Klei Aê Diê Blŭ: Y-Tit 3:8-11
Êlan kliăng: “Klei blŭ anăn jing sĭt. Kâo čiăng kơ ih mtă bi sĭt kơ klei anăn, čiăng kơ phung đăo leh kơ Aê Diê srăng pioh jih ai tiê ngă bruă jăk. Klei anăn jăk snăk leh anăn yuôm kơ mnuih.” (Y-Tit 3:8)
Klei êmuh ksiêm mĭn: Ya klei brei Y-Tit mñă čiăng mđĭ ai phung đăo ngă bruă jăk? Ya klei brei phung đăo ñĕ leh anăn brei ngă? Ya klei brei drei ngă čiăng amâo hmăi ôh mơ̆ng klei đăo soh?
Khua ƀĭng kna Y-Pôl mñă kơ Y-Tit brei mñă kơ klei Aê Diê Tlâo Čô Yang bi mtlaih mâo ñu bi êdah hlăm Y-Tit kdrêč 2 leh anăn 3:3-7 jing klei năng đăo. Tơdah ai tiê phung đăo bŏ hŏng klei khăp leh anăn klei pap Aê Diê, diñu ƀrư̆ kjăp klei đăo, ktang, hur har mă bruă jăk jing klei djŏ klă leh anăn klei tŭ dưn kơ grăp čô mnuih. Dŭm bruă jăk năng ai jing sa klei êmuh hrăm, sa klei mđing uêñ, sa klei đru… Hdĭp ti krah phung ƀuôn sang plao êa Kret kƀah klei sĭt leh anăn alah, bruă jăk phung đăo kơ Krist ngă hŏng ai tiê klei khăp srăng đru kơ lu mnuih thâo kral Aê Diê leh anăn hơêč hmưi Ñu. Khua Yang Yêsu mtô: “Msĕ mơh brei klei mngač diih mtrang ti anăp mnuih, čiăng kơ diñu dưi ƀuh bruă jăk diih ngă leh anăn diñu mpŭ mni kơ Ama diih hlăm adiê” (Y-Mathiơ 5:16).
Hlăm knuih hdĭp leh anăn klei Y-Tit ngă ăt msĕ si grăp čô phung đăo, “brei đuĕ mơ̆ng klei bi tăng mluk, klei răk anăn phung aê, klei bi msao, leh anăn klei bi tăng kơ klei bhiăn, kyuadah klei anăn amâo yuôm ôh leh anăn hơăi mang” (êlan 9). Anăn jing klei bi tăng mgăl hơăi mang, mluk amâodah yua klei kơ djuê ana mjing tur kơ klei mtô klei đăo, yua klei bhiăn čiăng mtô phung đăo, jing klei amâo mâo yuôm ôh leh anăn ngă jhat kơ klei đăo phung đăo. Anei jing phung mtô soh, phung mgưt mŭt hlăm Sang Aê Diê čiăng atăt phung biăp Aê Diê nao hlăm soh čhuai.
Kyua anăn hŏng klei đăo soh, Khua ƀĭng kna Y-Pôl mtă, “Bi kơ mnuih duah klei bi kah phung, leh ih ƀuah ñu bliư̆ tal sa, leh anăn bliư̆ tal dua, đăm lŏ bi mguôp hŏng ñu ôh” (êlan 10). Wăt tơdah diñu jing phung đăo sui thŭn, diñu tuôm lač jing “khua pô hưn êlâo” amâodah “pô ksiêm hriăm”… ƀiădah hlue leh klei đăo soh, ngă bi kah phung, mtô kơ klei mĭn soh kơ klei đăo sĭt nik kơ Krist, ktŭng phung đăo knang kơ klei bhiăn…, tơdah sa, dua blư̆ hưn brei răng leh, mtă kơ diñu lŏ wĭt hŏng Khua Yang ƀiădah diñu ăt kăn bi mlih mơh, snăn brei khut khat amâo bi mguôp ôh hŏng diñu, “kyuadah ih thâo leh mnuih msĕ snăn jing klah đuĕ leh, leh anăn soh, ñu mă tŭ klei phat kđi ñu pô” (êlan 11).
Hruê anei, phung hlue klei đăo soh ktŭng lu snăk phung đăo, diñu mŭt hlăm Phung Sang Aê Diê čiăng ngă jhat kơ phung ƀuôn sang Aê Diê. Drei đăo knang kluôm dhuôm hlăm klei pap, klei bi mtlaih Aê Diê, srăng ngă bruă jăk, ñĕ kbưi kơ klei bi mgăl hơăi mang leh anăn mâo knuih klă mngač, khut khat hŏng klei đăo soh. Êlâo hĭn kơ jih jang, brei dlăng leh anăn hriăm Klei Aê Diê Blŭ čiăng thâo kjăp klei Aê Diê mtô.
Ya klei brei drei ngă tơdah mâo leh klei pap bi mtlaih Aê Diê brei?
Wah lač: Ơ Aê Diê Pô khăp, kâo bi mni kơ Ih kyua klei pap bi mtlaih Ih brei leh kơ kâo. Akâo kơ Ih đru kâo khăp kơ Ih, srăng ngă bruă jăk, ñĕ kơ klei bi mgăl hơăi mang leh anăn amâo mgang ôh kơ klei đăo soh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
