II Kevcai 33:26-29
Nqe cim:
“Cov Yixalayees, ua cas nej yuav tau zoo ua luaj! Nej yog haivneeg uas tus Tswv cawm dim lawm; tsis muaj ib haivneeg twg uas tau zoo li nej. Tus Tswv yog nej daim thaiv hniav ntaj thiab yog nej nrab ntaj uas pab kom nej kovyeej. Nej tej yeebncuab yuav tsa suab thov kom nej hlub, thiab nej yuav muab lawv tsuj nthi rau hauv av.” (II Kevcai 33:29)
Lus nug rau sawvdaws xav:
– Mauxes siv tus duab twg los qhia txog Vajtswv tus muaj hwjchim loj?
– Vim li cas cov Yixalayees yog ib haivneeg tau koob hmoov?
– Vamkhom qhovtwg peb sawv ruaj khov thaum ntsib tej kev txomnyem?
Phau ntawv II Kevcai yog cov lus nqua hu cov neeg Yixalayees kom ua neej thiab ua raws li Vajtswv Txojlus qhia. Tiamsis Mauxes cov lus qhia thaum kawg yog cov lus hais rau cov pejxeem tsis yog cov lus nqua hu kom lawv ua ib yam dabtsi, tiamsis yog hais kom lawv saib ntsoov Vajtswv tus muaj hwjchim loj, thiab zeem paub txoj koob hmoov hlub uas Nws pub rau lawv. Vajtswv tus uas muaj hwjchim loj tau Mauxes qhia tias los pab cawm cov neeg Yixalayees. Mauxes hais rau cov pejxeem tias, tus Vajtswv uas lawv pehawm tsis yog tus mlom uas tsis paub hais lus, txawb twjywm hauv lub tuamtsev, daws tsis tau tej teebmeem uas cov Yixalayees ntsib, tiamsis Vajtswv yog tus uas muaj sia, paub txhua yam meej txog Nws haivneeg, thiab Nws yog tus muaj hwjchim cawm tau lawv ib yam li uas Nws tau pab lawv ntau tiam los lawm.
Tsis yog li ntawd xwb, Vajtswv yog qhov chaw Nws haivneeg nkaum, yog txhais tes tiv thaiv lawv kovyeej yeebncuab. Qhov no yog qhov vimchiv Mauxes hais rau cov neeg Yixalayees tias lawv yog haivneeg tau koob hmoov. Lawv tau koob hmoov vim yog Vajtswv tus uas nyob saum ntuj niaj hnub nrog nraim lawv thaum mus ntaus lub tebchaws Kana-as, Nws yog tus uas tiv thaiv lawv tsis raug tej yeebncuab tua. Tseeb tiag tsis muaj ib txoj koob hmoov loj npaum li txoj koob hmoov uas Vajtswv pub tshwjxeeb rau Nws haivneeg.
Txoj koob hmoov hlub uas loj kawg nkaus ntawm cov ntseeg tsis yog tau Vajtswv pub yam ub yam no xwb, tiamsis tseem tau ua Vajtswv cov menyuam thiab. Tsis muaj ib yam muaj nqis npaum lub meejmom tau ua pejxeem hauv Vajtswv lub Tebchaws. Vim lub meejmom yog neeg qaumntuj ua rau peb nco ntsoov hais tias, peb muaj ib Leej Txiv muaj hwjchim loj kawg nkaus hlub peb, Nws yog tus uas paub txhua yam uas peb raug, thiab qhov tseemceeb yog Nws muaj hwjchim cawm tau peb dim. Yog li ntawd, txawm yog peb tabtom ntsib tej kev txomnyem twg nyob hauv lub neej los peb tsis txhob poob siab, qaug zog, peb yog Vajtswv neeg, peb yog Vajtswv menyuam, Nws yeej yuav cawm peb dim raws li Nws lub siab nyiam. Peb yeej ntseeg ruaj tias lub sijhawm thiab tus Tswv txojkev pub yeej zoo kawg nkaus pub rau Nws cov menyuam.
Thov Vajtswv,
Vajtswv, nyuam yaus ua Koj tsaug vim Koj pub nyuam yaus muaj feem ua Koj menyuam. Thov Koj qhia kom nyuam yaus paub ua neej tsimnyog lub meejmom ua menyuam Vajntxwv qaumntuj thiab pab kom nyuam yaus ruaj siab thaum ntsib tej kev txomnyem hauv lub neej. Nyuam yaus tuav Tswv Yexus lub npe thov, Amees.
Peb puas muaj kev kaj siab thaum ua neej nyob hauv lub meejmom ua menyuam Vajntxwv saum ntuj?
Nyeem Vajluskub hauv peb lub xyoo: Yaxayas 50
Kênh Youtube BHKTHN:
