv tibsi, thiab Yexus ntiab ntau tus dab tawm. Yexus tsis pub dab hais lus rau qhov dab yeej paub Yexus. 35 Hnub tom qab thaum kaj ntug txoog, Yexus txawm sawv thiab tawm hauv tsev mus rau tom ib qho chaw uas tsis muaj neeg thiab thov Vajtswv. 36 Ximoos thiab nws cov phoojywg mus nrhiav Yexus; 37 thaum lawv nrhiav tau Yexus lawm, lawv hais rau Yexus hais tias, “Muaj neeg coob coob tuaj nrhiav koj.”
- Yexus teb hais tias, “Peb yuav tsum mus txhua nrho tej zos uas nyob ibncig no, thiab kuv yuav tsum mus qhia hauv tej zos ntawd, rau qhov kuv yeej los ua tes haujlwm no.”
- Yexus txawm mus thoob plaws hauv lub xeev Kalilais, nws qhuab qhia hauv tej tsev sablaj, thiab nws ntiab ntau tus dab tawm hauv cov neeg uas raug dab mus.
Nqi cim:
Yexus teb hais tias, “Peb yuav tsum mus txhua nrho tej zos uas nyob ibncig no, thiab kuv yuav tsum mus qhia hauv tej zos ntawd, rau qhov kuv yeej los ua tes haujlwm no.” (Malakaus 1:38).
Lus nug rau sawvdaws xav:
- Cov neeg coob coob tuaj nrhiav Tswv Yexus ua dabtsi?
- Vim licas hnub tomqab, thaum kaj ntug txoog cov thwjtim mus nrhiav Tswv Yexus? Tswv Yexus teb rau lawv licas?
- Lo lus teb no qhia peb paub tes haujlwm cheemtsum ua ntawm Tswv Yexus yog dabtsi?
- Peb kawm Tswv Yexus tus qauv licas?
Cov neeg Yudais ua neej dhau ntu sijhawm zoo li qhuav qhawv sab ntsujplig nyob rau ntu 400 xyoo Vajtswv nyob ntsiag to. Cov thawjcoj sab kev ntseeg tiam ntawd ua lawv tes haujlwm zoo li tsis muaj sia thiab tsis muaj Vajtswv lub hwjchim. Thaum Tswv Yexus pib ua nws tes haujlwm tabmeeg sawvdaws, Nws tau coj ib nthwv cua tshiab tuaj ua rau cov uas mloog Nws qhia tau kev laj ntxiag sab ntsujplig, vim “Yexus tej lus qhia tseemceeb heev; nws qhia tsis thooj li cov xibhwb uas qhia Vajtswv txoj Kevcai qhia” (Malakaus 1:22). Txij nqe 23-31 sau txog ib hnub Xanpataus uas Tswv Yexus ua ntau yam haujlwm. Nws qhuab qhia hauv tsev sablaj, ntiab dab tawm hauv ib tug txivneej mus, thiab kho Petus niam tais zoo mob. Hnub Xanpataus raws li kevcai sau tseg yog hnub uas tsis tau ua ib txoj haujlwm dabtsi li, yog li ntawd cov neeg coob coob yuavtsum tos “thaum hnub poob qho uas yuav tsaus ntuj”, txhais tau hais tias dhau hnub Xanpataus lawm, ces “tej neeg zejzog tuaj nyob nraum qhovrooj” thiab coj cov neeg raug mob tuaj cuag Tswv Yexus. Cov neeg coob coob txojkev txomnyem ua rau Tswv Yexus hlub lawv heev, Nws ntiab dab thiab kho lawv tej mob txhua tus zoo huv tibsi.
Hnub tomqab, Tswv Yexus sawv ntxov los sib txuas lus nrog Vaj Leejtxiv. Cov thwjtim tuaj nrhiav thiab hais tias: “Muaj neeg coob coob tuaj nrhiav koj” (nqe 37). Cov “neeg coob coob” ntawd yog leejtwg? Yog cov neeg uas nyob hauv nroog
Kapena-us tuaj nrhiav Tswv Yexus kom tau kho mob zoo. Cov thwjtim xav kom Tswv Yexus rov qab mus rau hauv Petus lub tsev kho mob, ntiab dab dua, thiab thaum ntawd Tswv Yexus lub koob npe yuav nrov ncha, coob tug nyob lwm cheebtsam yuav tuaj nrhiav Tswv Yexus pab cawm, thiab Nws yuav yim hnub yim muaj koob nto npe. Lossis yog muab hloov lus hais, mas cov neeg no saib pom Tswv Yexus zoo li tus uas yuav pab tau lawv sab nqaij tawv. Tiamsis Tswv Yexus teb hais tias: “Peb yuavtsum mus txhua nrho tej zos uas nyob ibncig no, thiab kuv yuavtsum mus qhia hauv tej zos ntawd, rau qhov kuv yeej los ua tes haujlwm no” (nqe 38). Tswv Yexus hlub cov neeg coob coob thiab saib pom lawv txomnyem sab nqaij tawv, tiamsis Nws kuj paub meej lub homphiaj Nws nqis los hauv ntiajteb thiab Vaj Leejtxiv lub luag haujlwm pub rau Nws yog dabtsi. Tswv Yexus los hnav cev nqaij daim tawv tsis yog los kho mob lossis los kom muaj koob nto npe, Nws los yog los qhia Txoj Moozoo, qhia txog Vajtswv Lub Tebchaws, thiab ua kom tiav teg haujlwm cawmdim uas Leejtxiv muab cob rau Nws.
Kawm raws Tswv Yexus tus qauv, peb txhua tus yuavtsum tig los saib thiab nug tus kheej hais tias hnub no tes haujlwm cheemtsum ua ntawm kuv tus kheej, kuv tsev neeg, thiab Pawg Ntseeg yog dabtsi? Tej zaum peb muaj ntau yam haujlwm yuavtsum ua kom tiav tiamsis qhov tseemceeb tshajplaws yog txhob hnov qab hais tias peb tau cawmdim los mus ua cov timkhawv tshajtawm Txoj Moozoo.
Peb puas cia tes haujlwm tshajtawm Txoj Moozoo nyob ntawm thawj hauv peb lubneej?
Thov Vajtswv:
Vajtswv, nyob hauv lubneej uas muaj ntau ntau yam haujlwm yuavtsum ua, thov qhia nyuam yaus nco ntsoov tes haujlwm cheemtsum ua uas Koj muab cob rau nyuamyaus. Thov siv nyuamyaus coj Txoj Moozoo pub rau nyuamyaus tsev neeg thiab cov uas nyob ibncig nyuamyaus. Ameeg.
Kênh Youtube BHKTHN:
