Klei Aê Diê Blŭ: Klei Mtô Mñă Klei Bhiăn 27:1-10
Êlan kliăng: “Môis leh anăn phung khua mduôn Israel mtă kơ phung ƀuôn sang, lač, “Djă pioh bĕ jih jang klei bhiăn kâo mtă kơ diih hruê anei” (Klei Mtô Mñă Klei Bhiăn 27:1)
Klei êmuh ksiêm mĭn: Ya klei Aê Diê mtă brei phung ƀuôn sang Ñu ngă tơdah leh digơ̆ găn êa krông Yurdan? Ya jing klei mblang kơ klei ngă anăn? Si ngă drei ngă čiăng kơ klei drei kkuh mpŭ kơ Aê Diê mâo klei yuôm bhăn?
Y-Môis leh anăn phung khua mduôn mtă kơ dŭm mta klei čiăng kơ phung Israel ngă tơdah leh digơ̆ găn êa krông Yurdan. Êlâo hĭn, brei digơ̆ mdơ̆ng lu boh tâo prŏng, mia hŏng čŭr leh anăn čih jih klei bhiăn ti dlông boh tâo anăn. Rup boh tâo mdơ̆ng ti čar Kanaan jing sa klei lŏ bi hdơr kơ phung ƀuôn sang Aê Diê snei, tơdah amâo mâo klei myang Aê Diê digơ̆ amâo dưi truh leh anăn mŭt dôk hlăm čar anei ôh. Êgao hĭn kơ anăn, anei ăt jing klei lŏ bi hdơr kơ klei Aê Diê bi mguôp mơh, hlăm anăn mâo mta klei mtrŭt brei phung ƀuôn sang Aê Diê hdĭp djŏ tui si klei bhiăn.
Msĕ mơh, sa bruă yuôm mkăn brei phung Israel ngă jing mdơ̆ng sa boh knưl leh anăn myơr mnơ̆ng myơr čuh kơ Aê Diê. Bruă ngă anei čiăng đru phung ƀuôn sang Aê Diê dơ̆ng kčưm kơ klei hdĭp mrâo hlăm ala čar mâo êa ksâo leh anăn êa hnuê êbeh dlai hŏng ai tiê dưm klei kkuh mpŭ kơ Aê Diê êlâo hĭn hlăm klei hdĭp digơ̆. Êgao hĭn kơ anăn, mnơ̆ng myơr čuh jing mnơ̆ng myơr kluôm ênŭm kơ Aê Diê, hŏng klei čiăng lač knŏng hjăn Aê Diê yơh jing Pô năng mă tŭ mnơ̆ng jăk hĭn.
Ti djiêo anăn, digơ̆ srăng myơr mơh mnơ̆ng ngă yang kơ klei êđăp ênang, jing mnơ̆ng myơr bi mbha sa kdrêč myơr ti dlông knưl, sa kdrêč ăt dôk srăng bi mbha kơ jih jang mnuih dôk tinăn ƀơ̆ng hŏng klei hơ̆k mơak ti anăp Aê Diê. Klei anei brei ƀuh hlăm klei kkuh mpŭ, phung ƀuôn sang Aê Diê srăng bi êdah klei huĭ mpŭ kơ Aê Diê leh anăn bi êdah klei khăp kơ phung riêng gah msĕ mơh. Dưi lač, jih jang bruă ngă tui si klei bhiăn anei mâo klei bi hriăm mjuăt prŏng snăk hlăm klei bi hriăm phung ƀuôn sang Aê Diê si srăng hdĭp hŏng Aê Diê leh anăn hŏng mnuih.
Tơdah thâo săng kơ boh yuôm hlăm grăp mta klei bhiăn hlăm klei kkuh mpŭ kơ Aê Diê, drei amâo srăng ƀuh klei anăn jing bruă ngă khăng gơ̆k tui si klei đăo, bruă ngă mă knŏng rup ti êngao brei drei ngă ôh. Ƀiădah lĕ, drei srăng ƀuh mâo klei Aê Diê bi hriăm kơ grăp čô mnuih, thâo săng kơ bruă klam brei drei ngă kơ Khua Yang leh anăn kơ mnuih hlăm klei kkuh mpŭ. Mâo lu phung đăo kơ Krist amâo thâo săng klă ôh kơ klei Ƀaptem, klei ƀơ̆ng mnăm sĭt suôr, klei myơr, klei mmuñ mpŭ mni kơ Khua Yang, klei wah lač…Tơdah mâo mnuih mrâo đăo êmuh čiăng thâo si ngă klei lŏ mblang kơ klei anăn snăn digơ̆ kĭ kơ̆ amâo thâo si ngă lŏ mblang ôh. Tơdah drei amâo thâo săng ôh klei mblang kơ klei bhiăn hlăm Phung Sang Aê Diê, snăn drei amâo srăng dưi mâo knuih ngă djŏ ôh. Kyuanăn yơh, brei drei hriăm hĕ bi nik klei mblang kơ grăp mta klei hlăm hdră drei bi kƀĭn kkuh mpŭ kơ Aê Diê čiăng dưi kkuh mpŭ kơ Aê Diê tui si klei Aê Diê čiăng leh anăn drei srăng mâo klei hơ̆k mơak tơdah hriê kơ Ñu.
Mâo mơ̆ klei bhiăn hlăm klei kkuh mpŭ drei ka thâo săng klă ôh?
Wah lač: Ơ Khua Yang, đru kâo thâo săng sĭt klei mblang kơ klei bhiăn hlăm hdră kkuh mpŭ kơ Ih, čiăng klei kâo kkuh mpŭ dưi bi mơak kơ Ih leh anăn kâo mâo klei mơak tơdah bi kƀĭn kkuh mpŭ kơ Ih mbĭt hŏng phung ayŏng amai adei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Lêwi 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
