I Petus 4:7-11
Nqe cim:
“Vajtswv twb pub koob hmoov rau nej txhua tus lawm, yog li ntawd nej yuav tsum siv tej koob hmoov uas nej tau ntawd kom muaj nqis rau lwm tus.” (I Petus 4:10)
Lug nug rau sawvdaws xav:
– Vim licas coob leej pheej yws thaum ua haujlwm?
– Timthawj Petus qhia txog ob txojcai twg pab kom tiv dhau kev sim siab thaum ua tus Tswv haujlwm?
– Los ntawm yam dabtsi peb thiaj tiv dhau kev khwv thiab ncaj ncees ua haujlwm tsis nkees rau tus Tswv?
Timthawj Petus hais txog ob txojcai nyob hauv cov ntseeg Yexus kev ua haujlwm. Txojcai xubthawj yog ib leeg yuav tsum txais tos ib leeg tsis txhob yws. Qhov uas sib faib, sib pab lwm tus qee zaug yuav yog ib lub nra hnyav rau peb; lossis thaum pom hais tias tus kheej raug dag noj, ces peb tsuas xav ua kom tas cai xwb lossis kuj ua tiamsis pheej yws. Muaj ob lub vimchiv tsis txhob yws thaum ua haujlwm sib pab. Thib ib, nyob hauv nqe 7 Timthawj Petus qhuab ntuas hais tias, “nimno twb yuav txog lub sijhawm uas ib puas tsav yam hauv ntiajteb no puastsuaj” yog li ntawd qhov uas khaws tej khoom nyiaj txiag tseg cia thiab yws thaum pab lwm tus yog ib qhov tsis zoo. Thib ob, Timthawj Petus qhia ntxiv hais tias Vajtswv twb pub koob hmoov rau txhua tus lawm, yog li ntawd yuav tsum “siv tej koob hmoov… ntawd kom muaj nqis rau lwm tus” (nqe 10). Tej uas peb muaj hauv kev ua haujlwm sib pab yog koob hmoov uas Vajtswv pub, tsis yog peb tus kheej lub zog. Homphiaj ntawm tej koob hmoov yog siv los sib pab, sib faib, sib txhim kho. Peb tsuas yog “tus saibxyuas” tej koob hmoov ntawd xwb. Vajtswv Txojlus qhia nyob hauv nqe 10 hais tias: “…Nej yog cov uas Vajtswv muab txhua yam kev hlub cob rau nej ua lawd” (HMOWSV), tsis tau muaj ntsiab hais tias tus tub txib tau cai khaws tej koob hmoov cia siv rau tus kheej lossis rau yus lub tsev neeg! Nqe no muaj lub ntsiab hais tias cia li siv tej koob hmoov tus Tswv pub los pab lwm tus zoo ib yam li tus tub txib uas muaj tswvyim, txawj siv Vajtswv txhua yam koob hmoov uas sib txawv.
Txojcai thib ob yog “tus uas qhia Vajtswv txojlus, nws yuav tsum qhia”. Muaj coob tug tau koob hmoov qhuab qhia tiamsis tsis kam qhia li qhia “Vajtswv Txojlus” vim txojkev xav ua haum cov mloog lub siab! Tsis kam qhia tej yam uas cov mloog xav hais tias “tsis zoo” xws li tus Tswv kev rau txim, kev sim siab, kev txhaum,… vim ntshai tsam ua rau cov mloog txojkev ntseeg yoj yees! Tiamsis tus Tswv tsis yog tsuas muaj kev hlub, kev zam txim xwb, Nws tseem rau txim rau txhua tus tej kev txhaum. Tus Tswv Txojmoo Zoo yuav tsum tau qhuab qhia txhua sab tsis yog tsuas qhia raws ib sab xwb. Tus qhia yuav tsum muaj kev ntseeg loj thiaj yuav kam qhuab qhia li qhia “Vajtswv Txojlus”. Tswv Yexus thiaj yog peb tus Tswv xwb, tsis muaj lwm tus ntxiv, tus neeg ua haujlwm rau tus Tswv yuav tsum ua raws nraim li Nws lub siabnyiam (Efexus 6:6; Mathais 7:21-23).
Vim tsis xav kom peb ua tus Tswv haujlwm zoo thiab ncaj ncees, dab Ntxwsnyoog thiaj siv tej kev txhaum, kev sim siab, kev khwv nyiaj,… los ua rau peb nkees thiab qaug zog. Vim li ntawd, leejtwg ua tus Tswv haujlwm “cia li siv lub zog uas Vajtswv pub rau nws ua, kom Vajtswv thiaj tau koob meej ntawm txhua yam hauv Yexus Khetos.” (nqe 11). Vamkhom tus Tswv thiab ua txhua yam vim tus Tswv yog tej tswvyim zoo pab peb tiv dhau tej kev sim siab kom ua tau tus Tswv tes haujlwm mus txog tom kawg.
Thov Vajtswv,
Tus Tswv uas muaj kev hlub! Thov Koj qhia rau nyuam yaus nco ntsoov hais tias nyuam yaus tsuas yog ib tug tub txib saibxyuas tej koob hmoov uas Koj pub, thiab nyuam yaus tabtom ua haujlwm rau Koj, kom nyuam yaus ncaj ncees tiv dhau tej kev khwv thaum ua haujlwm pab lwm tus hauv Pawg Ntseeg. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb tau siv txojcai twg pab tus kheej hla dhau tej kev sim siab thaum ua haujlwm pab tu lwm tus hauv Pawg Ntseeg lawm?
Nyeem Vajluskub hauv peb lub xyoos: Cov Thawjtswj 13
Kênh Youtube BHKTHN:
https://www.youtube.com/c/bhkthn
