Yakaunpaus 4:13-17
Nqe cim
“Nej twb tsis paub hais tias xyov tagkis nej txojsia yuav zoo li cas. Nej txojsia zoo li tej huab uas nyob ib pliag xwb ces twb yaj tas lawm” (Yakaunpaus 4:14).
Lus nug rau sawvdaws xav:
– Yakaunpaus hais txog qhov yuamkev twg ntawm tus neeg cim civ npaj rau nws lubneej?
– Vim licas lub sijhawm yog txoj koob hmoov tus Tswv muab pub rau tibneeg?
– Koj txiavtxim siab yuav ua dabtsi thaum paub tias sijhawm yog txoj koob hmoov?
Tsab ntawv Yakaunpaus sau rau cov Yudas kaum ob xeem uas ntseeg Yexus raug tawg mus nyob txhua qhov chaw, ceebtoom lawv txog lub ntiajteb tiam no tej kev dag ntxias. Txuas ntxiv rau tej lus qhuab ntuas, tus sau phau Yakaunpaus ceebtoom cov neeg txawj ua lagluam hais tias lawv yuav tsum paub siv tej uas tus Tswv muab pub. Lub sijhawm yog yam khoomplig muaj nqis heev uas Vajtswv muab pub rau tibneeg kom ua tawm ntau yam muaj nqis thiab tsim txiaj ntxiv. Qhov uas siv sijhawm puas muaj nqis nyob ntawm tibneeg kev faib sijhawm tsimnyog kom tau kawm ntawv, tau ua haujlwm (tsis hais kev ua Vajtswv haujlwm huv tibsi), tau noj haus, pw so, txhim kho cuabyig, qhuab qhia menyuam, ua si lam hlwb,…
Npaj ua haujlwm rau tomntej yog yam zoo. Tiamsis, Yakaunpaus ceebtoom txog ob qhov yuamkev. Thib ib, lub homphiaj tseemceeb ntawm peb lubneej yog pehawm thiab ua tus Tswv haujlwm, tsis yog nyiaj txiag. Yog tsuas nrhiav nyiaj xwb tsis nrhiav tus Tswv ces peb yuav ua poob lub zoo sijhawm. Tswv Yexus qhia hais tias: “Nej tsis txhob nrhiav tej mov uas txawj lwj, tiamsis nej yuav tsum nrhiav tej mov uas tsis txawj lwj. Neeg Leej Tub yuav muab cov mov uas cawm tau txojsia ntev dhawv mus ibtxhis rau nej” (Yauhas 6:27a).
Qhov yuamkev thib ob yog, xav hais tias yus tus kheej txawjntse thiab tseem muaj ntau sijhawm ua neej nyob los npaj tswvyim ua lagluam loj. Peb hnov qab hais tias sijhawm nyob hauv tus Tswv txhais tes, thiab muab piv rau tiam ibtxhis, ces peb lubneej tsis ntev kiag li (nqe 14). Yog xav hais tias peb lubneej tsis cheemtsum tus Tswv, ces yuav tsum ceevfaj nyob tsam yuav tsis muaj sijhawm lawm rau qhov tus Tswv muaj cuabkav hu peb tus ntsujplig rov qab kiag rau hmo no (Lukas 12:20)! Timthawj Paulus qhuab ntuas hais tias: “Nej yuav tsum siv txhua lub sijhawm kom muaj nqis, rau qhov niaj hnub no tej neeg ua phem kawg li” (Efexus 5:16). Yakaunpaus kuj qhuab ntuas peb txhob khav dhau ua rau hnov qab tus Tswv, thiab sijhawm yog txoj koob hmoov muaj nqis uas tus Tswv muab pub kom ua tau lubneej pub rau Nws.
Xaus xyoo yog zoo sijhawm rau peb los ntaus nqi rau tus kheej saib peb siv sijhawm puas muaj nqis. Cia li rov nug tus kheej hais tias: Kuv siv tej sijhawm tus Tswv pub licas lawm? Timthawj Paulus tau ntaus nqi rau tus kheej kev siv sijhawm thaum nws laus heev lawm hais tias: “Kuv twb siv zog khiav kawg kuv lub zog lawm, kuv twb khiav mus txog qhov kawg lawm. Kuv muab siab npuab Vajtswv” (II Timautes 4:7). Peb lub sijhawm ua neej nyob muaj nrim yuav xaus mus, tiamsis tes haujlwm peb ua rau tus Tswv yuav nyob mus ibtxhis. Yog li ntawd, peb tsis txhob “muab hlob thiab khavtheeb” tiamsis yuav tsum muab yus tej sijhawm cob rau tus Tswv ob txhais tes, Nws yuav qhia peb ua dabtsi kom muaj nqis rau Nws.
Thov Vajtswv
Leej Txiv hlub tshua! Nyuam yaus ua Koj tsaug vim Koj pub nyuam yaus tau txais ntau koob hmoov lub xyoo dhau los. Thov qhia nyuam yaus paub siv sijhawm muaj nqis kom nyuam yaus tsis khuvxim thaum tas sijhawm. Nyuam yaus tuav Cawmseej Yexus lub npe thov, Amees.
Lub xyoo dhau los, peb puas tau siv sijhawm tus Tswv muab pub kom muaj nqis rau Nws lawm tau?
Nyeem Vajluskub hauv peb lub xyoo: Chivkeeb 40
Kênh Youtube BHKTHN:
