Klei Aê Diê Blŭ: I Y-Pêtrôs 4:7-11
Êlan kliăng: “Tui si grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp, msĕ si phung dĭng buăl kiă jăk bi mbha klei Aê Diê pap.” (I Y-Pêtrôs 4:10)
Klei êmuh ksiêm mĭn: Si ngă lu mnuih khăng blŭ dŭñ dŭñ êjai bi đru hdơ̆ng găp? Ya dua êlan hdră Khua ƀĭng kna Y-Pêtrôs hưn čiăng dưi găn gao klei lông dlăng êjai mă bruă kơ Khua Yang? Hŏng mơ̆ng klei drei dưi găn gao klei dleh dlan leh anăn sĭt suôr mă bruă kơ Khua Yang amâo êgah êmăn ôh?
Khua ƀĭng kna Y-Pêtrôs hưn dua êlan hdră kơ Phung đăo kơ Krist hlăm klei mă bruă kơ Khua Yang. Êlan hdră tal êlâo hĭn brei thâo bi jum hdơ̆ng găp ƀiădah amâo blŭ dŭñ dŭñ ôh. Klei thâo kah mbha, đru mnuih mkăn năng ai jing klei ktrŏ, amâodah ƀuh arăng dôk mjhua ai tiê jăk pô, snăn drei knŏng ngă tŭ kơ leh amâodah ngă mơh ƀiădah blŭ dŭñ dŭñ êjai. Mâo dua phŭn knhal đăm drei blŭ dŭñ dŭñ ôh êjai mă bruă. Tal sa, hlăm êlan 7 Khua ƀĭng kna Y-Pêtrôs mñă, “klei knhal tuč kơ jih jang mnơ̆ng giăm truh leh” kyuanăn amâo djŏ găl ôh mkăm pioh ngăn drăp kơ pô leh anăn blŭ dŭñ dŭñ êjai đru mnuih mkăn. Tal dua, ñu brei thâo grăp čô mâo sơăi klei pap Aê Diê brei pioh “bi đru hdơ̆ng găp” (êlan 10). Ya mta mnơ̆ng drei mâo hlăm klei mă bruă jing mơ̆ng klei pap Aê Diê brei, amâo djŏ ôh mơ̆ng klei dưi drei pô. Klei kñăm kơ klei brei jing pioh mă bruă, kah mbha, rŭ mdơ̆ng. Drei knŏng jing “mnuih kiă kriê”. Klei Aê Diê Blŭ mtô hlăm êlan 10 “…msĕ si phung dĭng buăl kiă jăk bi mbha klei Aê Diê pap” amâo djŏ pô kiă kriê klei Aê Diê brei djă pioh čiăng yua kơ ñu pô leh anăn kơ mnuih hlăm sang ñu! Êlan anei čiăng lač, yua bĕ ya klei Aê Diê brei, pioh đru pô mkăn msĕ si sa čô mnuih kiă kriê jăk, thâo yua ya klei Aê Diê brei mdê mdê.
Êlan hdră tal dua jing “hlei pô blŭ, brei ñu blŭ msĕ si pô hưn Klei Aê Diê Blŭ”. Mâo đa đa mnuih, mâo klei Aê Diê brei thâo mtô mblang Klei Aê Diê Blŭ, ƀiădah amâo jhŏng mtô “msĕ si pô hưn Klei Aê Diê Blŭ” ôh. Đa đa pô mâo klei Aê Diê brei thâo mtô mblang ƀiădah amâo jhŏng mtô ôh kyuadah tuôm hŏng klei lông dlăng brei bi mơak ai tiê pô dôk hmư̆! Huĭ mtô dŭm mta klei diñu dlăng jing klei “bi êdu ai” msĕ si klei Aê Diê ƀuah mkra, klei lông dlăng, klei soh… huĭdah bi mgei hĕ klei đăo kơ phung đăo! Ƀiădah Khua Yang amâo djŏ knŏng khăp, pap brei klei soh ôh, Ñu ăt wăt phat kđi kơ jih jang mnuih. Klei Mrâo Mrang Jăk Khua Yang brei mtô mblang kluôm ênŭm amâo djŏ knŏng đa nah tĭng ôh. Pô mtô mblang brei mâo klei đăo prŏng kơh jhŏng mtô mblang “msĕ si pô hưn Klei Aê Diê Blŭ”! Khua Yang yơh jing Khua drei amâo lŏ mâo pô mkăn ôh, mnuih mă bruă brei ngă hlue si klei Khua Yang čiăng (Êphêsô 6:6; Y-Mathiơ 7:21-23).
Kyuadah amâo čiăng ôh drei mă bruă kơ Khua Yang hŏng klei kpă ênô, sĭt suôr, snăn yang jhat mjhua klei soh, klei lông dlăng, mă bruă,… ngă kơ drei êgah êmăn êdu ai. Kyuanăn, êjai mă bruă kơ Khua Yang, brei drei “mă bruă anăn hŏng klei ktang Aê Diê brei, čiăng kơ hlăm jih jang klei Aê Diê dưi mâo klei guh kơang” (êlan 11). Hŏng klei ktang Khua Yang leh anăn kyua Anăn Khua Yang jing êlan hdră đru drei dưi găn gao klei lông dlăng čiăng dưi mă bruă kơ Khua Yang tơl truh knhal tuč.
Ya êlan hdră drei mă yua čiăng dưi găn gao klei lông dlăng êjai mă bruă kơ pô mkăn hlăm êpul êya phung đăo?
Wah lač: Ơ Ama kâo khăp! Akâo Ama brei kâo hdơr nanao kâo knŏng jing pô kiă kriê klei pap Khua Yang brei, leh anăn kâo dôk mă bruă kơ Khua Yang jing Khua kâo, čiăng kơ kâo ăt dôk sĭt suôr dưi găn gao jih klei dleh dlan êjai mă bruă kơ ayŏng amai adei kâo hlăm Phung Sang Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
