Mathiơ 19:21-22
“Iĕm athei adrin mơ̆t trong ‘măng iĕ mă năm tơ anih arih ling lang. Trong ‘măng tih mơ̆t ‘bônh ră, mă-lei năm tơ dơnâu ŭnh ‘Bok Kei-Dei phak, kư̆m lơ bơngai năm trong noh.” (Mathiơ 7:13)
Nơ̆r jet tơchĕng pơwao:
– Kră Yang Yêsu athei bơngai mơdrŏng pơthim tơdrong kiơ? Yua kơ kiơ?
– Yua kơ tơdrong kiơ bơngai mơdrŏng sơngah păng sơ’ngon na wih tơnai?
– Lu bơ̆n thoi yơ hăm tơdrong Kră Yang đei khan kơ lu bơ̆n?
Đơ̆ng rŏng kơ bơngai mơdrŏng âu khan hăm Kră Yang sư đei pơm dôm tơdrong kiơ̆ kơ khôi juăt, Kră Yang Yêsu thei, “…“Dah ih wă kiơ̆ tôm tơdrong ‘Bok Kei-Dei pơkă lei ih athei tĕch đĭ mŭk tơmam ih chă asong kơ lu bơngai dơnuh hin, na kiơ̆ hloi Inh. Thoi noh na ih gô đei mŭk tơmam tơ kơpal plĕnh ti ning-mônh.” (trong 21). ‘nâu ưh kơ trŏ tơdrong pơlong lăng ôh nâu tơdrong tơpă yua kơ Kră Yang Yêsu ‘mêm kơ bơngai mơdrŏng âu tơpă, “Kră Yang Yêsu lăng bơngai ‘noh sư ‘mêm dêh…” (Markôs 10:21). Kră Yang Yêsu wă tơgŭm sư băt kơ dih đei tơdrong yoch wă kơ sư tơbral kơ dih tơdrong yoch na đei tơdrong arih ling lang. tơdrong hơnat kơ bơngai mơdrŏng âu noh jơ̆ sư hưch ham dêh kơ mŭk tơmam, tơdrong hơnat kơ bơngai ‘mêm kơ mŭk tơmam noh jơ̆ “asong ăn kơ bơngai nai”. Hăm bơngai mơdrŏng âu “tơdrong arih ling lang” noh jơ̆ tơdrong pơthim đĕch ưh kơ tơdrong kăl hloh păng hơdrol na sư ưh kơ wă hŭt đĭ dôm mŭk tơmam wă iŏk tơdrong gĭt kăl hloh. Sư chu hŭt “tơdrong arih ling lang” na sư ưh kơ hŭt lê̆ mŭk tơmam mă sư gĭt kăl ‘noh, sư âu ‘mêm kơ tơdrong mă đei ƀôh păng măt đĕch. Thoi noh, “ Lăp bơngai tơdăm ei kơtơ̆ng thoi noh sư sơ’ngon dêh yua kơ sư mơdrŏng tơpă. Đơ̆ng noh na sư brŏk hloi.” (trong 22).
Dang ei, kơ plah bơ̆n mơ̆ng nơ̆r Kră Yang ‘Bok Kei-Dei, lu bơ̆n đei nơ̆r ‘Bok Kei-Dei tơ ƀôh kơ bơ̆n tơdrong mă ưh kơ ‘lơ̆ng, tơdrong yoch, tơdrong rơdu rơmơ̆n, tơdrong yoch oei ôn hlơp…lu bơ̆n thoi yơ hăm tơdrong mă ‘Bok Kei-Dei tơ ƀlŏk kơ bơ̆n? lu bơ̆n hăm đei blĕk klai yua kơ nơ̆r Kră Yang đei tơƀôh kơ bơ̆n? athei băt kơ Kră Yang ‘mêm kơ bơ̆n dêh na sư tơƀôh kơ bơ̆n wă kơ bơ̆n đei dŏng pơklaih na sư tơƀlŏk kơ bơ̆n, “ Yua kơ Kră Yang teh bơtho bơngai bu mă Sư ‘mêm, Thoi ‘bă teh bơtho kon sư ‘mêm” (Pơđơ̆k 3:12)
Tơdrong kiơ đei pơgăn bơ̆n pơm kơ bơ̆n ưh kơ hơchăng tôm tơdrong na kiơ̆ Kră Yang? Yua kơ jơhngơ̆m ‘mêm kơ mŭk tơmam na bơngai mơdrŏng âu sơngah kơ tơdrong arih ling lang, dang ei phŏ kơnh lăm tơdrong gơ̆p ư-ang, jang tih tơdrong lơi yua kơ bơ̆n pơgăn bơ̆n kiơ̆ Kră Yang. Lu bơ̆n kăl kơ băt tơdrong dŏng pơklaih noh jơ̆ gĭt kăl hloh kơ đĭ đăng na hoei kơ hŭt lê̆ na kiơ̆ dôm tơdrong ưh kơ yua lăm teh đak âu. Bơngai mơdrŏng âu chă Kră Yang Yêsu păng wih brŏk sơ’ngon hloh kơ hơdrol, lu bơ̆n đunh sơnăm lăm hnam akŭm mă lei tơdrong arih gah bơhngol bơ̆n hăm đei rai wơ̆ ‘lŏ, jê̆ ‘Bok Kei-Dei, hlôh băt kơ tơdrong Kră Yang wă păng bơ̆jang kơ sư lei mă nhen thoi bơngai mơdrŏng âu sơ̆?
Ơ Kră Yang, Inh bơnê kơ Ih yua kơ inh băt kơ Ih păng lui sơng iŏk Ih, apinh ih tơgŭm inh băt gĭt kơ gĭt kơ tơdrong dŏng pơklaih hăm tơdrong arih ling lang mă Ih đei ăn bơih kơ inh wă kơ inh hoei kơ hưch hanh kơ dôm mŭk tơmam lăm teh đak âu na adrin kiơ̆ Ih đĭ chăkl arih. Yua anăn Kră Yang Yêsu Krist, Amen.
Lu bơ̆n đei tơdrong tơchĕng sơng iŏk lei mă sơngah kơ tơdrong Kră Yang Yêsu đei bơtho?
Đŏk Sơ̆p Hla bơar ‘Bok Kei-Dei lăm pêng sơnăm: Luka 17
Kênh Youtube BHKTHN:
