II Kauleethaus 1:15-24
Nqe cim:
“Vajtswv yog tus ncaj ncees, tej lus uas kuv hais rau nej tsis yog tej lus uas hais tias, “Ua, ua,” tiamsis ho “Tsis ua” (II Kauleethaus 1:18 Phau Txhais Qub).
Peb kuj nyeem ntxiv nyob hauv Phau Txhais Tshiab:
“Muaj Vajtswv uas tso siab tau pom, tej lus uas peb hais rau nej tsis muaj lo uas hais tias “Yog” thiab “Tsis yog” ua ke.”.
Lus nug rau sawvdaws xav:
- Vim licas Timthawj Paulus tsis tau mus xyuas Pawg Ntseeg hauv nroog Kauleethaus li nws tau coglus?
- Nws siv dabtsi los ua timkhawv rau nws tej lus hais?
- Peb kawm tau yam dabtsi rau peb tus kheej dhau los ntawm Timthawj Paulus tej lus qhia no?
Ib tsoom cov uas mloog txhua tus,
Nyob rau hauv thawj tsab ntawv uas Timthawj Paulus xa mus rau cov ntseeg nyob hauv lub nroog Kauleethaus, nws tau hais tias nws yuav tuaj xyuas lawv (I Kauleethaus 16:5), tiamsis txog tav no, Paulus tseem tsis tau mus txog hauv nroog Kauleethaus li nws tau hais, tiamsis nws sau tsab ntawv tim ob xa tuaj rau lawv, yog li ntawd muaj ntau tus neeg phem thiaj muab qhov no los hais phem hais tias Paulus tsis tseeb, tsis ua raws li nws tej lus nws hais. Timthawj Paulus qhia rau cov ntseeg paub hais tias nws yeej npaj siab yuav tuaj mus pem Makedaunias, tomqab ntawd nws yuav rov qab los xyuas lawv (nqe 16). Qhov uas nws tsis tau tuaj ntawd tsis yog vim nws ntshai, kuj tsis yog vim nws tsuas ua raws li tus kheej lub siab xav zaug tuaj zaug tsis tuaj, tiamsis yog vim nws hlub lawv, tsis xav nqa nplawm tuaj cuag lawv yog li ntawd nws thiaj hloov siab tsis tau tuaj saib lawv li tau hais tseg (nqe 23; I Kauleethaus 4:21).
Timthawj Paulus hais khov kho hais tias Txojmoo Zoo uas nws qhia rau lawv yog txoj uas tseeb, txhua yam uas Vajtswv Txojlus hais tseg puavleej muaj tiav nyob hauv Tswv Yexus Khetos, ces Paulus nrog rau Xilas thiab Timautes uas yog cov uas ua Vajtswv haujlwm thiab qhia Txojmoo Zoo ntawd kuj yog cov uas hais lus tseeb thiab yeej yuav ua raws li tej uas lawv hais, Paulus hais tias: “…tej lus uas kuv hais rau nej tsis yog tej lus uas hais tias, “Ua, ua,” tiamsis ho “Tsis ua.”” (nqe 18b, 19). Timthawj Paulus kuj hais meej ntxiv hais tias Vajtswv yog Tus uas ua rau Paulus thiab cov ntseeg hauv Kauleethaus muaj txojkev ntseeg ruaj khov rau ntawm Tswv Yexus thiab Nws kuj nias cim rau peb txhua tus thiab pub Vaj Ntsujplig rau peb, yog li ntawd txhua tus uas yog tus Tswv tug puavleej muaj tus cwjpwm zoo li Vajtswv thaum sawvdaws hais tias “Amees” txog tej uas tus Cawmseej tau ua rau peb, dhau qhov ntawd peb ua tau rau Vajtswv tau koobmeej los ntawm peb tej lus hais (nqe 20-22).
Thaum qhia txog tsis txhob twv ntuj twv teb, Tswv Yexus hais tias: “Qhov uas yog, nej cia li hais tias, ‘Yog’ qhov uas tsis yog, nej cia li hais tias, ‘Tsis yog.’ Yog nej hais tshaj ob lo lus ntawd, ces tej lus ntawd yog los ntawm dab Ntxwgnyoog los xwb.” (Mathais 5:37). Peb yog Vajtswv Tus uas muaj kev hlub thiab ncajncees cov menyuam, peb yuav tsum ceevfaj txhua lo lus uas peb hais, tsis hais thaum peb hais rau peb cov me nyuam lossis rau cov uas yau dua peb. Tej uas peb hais tias muaj, ces yuav tsum muaj tiag, yog hais tias tsis muaj ces yuav tsum tsis muaj tiag, yuavtsum ncajncees thiab hais tseeb thaum sib tham lus ua ke kom xwv tej lus uas peb hais tsis yog tsuas ua tau rau Vajtswv tau koobmeej xwb, tseem ua tau rau lwm tus ntseeg tau peb thiab ua rau lwm tus tau txhawb zog thiab.
Thov Vajtswv,
Vajtswv, Koj yog tus uas niaj hnub ua raws li Koj tej lus cogtseg, nyuam yaus ua Koj tsaug uas nyuam yaus tau nyob hauv Koj, los ntawm qhov uas Vaj Ntsujplig nias cim, thov Koj qhia nyuam yaus paub vamkhom Koj lub hwjchim kom nyuam yaus paub hais tej lus zoo thiab ua rau Koj tau koobmeej dhau los ntawm nyuam yaus tej lus hais. Amees.
Ib tsoom cov uas mloog hmov thiab tshua,
Peb yog Vajtswv Tus uas ncajncees cov menyuam, peb yuav tsum ceevfaj peb tej lus hais licas?
Nyeem Vajluskub hauv peb lub xyoo: Yauj 33
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
