II Kevcai 27:1-10
Nqe cim:
“Mauxes thiab cov txwjlaug hais rau cov Yixalayees hais tias: Nej yuav tsum ua raws li tus TSWV txoj kevcai uas hnub no kuv qhia rau nej lawm” (II Kevcai 27:1).
Lus nug rau sawvdaws xav:
– Vajtswv samhwm Nws haivneeg yuav tsum ua tej yam dabtsi thaum hla tus dej Yauladees?
– Lub ntsiab ntawm tej kevcai ntawd yog dabtsi?
– Yuav ua licas peb kev pehawm tus Tswv thiaj muaj qabhau?
Mauxes thiab cov txwjlaug qhia tej kevcai tseemceeb rau cov Yixalayees kom lawv yuav tsum ua raws thaum hla tus dej Yauladees. Qhov xubthawj, tus Tswv haivneeg yuav tsum muab tej lub pobzeb loj los teeb, thiab muab hmoov sib leem rau txhua lub, thiab muab tej kevcai los sau rau ntawm cov pobzeb ntawd. Tej pobzeb uas muab teeb thoob plaws tebchaws Kana-as yuav zoo li tus Tswv tej lus qhia Nws haivneeg hais tias yog tsis muaj Vajtswv lub hwjchim, ces lawv yuav tsis tshwmsim thiab tau nyob hauv lub tebchaws no. Tshaj ntawd, tej no kuj yog ua qhia txog tus Tswv tej lus cogtseg, nyob ntawd muaj nqe uas samhwm kom tus Tswv haivneeg yuav tsum ua neej raws li Nws tej kevcai.
Ib rooj kevcai uas tseemceeb ntxiv yog cov Yixalayees yuav tsum teeb ib lub thaj thiab muab tej khoom hlawv fij rau tus Tswv. Qhov no yuav pab tus Tswv haivneeg pib ib lubneej tshiab hauv lub tebchaws uas av rog thiab zoo qoob los ntawm tus cwjpwm cia kev pehawm tus Tswv yog yam tseemceeb xubthawj hauv lubneej. Tshaj ntawd, tej khoom fij tau fij tagnrho rau Vajtswv, muaj lub ntsiab qhia hais tias tsuas yog tus Tswv xwb thiaj tsimnyog tau yam zoo kawg nkaus.
Tsis tas li ntawd xwb, tus Tswv haivneeg kuj yuav tsum fij tej khoom ua kev sib raug zoo, yog tej khoom uas tau muab faib ib feem hlawv fij rau saum lub thaj thiab ib feem tseg rau cov neeg ibncig tau noj ua kev zoo siab tabmeeg tus Tswv. Qhov no qhia pom hais tias nyob hauv kev pehawm, tus Tswv haivneeg yuav tsum qhia tshwm nplooj siab hwm tus Tswv thiab kuj yuav tsum qhia tshwm kev hlub cov neeg ibncig. Hais tau hais tias, tej kevcai ntawm no yog tej uas siv los qhuab qhia tus Tswv haivneeg yuav tsum ua lubneej licas rau tus Tswv thiab rau lwm tus.
Thaum totaub lub ntsiab ntawm tej kevcai hauv kev pehawm tus Tswv, peb yuav tsis saib tej ntawd tsuas yog tej kevcai ntseeg qhuav qhawv, ua raws li kev li cai, ua kom tas yus feemxyuam. Tiamsis, peb yuav pom txog tus Tswv kev qhuab qhia rau txhua tus, pom txog tes haujlwm thiab feemxyuam uas tus kheej yuav tsum ua rau tus Tswv thiab lwm tus nyob hauv kev pehawm. Ntau tus ntseeg Yexus yeej tsis paub tseeb lub ntsiab ntawm Kevcai Raus Dej, Yexus Rooj Mov, kev fij khoom, kev hu nkauj qhuas Vajtswv, kev thov Vajtswv… Yog muaj cov nyuam qhuav los ntseeg nug txog lub ntsiab ntawm tej kevcai ntawd ces lawv yuav tsis paub teb kom meej. Thaum peb tsis tau totaub lub ntsiab ntawm tej kevcai hauv Pawg Ntseeg, peb yuav tsis muaj nplooj siab ua raws kom tsimnyog. Yog li ntawd, peb yuav tsum kawm kom paub meej lub ntsiab ntawm tej uas tus kheej yuav tsum ua hauv kev pehawm, peb thiaj yuav pehawm raws li Vajtswv lub siabnyiam, thiab peb thiaj yuav txaus siab thaum los cuag Nws.
Thov Vajtswv,
Tus Tswv, thov pab nyuam yaus totaub meej lub ntsiab hauv kev pehawm Koj, kom nyuam yaus txojkev pehawm haum Koj siab thiab nyuam yaus muaj kev txaus siab thaum nrog lwm tus pehawm Koj. Nyuam yaus tuav Yexus Khetos lub npe thov, Amees.
Puas muaj yam kevcai twg hauv kev pehawm uas peb tsis tau totaub lub ntsiab?
Nyeem Vajluskub hauv peb lub xyoo: Levis Kevcai 6
Kênh Youtube BHKTHN:
