Klei Aê Diê Blŭ: II Klei Yăl Dliê 22:4-9
Êlan kliăng: “Bi hriăm hđeh thâo êlan ñu srăng tui hlue, leh anăn tơdah ñu mduôn ñu amâo srăng weh ôh mơ̆ng êlan anăn.” (Klei Bi Hriêng 22:6)
Klei êmuh ksiêm mĭn: Ya mta klei jhat mtao Y‑Ahasia ngă leh? Ya boh ñu tŭ mơ̆ng klei ngă anăn? Ya klei mñă ktang tĭt kơ drei brei răng mơ̆ng găp djuê mtao Y‑Ahasia?
Leh mtao Y‑Jôram djiê, H’Athali bi mŭt phung mơ̆ng sang Y‑Ahap hlăm sang mtao jing phung kčĕ kơ mtao Y‑Ahasia, “klei phung anăn kčĕ bi truh klei jhat kơ ñu” (êlan 4b). Brei drei răng snăk klei duah pô kčĕ hlăk drei tuôm hŏng klei dleh dlan. Brei drei jĕ giăm hŏng Klei Aê Diê Blŭ, mđing hmư̆ asăp Khua Yang, leh anăn mjing mah jiăng hŏng Khua Yang. Hŏng jih ai tiê mkŏ mdơ̆ng klei bi mguôp hlăm Krist, khăp kơ ayŏng amai adei leh anăn bi đru hdơ̆ng găp tơdah tuôm hŏng klei lông dlăng. Mtao Y‑Ahasia ngă soh hĭn êjai tơdah ñu bi mguôp hŏng phung jhat ƀai, amâo mâo huĭ mpŭ kơ Aê Diê (êlan 5a). Drei amâo knŏng kăp răng kơ phung ƀĭng găp amâodah phung kčĕ amâo huĭ mpŭ kơ Aê Diê ôh, ƀiădah wăt răng hŏng phung drei mă bruă mbĭt msĕ mơh.
Aê Diê hưn leh êlâo brei mtao Y‑Ahasia răng tơdah brei klei dưi kơ “Phung Siri bi êka Y‑Jôram” (êlan 5b). Anei jing mtao Y‑Jôram phung Israel. Ƀiădah lĕ, mtao Y‑Ahasia amâo thâo kral ôh klei bi knăl brei răng mơ̆ng Khua Yang. Hruê anei, Aê Diê ăt dôk yua lu mta klei bi knăl čiăng mñă êlâo brei drei răng. Brei drei dôk răng leh anăn dôk êngal čiăng thâo kral klei bi knăl anei leh anăn mjưh mtam. Kyuadah amâo thâo kral ôh klei bi knăl Khua Yang hưn êlâo brei răng snăn yơh mtao Y‑Ahasia trŭn nao čuă dlăng ama ñu, mtao Y‑Jôram ti Jesrêel (êlan 6b) anăn yơh jing tal ñu nao hiu amâo lŏ wĭt ôh. Ti Jesrêel, anôk mâo sang mtao Y‑Ahap, anôk anăn mơh mtao Y‑Ahap plah mă war boh kriăk ƀâo Y‑Nabôt gơ̆. Mtao Y‑Ahasia lui anôk ñu dôk nao mŭt hlăm anôk phung roh leh anăn djiê tinăn. Brei drei răng leh anăn brei thâo kral ti anôk amâo dưi weh jưh ôh, amâo dưi weh dlăng ôh leh anăn amâo dưi weh hmư̆ ôh.
Êlan 7a brei thâo: “Aê Diê čuăn leh klei lĕ Y‑Ahasia srăng truh hŏng klei ñu nao čhưn kơ Y‑Jôram”. Amâo djŏ ôh Aê Diê tiŏ nao mtao Y‑Ahasia ƀiădah Aê Diê čuăn bi rai ñu snăn klei ñu trŭn nao ti Jesrêel hlăm kngan Aê Diê. Tinei, mtao Y‑Ahasia mmăt tĭt kluôm dhuôm hlăm mngăt kyuanăn ñu amâo thâo kral ôh klei Aê Diê čiăng, ñu bi mguôp hŏng pô Aê Diê lui, leh anăn kdơ̆ng hŏng pô Aê Diê ruah pioh bi hrô (êlan 7b). Tơdah sa čô mnuih ƀrư̆ kbưi hĭn hŏng Khua Yang snăn ală mngăt ñu ƀrư̆ ƀrư̆ srăng jing bum, leh anăn hlăk Aê Diê lui phưi leh, klei gĭr ktưn ăt jing hơăi mang mơh.
Găp djuê mtao Y‑Ahasia jing sa klei hưn êlâo ktang tĭt brei răng: kčưm dơ̆ng mơ̆ng klei bi kuôl hŏng mnuih amâo huĭ mpŭ kơ Aê Diê, tŭ klei bi hmăi mơ̆ng sa čô ama amâo mâo klei bi hmô jăk, leh anăn klei mtô soh wê mơ̆ng sa čô amĭ jhat ƀai, ba truh kơ klei bi rai klei hdĭp mtao Y‑Ahasia, trŭt phung anak ñu nao hlăm anôk djiê, leh anăn bi hmăi kơ kluôm jih ƀuôn ala mtao Yuđa. Akâo kơ Khua Yang brei drei dưi mă tŭ klei hriăm ruă ênguôt anei.
Si hnơ̆ng čuăn drei dôk mtô lač kơ phung anak drei?
Wah lač: Ơ Khua Yang, akâo Ih mtô kâo thâo săng klei yuôm kơ klei dôk ung mô̆ hlăm Khua Yang leh anăn klei bi hmăi mơ̆ng amĭ ama kơ klei hdĭp phung anak. Akâo Khua Yang đru kâo dôk hdĭp huĭ mpŭ kơ Khua Yang leh anăn bi hriăm phung anak Klei Sĭt Nik mơ̆ng Klei Aê Diê Blŭ.
Dlăng Klei Aê Diê Blŭ hlăm tlâo thŭn: Y‑Luk 18:35-19:27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
