Klei Aê Diê Blŭ: Klei Mtô Mñă Klei Bhiăn 33:26-29
Êlan kliăng: “Hơ̆k mơak yơh ih, Ơ Israel! Hlei pô jing msĕ si ih, sa phung ƀuôn sang Yêhôwa bi mtlaih leh? Ñu jing khil kăp dŏng ih, leh anăn jing đao gưm brei klei dưi kdrưh kơang kơ ih! Phung roh ih srăng hriê hŏng klei bin buôn ti anăp ih, leh anăn ih srăng juă anôk dlông diñu” (Klei Mtô Mñă Klei Bhiăn 33:29)
Klei êmuh ksiêm mĭn: Ya rup Y-Môis yua čiăng bi hmô kơ klei prŏng Aê Diê? Ya ngă phung Israel jing sa găp djuê mâo klei jăk jĭn? Mơ̆ng drei mâo klei dưi dôk kjăp nanao hlăm klei knap mñai?
Hdruôm hră Klei Mtô Mñă Klei Bhiăn jing klei iêô kwưh brei phung Israel hdĭp leh anăn ngă tui si Klei Aê Diê Blŭ. Ƀiădah boh blŭ knhal tuč Y-Môis blŭ hŏng phung ƀuôn sang amâo djŏ klei blŭ iêô kwưh brei digơ̆ ngă sa mta klei ôh, ƀiădah knŏng blŭ kơ klei prŏng Aê Diê, leh anăn knŏng hjăn kơ Aê Diê đuč. Y-Môis bi hmô klei prŏng Aê Diê jing msĕ si Pô phiơr hlăm adiê hriê đru phung Israel. Y-Môis čiăng lŏ bi hdơr kơ phung Israel Aê Diê Pô digơ̆ kkuh mpŭ amâo msĕ ôh hŏng rup yang amâo thâo blŭ, amâo thâo hmư̆ knŏng dôk gŭ ngơ ngĭn hlăm sang kkuh mpŭ, amâo dưi đru ôh tơdah digơ̆ tuôm hŏng klei dleh dlan ƀiădah Ñu jing Aê Diê Pô dôk hdĭp hlŏng lar, Pô thâo jih jang mnơ̆ng, Pô thâo săng klă kơ phung ƀuôn sang Ñu, leh anăn Ñu jing Pô mâo jih klei myang dưi bi mtlaih digơ̆ msĕ si Ñu bi mtlaih leh phung aê aduôn digơ̆ mphŭn dô.
Amâo djŏ knŏng dŭm anăn ôh, Aê Diê pô jing anôk phung ƀuôn sang Ñu kđap, leh anăn păl Ñu dôk hlŏng lar srăng mgang digơ̆ mơ̆ng jih jang phung roh. Kyuanăn yơh Y-Môis lač phung Israel jing sa phung găp djuê mâo klei jăk jĭn sĭt nik. Diñu mâo klei jăk jĭn kyuadah Aê Diê kơ phung adiê srăng nao mbĭt hŏng diñu hlăm klei bi blah mă bha Lăn Aê Diê Buăn jing čar Kanaan, Aê Diê jing Pô mgang diñu mơ̆ng jih jang phung roh msĕ mơh. Sĭt nik amâo mâo ôh klei pap mkăn jing prŏng hĭn kơ klei pap dưi jing sa phung găp djuê pioh kơ Aê Diê pô.
Klei pap prŏng hĭn brei leh kơ sa čô đăo kơ Krist jing amâo djŏ Aê Diê brei mnơ̆ng anei dŏ anăn ôh, ƀiădah dưi jing anak Aê Diê. Dưi lač amâo mâo ôh mnơ̆ng jing yuôm hĭn kơ klei dưi jing sa čô mnuih ƀuôn sang Ƀuôn Ala Mtao Adiê. Kyuadah klei jing anak Aê Diê đru drei hdơr, drei mâo sa čô Ama Pô Prŏng khăp nanao kơ drei, jing Pô kiă kriê jih jang mnơ̆ng hlăm lăn ala anei, Pô thâo săng jih jang klei dleh dlan drei dôk bi tlă anăp, leh anăn yuôm hĭn jing Ñu mâo klei myang dưi bi mtlaih drei. Kyuanăn yơh, wăt tơdah drei tuôm hŏng lu klei knap mñai hlăm klei hdĭp đăm drei êdu ai leh anăn kdŭn ôh, kyuadah drei jing dŏ Khua Yang, drei jing phung anak Aê Diê, sĭt nik Ñu srăng bi mtlaih drei djŏ tui si mmông Ñu. Knang nanao kơ mmông leh anăn klei Aê Diê brei jing klei jăk hĭn kơ phung ƀuôn sang Ñu.
Drei hơ̆k mơak mơ̆ tơdah hdĭp hŏng klei jing anak Mtao prŏng hlăm adiê?
Wah lač: Ơ Khua Yang, kâo lač jăk kơ Ih kyuadah Ih brei leh kơ kâo klei dưi jing anak Ih. Đru kâo hdĭp năng hŏng klei jing anak Mtao Adiê leh anăn đru kâo dôk kjăp nanao tơdah tuôm hŏng lu klei dleh dlan hlăm klei hdĭp. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 50
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
