Klei Aê Diê Blŭ: Klei Mphŭn Dơ̆ng 38:6-11
Êlan kliăng: “Klei Yêhôwa tăm pah dôk ti sang mnuih ƀai, ƀiădah Ñu hơêč hmưi klei jăk jĭn kơ sang pô kpă ênô.” (Klei Bi Hriêng 3:33)
Klei êmuh ksiêm mĭn: Ya klei soh lŏ truh leh hlăm gŏ sang Y-Yuđa? Tinei brei ƀuh klei soh mâo ya mta knhuah mdê? Si klei đru drei dlăng uêñ huĭ hĭn kơ klei soh mơ̆ng klei hriăm anei?
Klei Aê Diê Blŭ brei thâo, Y-Yuđa amâo knŏng dôk mô̆ mniê Kanaan ôh, ƀiădah wăt mă mniê Kanaan jing mô̆ kơ Y-Er, anak êkei khua ñu mơh (êlan 6). Ñu amâo ƀuh jing soh ôh, klei ñu ngă leh bi kdơ̆ng hŏng klei aê ama ñu mtô lač, leh anăn năng ai bi ƀuh mô̆ ñu mniê Kanaan anăn “ăt dưi mơh”, kyuanăn ñu amâo kĭ kơ̆ ôh mă mô̆ mniê Kanaan kơ anak êkei ñu. Y-Yuđa ƀrư̆ hruê mbliư̆ mlih msĕ si phung Kanaan hĭn êjai leh anăn msĕ si mô̆ ñu pô, sa čô tue kkuh kơ rup yang! Ƀiădah ruă êdi yơh tơdah ñu tŭ boh jhat tal êlâo mơ̆ng klei soh, jing klei “Y-Er, anak Y-Yuđa tal êlâo ngă klei ƀai ti anăp Yêhôwa; snăn Yêhôwa bi mdjiê ñu ”. Năng ai Y-Er jhat ƀai snăk kyuanăn tơl Aê Diê bi mdjiê ñu. Y-Er jhat ƀai kyuadah bi hmăi mơ̆ng gŏ sang leh anăn kdrŭn hdĭp, sa čô amĭ Kanaan, kdrŭn ala ƀuôn Kanaan, leh anăn sa čô ama ƀrư̆ hruê mbliư̆ mlih msĕ hŏng phung Kanaan.
Klei soh amâo mjưh tăp anăn ôh, Y-Ônan hngah amâo čiăng mâo anak kơ ayŏng ñu djiê ôh, tui si klei bhiăn ênuk anăn (Klei Mtô Mñă Klei Bhiăn 25:5-10), kyuadah ñu tĭng yap snei, tơdah mô̆ ayŏng ñu mâo anak amâo djŏ mơ̆ng ñu ôh, snăn jih jang lăn ala, ngăn drăp ayŏng ñu Y-Er srăng jing dŏ kơ ñu yơh. Klei ñu ngă anăn bi ênguôt kơ Yêhôwa, leh anăn Yêhôwa bi mdjiê ñu mơh (êlan 8-10). Snăn dưi ƀuh Y-Ônan jing sa čô čuôt klih, čiăng kơ mnơ̆ng, luar, leh anăn amâo gưt hlue klei bhiăn.
Ka jih mơh, ară anei Y-Yuđa ƀrư̆ bi êdah hĭn knuih jing čuôt klih, mnêč, leh anăn luar kyuadah ñu suôt hgăm mtâo mniê ñu lŏ wĭt kơ sang ama gơ̆, kyuadah ñu amâo čiăng ôh anak êkei kluč ñu Y-Sêla, tơdah đĭ hriê kơ prŏng, ăt srăng gưt hlue klei bhiăn brei dôk mô̆ ayŏng H’Tamar, leh anăn năng ai srăng lŏ djiê msĕ si dua čô ayŏng gơ̆ (êlan 11). Y-Yuđa jing hĕ mnuih bum ală klei hdĭp mngăt leh, ñu amâo thâo ƀuh ôh dua čô anak êkei ñu djiê leh amâo djŏ kyua mâo “klei bi mguôp” hŏng H’Tamar mtâo mniê ñu, ƀiădah kyua klei jhat ƀai diñu ngă yơh. Hĭn mơh, klă nik jih jang klei mnêč, tĭng yap, čuôt klih phung anak Y-Yuđa kbiă hriê mơ̆ng ñu pô yơh.
Klei soh khăng lar čuê leh anăn mâo klei bi hmăi prŏng kơ phung riêng gah, boh nik kơ mnuih hlăm sang pô, leh anăn mâo knhuah mdê ƀrư̆ hruê ƀrư̆ kjham hĭn êjai. Y-Yuđa dlăng hơăi mang knhuah yuôm bhăn klei jing ung mô̆, klei čuôt klih, klei luar leh anăn lŏ kdlŭt êlam hĭn êjai hlăm klei ngă soh, snăn phung anak ñu ăt jing msĕ snăn mơh. Brei drei răng kyuadah klei hdĭp drei pô yơh dưi ba hriê klei jăk mơak amâodah klei tăm pah kơ gŏ sang drei pô. Klei Bi Hriêng 3:33 brei thâo klei tăm pah truh amâo knŏng ti dlông pô ƀai, ƀiădah wăt ti “sang” ñu mơh, leh anăn klei hơêč hmưi amâo tuh knŏng ti pô kpă ênô, ƀiădah wăt ti “anôk dôk” pô anei mơh.
Si brei drei dôk hdĭp leh anăn čiêm rông mtô lač anak čô, čiăng kơ đăm lĕ ôh hlăm êlan klei soh?
Wah lač: Ơ Khua Yang, akâo Ih brei kâo rông ba nanao klei huĭ mpŭ kơ Aê Diê, êbat kpă ênô ti anăp Khua Yang, čiăng ngă klei bi hmô jăk leh anăn mkŏ mdơ̆ng gŏ sang kâo hlăm êlan Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
