Klei Aê Diê Blŭ: Hêbrơ 3:1‑6
Êlan kliăng: “Ƀiădah Krist dôk sĭt suôr msĕ si sa čô anak êkei kiă sang Aê Diê. Drei jing sang Ñu tơdah drei djă pioh kjăp klei knang leh anăn klei jhŏng hlăm klei drei čang hmăng” (Hêbrơ 3:6).
Klei êmuh ksiêm mĭn: Si mblang Sang Aê Diê? Si klei mdê bruă klam Y‑Môis hŏng Yang Krist hlăm Sang Aê Diê? Si knhuah hdĭp phung hlăm Sang Aê Diê brei mâo?
Mñă kơ “Sang Aê Diê”, lu mnuih mĭn mtam kơ sang kkuh mpŭ, anôk phung đăo bi kƀĭn čiăng kkuh mpŭ kơ Aê Diê. Ƀiădah, Klei Aê Diê Blŭ khăng yua boh blŭ “sang” čiăng lač kơ mnuih hĭn kơ mnơ̆ng mnuă. Hlăk mtao Y‑Đawit bi êdah klei ñu čiăng mdơ̆ng kơ Aê Diê sa boh sang, jing Sang Yang, Aê Diê wĭt lač kơ ñu hŏng klei ƀuăn Ñu srăng mdơ̆ng kơ mtao “sa boh sang”, jing gŏ sang, anak čô mtao (dlăng II Y‑Samuel 7). Aê Diê hrih mjing lăn adiê leh anăn jih jang mnơ̆ng snăn amâo mâo ôh sa boh sang kơ Ñu dưi “dôk” (Bruă Phung Khua Ƀĭng Kna 17:24), ƀiădah pô čih hră Hêbrơ hưn mdah “drei jing sang Aê Diê” (3:6). Sang Aê Diê jing phung anak ƀuôn sang Aê Diê. Jing klei jăk mơak êdimima kyua Aê Diê kơ lăn adiê jih jang mnơ̆ng tŭ ư dôk hlăm mnuih jing dŏ Ñu.
Ênuk Klei Bi Mguôp Hđăp, Sang Aê Diê jing phung ƀuôn sang Israel, leh anăn Y‑Môis jing pô mâo anôk bruă yuôm mdê hĭn. Tơdah phung Israel dlăng klei bhiăn jing klei diñu hưn ktưn snăn hŏng diñu, Y‑Môis ăt jing klei bhiăn mơh. Hrêč mă mơ̆ng Klei Yap 12:7, pô čih hră Hêbrơ hưn mdah kơ Y‑Môis “dôk sĭt suôr hlăm jih sang Aê Diê msĕ si sa čô dĭng buăl, čiăng hưn bi sĭt kơ jih klei arăng srăng blŭ êdei” (êlan 5). Bruă Y‑Môis djă, klei Y‑Môis hưn êlâo, klei bhiăn Y‑Môis mbĭt hŏng jih hdră êlan bhiăn phung khua ngă yang, mnơ̆ng myơr ngă yang…, jih jang jing rup kơ hruê êdei srăng bi sĭt hlăm hdră klei bi mtlaih Khua Yang Yêsu klam. Snăn, Y‑Môis jing dĭng buăl mprăp mkra kơ Khua êjai anăn Khua Yang Yêsu yơh jing “anak êkei kiă sang Aê Diê” (êlan 6).
Pô čih hră Hêbrơ ăt hưn êlâo brei răng, “drei jing sang ñu, tơdah drei djă pioh kjăp klei knang leh anăn klei jhŏng hlăm klei drei čang hmăng ”. klei anei čiăng lač amâo djŏ jih jang hlei pô mâo anăn hlăm Phung Sang Aê Diê jing mnuih hlăm sang Aê Diê ôh, ƀiădah knŏng hlei pô djă pioh kjăp klei đăo tơl knhal tuč. Blŭ mdê, knŏng hlei pô mâo klei đăo sĭt kơ Aê Diê kơh dưi jing mnuih sang Ñu. Dlăng ti êngao amâo dưi thâo ôh hlei jing pô đăo sĭt, hlei jing pô knŏng tui hlue klei đăo, ƀiădah Khua Yang Yêsu lač klă “arăng thâo kral grăp ana kyâo tui si boh gơ̆” (Y‑Luk 6:44). Mnuih sang Aê Diê jing mnuih kmhal sĭt kơ klei soh ñu, mpŭ kơ Khua Yang Yêsu jing Khua kơ klei hdĭp ñu leh anăn bi êdah boh mnga sa klei hdĭp mâo klei lŏ kkiêng mrâo. Mnuih sang Aê Diê jing phung thâo săng asei mlei diñu jing anôk Aê Diê dôk leh anăn srăng hdĭp sa klei hdĭp mpŭ mni kơ Ñu.
Si drei dôk hdĭp hlăm klei jing mnuih sang Aê Diê?
Wah lač: Bi mni kơ Aê Diê kyua lăn adiê prŏng êhai amâo mâo anôk dưi kơ̆ng Ih dôk ôh, ƀiădah hlăm Khua Yang Yêsu, Ih tŭ ư dôk hlăm klei hdĭp kâo. Akâo kơ Yang Mngăt Jăk brei klei ktang myang leh anăn atăt gai čiăng kơ kâo dưi hdĭp năng, mpŭ mni kơ Ih leh anăn bi êdah boh mnga jăk siam hlăm klei hdĭp kâo grăp hruê.
Dlăng Klei Aê Diê Blŭ hlăm tlâo thŭn: Y‑Êsai 37:21‑38
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
