Titus 3:8-11
Nqe cim:
“Tej lus no yog tej lus uas tseemceeb. Kuv xav kom koj niaj hnub qhia tej no, cov ntseeg Vajtswv thiaj muab siab rau ua txhua yam haujlwm zoo; tej ntawd yeej zoo thiab muaj nqis rau txhua tus.” (Titus 3:8)
Lus nug rau sawvdaws xav:
– Titus yuav tsum hais hnyav txog yam dabtsi kom txhawb cov ntseeg ua tej haujlwm zoo?
– Tus ntseeg yuav tsum qaij thiab ua tej yam twg?
– Peb yuav tsum ua dabtsi thiaj tsis raug kev ntseeg cuav cuamtshuam?
Timthawj Paulus qhuab ntuas Titus yuav tsum hais hnyav txog Vajtswv Vaj Peb Leeg txojkev cawmdim uas tau Paulus qhia nyob hauv tshooj 2 thiab 3:3-7, ntawd yog tej lus uas tsimnyog ntseeg. Thaum cov ntseeg puv npo tus Tswv txojkev hlub thiab txoj koob hmoov, ces lawv yim mob siab ntseeg, muaj zog, kub siab ua tej haujlwm zoo, yog tej uas tsimnyog ua thiab muaj nqis rau lwm tus. Tej haujlwm zoo yog tej yam yoojyim ua xws li ib lo lus nug xov nug moo, ib lo lus hmov tshua, ib tes haujlwm pab lwm tus, … Nyob nrog cov neeg hauv koog povtxwv Kaletes uas pheej hais lus dag thiab tubnkeeg, tej haujlwm zoo ntawm tus ntseeg los ntawm nplooj siab hlub yuav pab tau coobleej zeem paub tus Tswv thiab tsa suab qhuas Nws. Tswv Yexus qhia hais tias: “nej yuav tsum ci rau sawvdaws pom tej haujlwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceebtsheej” (Mathais 5:16).
Nyob hauv Titus thiab cov ntseeg kev ua neej thiab kev hais lus, yuav tsum “txhob nrog leejtwg sib cav txog tej zaj uas tsis muaj hauvpaus hauvntsis, sib cav hais txog cov yawgkoob tej npe uas muaj nyob hauv ntawv thiab sib cav hais txog Vajtswv txoj kevcai. Qhov uas ib tug pheej nrog ib tug sib cav sib ceg, qhov ntawd tsis tseemceeb thiab tsis muaj qabhau dabtsi li” (nqe 9). Tej zaug ntawd yuav yog tej zaj sibcav tsis muaj qabhau, tsis muaj nqis, lossis siv cov yawgkoob tej npe los sibcav txog Vajtswv tej kevcai, siv txoj kevcai los quabyuam cov ntseeg, ntawd yog tej yam tsis muaj nqis thiab ua teebmeem rau cov ntseeg txojkev ntseeg. Cov neeg ua li ntawd yog tej xibhwb cuav, yog tej tshis hnav tawv yaj nkag los hauv Pawg Ntseeg coj tus Tswv pab yaj mus yuamkev.
Yog li ntawd thaum hais txog kev ntseeg cuav, Timthawj Paulus thiaj qhuab ntuas hais tias, “Koj yuav tsum ntuas tus uas pheej ua rau sawvdaws tsis sib haum, yog koj ntuas nws ob peb zaug, nws pheej tsis mloog, ces koj tsis txhob quav ntsej nws li lawm” (nqe 10). Txawm lawv yuav yog cov ntseeg ntev lub xyoo, muab tus kheej hu ua “cevlus” lossis “xibhwb”,… los yog hais tias mus raws kev ntseeg cuav, faib pab faib pawg ua rau tsis sib haum, qhia tej lus yuamkev txog kev ntseeg tus Tswv, coj cov ntseeg mus cia siab rau txoj kevcai,… ces thaum qhuab ntuas ob peb zaug kom lawv tig rov los, tiamsis lawv pheej tsis pauv hloov, ces yuav tsum txiav tu nrho tsis txhob quavntsej txog lawv lawm, raws li Timthawj Paulus hais tias: “Rau qhov koj twb paub lawm hais tias tus neeg uas ua li ntawd nws yog tus uas ua phem kawg li, thiab nws tej kev txhaum yeej qhia tau hais tias nws yog tus uas ua txhaum” (nqe 11).
Niaj hnub nimno, kev ntseeg cuav tuaj haub ntxias cov ntseeg yog yam uas tshwm muaj ntau heev, lawv nkag los hauv Pawg Ntseeg, ua rau tus Tswv cov menyuam raug kev puastsuaj. Peb ntseeg thiab cia siab rau tus Tswv txoj koob hmoov hlub cawmdim, npaj txhij ua tej haujlwm zoo, qaij deb tej zaj sibcav tsis muaj nqis thiab yuav tsum muaj kev feeb meej, txiav tu nrho nrog kev ntseeg cuav. Tshaj txhua yam, yuav tsum nyeem thiab kawm Vajluskub kom paub tseeb tej uas tus Tswv qhia.
Thov Vajtswv,
Tus Tswv uas hlub tshua, nyuam yaus ua Koj tsaug vim txoj koob hmoov hlub uas Koj pub. Thov pab nyuam yaus hlub Koj, npaj txhij ua tej haujlwm zoo, qaij deb tej kev sibcav tsis muaj nqis thiab tsis npog kev ntseeg cuav. Nyuam yaus tuav Yexus Khetos lub npe thov, Amees.
Peb yuav tsum ua dabtsi thaum txais tau txojkev cawmdim tus Tswv pub?
Nyeem Vajluskub hauv peb lub xyoos: II Vajntxwv 22
Kênh Youtube BHKTHN:
