Chivkeeb 38:6-11
Nqe cim:
“Tus Tswv foom phem rau tsevneeg uas ua limhiam, tiamsis nws foom koob hmoov rau tsevneeg uas ua ncaj ncees” (Pajlug 3:33).
Lus nug rau sawvdaws xav:
– Tej kev txhaum twg tshwmsim ntxiv hauv Yudas tsevneeg?
– Ntawm no qhia pom kev txhaum muaj mojyam licas?
– Zaj kawm no pab peb xam pom txog kev txhaum licas?
Vajluskub qhia paub hais tias, tsis yog tsuas muaj Yudas thiaj yuav pojniam Kana-as xwb, tomqab ntawd nws kuj tso nws tus tub hlob uas yog Eles mus yuav ib tug ntxhais Kana-as los ua pojniam (nqe 6). Yudas tsis pom qhov txhaum thaum tsis ua raws cov yawgkoob tej lus qhuab qhia, thiab tej zaug nws pom tias nws tus pojniam neeg Kana-as “kuj zoo”, nws thiaj mus yuav ib tug ntxhais Kana-as los rau nws tus tub ua pojniam. Yudas yim hnub yim pauv hloov mus ua li cov Kana-as thiab zoo li nws tus pojniam uas yog lwm haivneeg pe mlom zuj zus! Tiamsis tomqab ntawd mob siab heev thaum Yudas pom qhov teebmeem xubthawj ntawm kev txhaum, ntawd yog “Eles ua kev phem kev qias tsis haum tus Tswv siab, tus Tswv thiaj muab Eles tua povtseg lawm.” Paub tseeb hais tias Eles ua phem ua qias heev thiaj raug Vajtswv tua povtseg. Eles ua phem qias vim kawm tau tej yam tsis zoo ntawm lub cuabyig thiab cov neeg ibncig, uas yog muaj ib leej niam neeg Kana-as, nyob nrog cov neeg Kana-as, thiab muaj ib leej txiv tabtom hloov mus ua neeg Kana-as.
Kev txhaum tsis xaus li ntawd xwb, Aunas tsis kam yug menyuam rau nws tus tijlaug raws li txojcai tiam ntawd (II Kevcai 25:5-10), vim nws xav hais tias yog nws tus niamtij uas yog Tamaj tsis yug menyuam ces nws tijlaug tej liaj av, qub txeeg qub teg yuav yog nws tug. Qhov no tsis haum tus Tswv siab nws thiaj raug tus Tswv muab tua povtseg (nqe 8-10). Yog li ntawd peb pom hais tias Aunas yog ib tug neeg qia dub, ntshaw luag tug, dag neeg, thiab tsis ua raws txojcai.
Tsis tas li ntawd xwb, sijhawm nimno Yudas yim ua qhia tshwm tus yamntxwv ntawm ib tug neeg qia dub, tswvyim phem, thiab dag lwm tus thaum ntiab tus nyab Tamaj rov mus nyob nws txiv tsev vim Yudas tsis xav kom tus tub ntxawg uas yog Selas thaum hlob tiav ua raws txojcai rov mus yuav tus niamtij los ua pojniam, thiab tej zaug yuav raug tua tuag ib yam li nws ob tug tilaug thiab (nqe 11). Yudas tau digmuag sab ntsujplig tsis zeem paub nws ob tug tub tsis yog tuag vim muaj kev “sib txuas” nrog tus nyab Tamaj tiamsis yog vim nkawd txojkev ua phem ua qias. Tshaj ntawd, tej tswvyim phem, qia dub qhov tseeb yeej yog tawm hauv Yudas tuaj.
Kev txhaum pheej sib kis thiab nkag mus rau cov neeg ibncig, tshwjxeeb yog cov txheeb ze hauv lub cuabyig, thiab muaj mojyam yim hnub yim phem. Yudas tau ua saib tsis taus qhov tseemceeb ntawm kev sib yuav, qia dub, dag lwm tus thiab yim hnub yim log tob hauv kev txhaum, ces nws cov tub kuj zoo li ntawd. Peb yuav tsum xyuamxim vim peb lubneej muaj peevxwm coj hmoov zoo lossis hmoov phem los rau peb lub cuabyig. Pajlug 3:33 qhia paub hais tias tej kev foom phem tsis yog tsuas raug tus neeg phem xwb, tiamsis tseem raug rau nws “tsevneeg”, thiab tej koobhmoov tsis yog tsuas pub rau cov neeg ncajncees xwb, tseem nchuav rau nws “tsevneeg” huv tibsi.
Thov Vajtswv,
Tus Tswv, thov pab nyuam yaus muaj lub siab hwm Koj, ua lubneej ncajncees tabmeeg Koj, nyuam yaus thiaj yuav ua tau qauv zoo thiab txhim kho lub cuabyig raws li Koj lub siabnyiam. Nyuam yaus tuav Yexus Khetos lub npe thov, Amees.
Peb yuav tsum ua neej thiab tu qhia tej menyuam licas kom lawv tsis poob rau txojkev txhaum?
Nyeem Vajluskub hauv peb lub xyoo: Pajlug 6
Kênh Youtube BHKTHN:
