Klei Aê Diê Blŭ: I Y‑Pêtrôs 2:9-10
Êlan kliăng: “Ƀiădah diih jing sa phung găp djuê Aê Diê ruah leh, phung khua ngă yang kơ mtao, sa phung găp djuê doh jăk, phung ƀuôn sang Aê Diê pô, čiăng kơ diih dưi hưn bruă yuôm bhăn Pô iêu leh diih kbiă mơ̆ng klei mmăt truh kơ klei mngač yuôm bhăn Ñu” (I Y‑Pêtrôs 2:9).
Klei êmuh ksiêm mĭn: Si ngă klei jing sa čô mnuih hlăk êlâo leh anăn êdei kơ leh đăo kơ Khua Yang Yêsu? Ya klei Aê Diê kñăm čiăng brei klei bi mtlaih kơ sa čô mnuih? Si ngă drei thâo kral kơ klei yuôm klei bi mtlaih leh anăn ya drei ngă čiăng dưi bi leh bruă klei kñăm čiăng kơ klei hdĭp drei?
Hră I Y‑Pêtrôs čih mơĭt kơ phung đăo bra đuĕ tar čar Asi dôk tŭ klei arăng ngă jhat ktang tĭt hlăm ênuk mtao Nêrô kiă kriê. Năng ai mâo leh đa đa phung đăo kdŭn wĭt mtluôn kyua klei lông dlăng djăp mta jŭm dar leh anăn klei hdĭp digơ̆ dôk hlăm klei arưp aram grăp hruê. Ƀiădah tinei, khua ƀĭng kna Y‑Pêtrôs bi mđĭ ai digơ̆ snei, phŭn knhal klei arăng ngă jhat kơ klei đăo kyuadah digơ̆ mâo leh klei bi mtlaih, anăn yơh jing klei pap prŏng hĭn digơ̆ dưi mă tŭ. Tơdah amâo mâo klei bi mtlaih, mngăt digơ̆ amâo srăng mâo sa mta klei čang hmăng ôh kyuadah digơ̆ amâo jing phung ƀuôn sang Aê Diê ôh leh anăn amâo dưi mâo klei pap brei ôh (êlan 10). Leh anăn snăn yơh, digơ̆ srăng dôk ti gŭ klei ngêñ huĭ mduĭ êdi (Rôm 5:8-9).
Klei bi mtlaih drei mă tŭ jing sa klei pap, sa klei brei, kyuadah klei anăn jing klei Aê Diê “ruah leh” tui si klei Aê Diê pap leh anăn klei khăp Ñu kơ drei. Klei bi mtlaih ba leh kơ drei sa klei mjing mrâo hlăk drei kbiă mơ̆ng “klei mmăt” truh kơ “klei mngač yuôm bhăn”, dơ̆ng mơ̆ng sa čô tue amâo mâo dôk hlăm “sa phung găp djuê doh jăk” ôh, dưi jing “phung ƀuôn sang Aê Diê pô”, leh anăn brei kơ drei sa anôk bruă mrâo, dưi jing “phung khua ngă yang kơ mtao” (êlan 9).
Tơdah sa čô mă tŭ leh klei bi mtlaih amâo djŏ ôh djăp mta klei jing ênŭm djăp leh, kyuadah klei bi mtlaih ba kơ drei sa klei kñăm čiăng mrâo hlăm klei hdĭp, anăn jing klei “hưn bruă yuôm bhăn” Aê Diê. “Hưn bruă yuôm bhăn” čiăng lač kơ klei hưn bi lar jih bruă yuôm bhăn, klei jăk siam, amâodah hưn klei khăp klei pap Aê Diê. Drei mâo klei bi mtlaih pioh čiăng mjing drei phung kkuh mpŭ kơ Aê Diê leh anăn mpŭ mni kơ klei pap prŏng prĭn yuôm bhăn Ñu. Kyuanăn, tơdah drei ka tuôm dlăng ôh klei kkuh mpŭ kơ Aê Diê jing klei kñăm čiăng knhal tuč kơ klei bi mtlaih, snăn drei adôk lui hĕ leh klei jăk hĭn mơ̆ng klei bi mtlaih. Anôk klei kkuh mpŭ hơ̆k mơak jing anôk klei jăk jĭn prŏng hĭn, jing anôk mâo klei bi mguôp lu mta hĭn, leh anăn jing anôk mâo klei mơak mơai sĭt. Klei bi mtlaih amâo srăng bi leh ênŭm ôh tơl hlăk drei mmuñ bi mni kơ Aê Diê kyua klei khăp klei pap Ñu grăp hruê, hŏng ai tiê khăp čiăng leh anăn sĭt êmĭt. Drei mâo klei bi tui leh hŏng ênoh yuôm snăk kyua kơ klei kñăm čiăng anei.
Si ngă drei thâo mơ̆ drei mâo klei bi mtlaih pioh kơ klei kkuh mpŭ kơ Aê Diê?
Wah lač: Ơ Khua Yang, kâo bi mni kơ Ih brei klei bi mtlaih kơ kâo. Kâo đup gưt kơ Khua Yang kluôm dhuôm čiăng mpŭ mni hơêč hmưi kơ Anăn Doh Jăk Ih. Akâo kơ Ih yua klei hdĭp kâo leh anăn klei kâo mmuñ mpŭ mni kơ Khua Yang čiăng hưn klei pap prŏng Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 3:17 – 4:23
Kênh Youtube BHKTHN:
