Klei Aê Diê Blŭ: Y‑Markôs 1:32-39
Êlan kliăng: “Ñu lač kơ digơ̆, “Brei drei nao kơ ƀuôn jĕ giăm čiăng kơ kâo dưi mtô tinăn msĕ mơh; kyua kơ klei anăn yơh kâo hriê.” (Y‑Markôs 1:38).
Klei êmuh ksiêm mĭn: Ya klei phung ƀuôn sang čiăng tui duah Khua Yang Yêsu? Ya ngă aguah ưm hruê mgi phung ƀĭng kna tui duah Khua Yang? Si klei Khua Yang lŏ wĭt lač hŏng diñu? Klei wĭt lač anei hưn thâo kơ ya jing bruă tiŏ nao yuôm hĭn Khua Yang Yêsu ngă? Si drei tui ngă hlue klei Khua Yang Yêsu bi hmô?
Phung ƀuôn sang Israel găn leh wưng ênuk klei hdĭp myang thu mlu hlăm 400 thŭn Aê Diê dôk kriêp ñăt. Phung khua gĭt gai klei đăo hlăk anăn ngă bruă hŏng klei kƀah klei hdĭp leh anăn klei myang Aê Diê. Hlăk Khua Yang Yêsu dơ̆ng hưn bi êdah klă bruă Ñu, Ñu ba hriê êwa angĭn mrâo bi mdih êrâo mngăt ai tiê phung hmư̆ Ñu, kyuadah “Ñu mtô kơ digơ̆ msĕ si sa čô mâo kơhưm, amâo djŏ msĕ si phung khua čih hră ôh” (Y‑Markôs 1:22). Mơ̆ng êlan 23-31 čih wĭt kơ sa hruê Sabat Khua Yang bŏ hŏng klei gun kpăk. Ñu mtô lač ti sang bi kƀĭn, suôt yang jhat kbiă đuĕ mơ̆ng sa čô mnuih, leh anăn bi hlao klei ruă kmha mniê Y‑Pêtrôs. Hruê Sabat tui si klei bhiăn čuăn leh jing sa hruê amâo dưi ngă sa mta bruă ôh, kyuanăn phung ƀuôn sang dôk guôn tơl “Tlam anăn ti yang hruê lĕ”, tơdah jih hruê Sabat, snăn “jih jang mnuih hlăm ƀuôn anăn bi kƀĭn ti anăp ƀăng bhă” leh anăn arăng atăt ba phung ruă duam kơ Khua Yang Yêsu. Khua Yang pap ƀuh klei knap mñai phung ƀuôn sang, Ñu suôt yang jhat leh anăn bi hlao klei ruă duam kơ digơ̆.
Aguah ưm hruê mgi, Khua Yang Yêsu kgŭ ưm čiăng blŭ hrăm hŏng Ama. Phung ƀĭng kna tui duah Ñu, leh ƀuh diñu lač: “Jih jang mnuih tui duah ih.” (êlan 37). “Jih jang mnuih” čiăng lač kơ hlei pô? Jing phung dôk hlăm ƀuôn Kapernum tui duah Khua Yang Yêsu čiăng dưi bi hlao klei ruă duam diñu. Phung ƀĭng kna čiăng kơ Khua Yang Yêsu lŏ wĭt kơ sang Y‑Pêtrôs lŏ bi hlao klei ruă, suôt yang jhat, snăn klei hing kơ Ñu srăng lar kbưi, lu mnuih mơ̆ng anôk mkăn lŏ tui hriê čiăng duah klei đru bi mtlaih mơ̆ng Khua Yang, sĭt yơh hlăk anăn Ñu srăng hing ang hĭn êjai. Blŭ mdê hĭn, phung anei dlăng kơ Khua Yang Yêsu jing msĕ si sa čô kăp bi hrăp mta klei diñu čiăng hlăm asei mlei kđeh diñu. Ƀiădah Khua Yang Yêsu wĭt lač kơ diñu: “Brei drei nao kơ ƀuôn jĕ giăm čiăng kơ kâo dưi mtô tinăn msĕ mơh; kyua kơ klei anăn yơh kâo hriê.” (êlan 38). Khua Yang khăp kơ phung lu leh anăn ƀuh klei knap diñu hlăm asei mlei kđeh, ƀiădah Ñu ăt ƀuh mơh bruă kñăm čiăng kơ klei Ñu hriê ti lăn ala leh anăn hdră Aê Diê Ama jing. Khua Yang Yêsu trŭn hriê jing mnuih amâo djŏ kăp bi hlao klei ruă amâodah čiăng mâo klei hing ang ôh, Ñu hriê čiăng hưn Klei Mrâo Mrang Jăk, mtô kơ Ƀuôn Ala Mtao Aê Diê, leh anăn ngă hdră bruă bi mtlaih Ama jao kơ Ñu.
Tui hlue klei bi hmô mơ̆ng Khua Yang Yêsu, grăp čô drei brei lŏ dlăng wĭt leh anăn êmuh kơ drei pô snei, bruă tiŏ nao yuôm hĭn kơ kâo, kơ gŏ sang, leh anăn kơ Phung Sang Aê Diê ară anei ya jing? Năng ai drei mâo lu mta bruă čiăng ngă, mâo lu bruă klam čiăng bi leh ƀiădah bruă yuôm hĭn kơ jih jang đăm wơr ôh drei mă tŭ klei bi mtlaih pioh jing pô hiu hưn bi sĭt Klei Mrâo Mrang Jăk.
Si ngă drei dưm bruă tiŏ nao hiu hưn Klei Mrâo Mrang Jăk jing êlâo hĭn mơ̆ hlăm klei hdĭp drei?
Wah lač: Ơ Khua Yang, ti krah lu klei gun kpăk hlăm klei hdĭp, akâo Ih brei kâo hdơr nanao bruă tiŏ nao yuôm hĭn Ih jao kơ kâo. Akâo Ih yua kâo ba Klei Mrâo Mrang Jăk kơ gŏ sang leh anăn kơ phung riêng gah kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 22:29-53
Kênh Youtube BHKTHN:
