I.Petus 2:9-10
Nqe cim:
“Tiamsis nej yog haivneeg uas Vajtswv tawb xaiv cia lawm, nej yog cov povthawj uas ua Vajtswv txoj haujlwm, nej yog haivneeg uas dawbhuv. Thiab nej yog Vajtswv haivneeg uas Vajtswv yuav txib mus qhia tej haujlwm tseemceeb uas Vajtswv tau ua los lawm rau sawvdaws paub. Vajtswv yog tus uas hu nej tawm hauv qhov tsaus ntuj los nyob hauv qhov pom kev.” (I.Petus 2:9).
Lus nug rau sawvdaws xav:
- Ib tug neeg lub neej ua ntej thiab tomqab uas ntseeg Tswv Yexus lawm zoo licas?
- Lub homphiaj Vajtswv pub kev cawmdim rau tibneeg yog dabtsi?
- Peb zeem paub dabtsi txog kev tseemceeb ntawm txojkev cawmdim thiab yuav tsum ua dabtsi thiaj ua tiav lub homphiaj ntawm peb lubneej?
Phau I.Petus tau sau pub rau cov ntseeg uas raug tawg mus txhua qhov txhia chaw nyob hauv cheebtsam Axias Me, lawv tabtom raug tsimtxom hnyav heev nyob rau tiam uas Huabtais Nelaus kav tebchaws Loos. Tej zaum muaj ib txhia ntseeg tabtom tso kev ntseeg tseg vim muaj ntau kev sim siab los raug lawv thiab lawv txojsia raug hem txhua hnub. Tiamsis nyob hauv no, Timthawj Petus txhawb lawv lub zog hais tias qhov uas lawv raug tsimtxom vim txojkev ntseeg twb yog vim lawv tau txais txojkev cawmdim lawm, ntawd yog txoj koobhmoov loj kawg nkaus uas lawv tau txais. Yog tsis tau txais txojkev cawmdim, ces lawv yuav tsis muaj ib qho kev cia siab dabtsi li, rau qhov lawv tsis yog Vajtswv haivneeg thiab tsis tau txais Vajtswv txojkev hlub (nqe 10). Thiab yog zoo li ntawd, ces lawv yeej yuav raug Vajtswv txojkev txiav txim uas txaus ntshai kawg nkaus lawm xwb (Loos 5:8-9).
Txojkev cawmdim uas peb tau txais yog ib txoj koobhmoov, ib txojkev pub dawb, vim ntawd yog Vajtswv txojkev “xaiv” raws li Nws txoj koobhmoov thiab Nws txojkev hlub. Kev cawmdim coj peb los rau ib qhov chaw nyob tshiab thaum Vajtswv hloov peb hauv “qhov tsaus ntuj” los nyob hauv “qhov pom kev”, hloov peb ntawm lwm haivneeg uas tsis yog “haivneeg dawbhuv” los ua “Vajtswv haivneeg”, thiab peb tau txais ib lub meejmom tshiab, uas yog tau ua “cov povthawj uas ua Vajtswv txoj haujlwm” (nqe 9).
Thaum ib tug neeg tau txais kev cawmdim ces tsis yog txhua yam xaus li ntawd xwb, vim txojkev cawmdim tseem coj peb los rau ib lub homphiaj tshiab nyob hauv kev ua neej, ntawd yog “qhia tej haujlwm tseemceeb uas Vajtswv tau ua los lawm rau sawvdaws paub.” Txhais tau hais tias, yog qhia txog Vajtswv tej txujci tseemceeb, tej kev ua zoo, lossis qhia Vajtswv txojkev hlub pub rau lwm tus. Peb tau cawmdim los ua cov uas pehawm Vajtswv thiab qhuas txog Nws lub hwjchim uas loj kawg nkaus nrog rau nws txojkev hlub uas xav tsis thoob. Vim li ntawd, yog peb tseem tsis tau saib kev pehawm yog lub homphiaj kawg ntawm txojkev cawmdim ces peb tabtom raug poob feem uas zoo kawg nkaus nyob hauv txojkev cawmdim. Qhov twg muaj kev zoo siab pehawm Vajtswv, qhov ntawd muaj koobhmoov ntau tshajplaws, muaj kev sib raug zoo ntau tshajplaws, thiab yog qhov chaw uas muaj txaus nkaus txhua yam tiag tiag. Kev cawmdim yuav tsis muaj tiav mus txog thaum uas peb qhuas Vajtswv txojkev hlub txhua hnub los ntawm lub siab tsis paub nkees thiab tawm hauv nruab siab tuaj tiag tiag. Peb tau txhiv los ntawm tus nqi kim heev yog los ua tiav lub homphiaj no.
Peb puas tau zeem paub hais tias peb tau cawmdim yog los pehawm Vajtswv?
Thov Vajtswv:
Tus Tswv, nyuam yaus ua Koj tsaug vim txojkev cawmdim uas Koj pub rau nyuam yaus. Nyuam yaus thov txhos caug tabmeeg Koj, qhuas thiab txhawb nqa Koj lub Npe uas Dawbhuv. Thov siv nyuam yaus lubneej thiab nyuam yaus tej lus qhuas Koj los mus tshajtawm Koj txojkev hlub uas loj kawg nkaus pub rau lwm tus. Amees.
Nyeem Vajluskub hauv peb lub xyoo: I.Xwmtxheej Vajntxwv 3:17-4:23
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
