Klei Aê Diê Blŭ: Y‑Yakơ 5:13-16
Êlan kliăng: “Kyua anăn bi hưn bĕ klei soh hdơ̆ng diih, leh anăn đru wah lač hdơ̆ng diih, čiăng kơ diih dưi hlao.” (Y‑Yakơ 5:16a)
Klei êmuh ksiêm mĭn: Ya tlâo mta klei truh Y‑Yakơ lač leh anăn si klei wĭt ngă hŏng grăp klei truh anăn? Ya boh tŭ dưn mơ̆ng klei sa ai wah lač? Si klei bi mguôp wah lač drei, gŏ sang, mah jiăng, leh anăn Phung Sang Aê Diê?
Klei sa ai wah lač mơ̆ng grăp čô, mơ̆ng pô ruă leh anăn mơ̆ng phung khua mduôn ba klei tŭ dưn sĭt. Hlăm trăn Klei Aê Diê Blŭ hruê anei, Y‑Yakơ lač kơ tlâo klei truh mdê mdê, anăn jing tŭ klei knap mñai, hơ̆k mơak, leh anăn ruă duam. Ñu ăt mtô mơh kơ phung anak ƀuôn sang Aê Diê klei wĭt ngă hŏng grăp mta klei truh. Êjai dôk tŭ klei knap mñai, brei wah lač hŏng Khua Yang; êjai klei lông dlăng brei hơ̆k mơak, mmuñ bi mni kơ Khua Yang; êjai dôk ruă, brei iêô phung khua mduôn hlăm Phung Sang Aê Diê hriê wah lač hdơ̆ng pô. Drei ƀuh hlăm jih tlâo klei truh mâo sa anôk kñăm sơăi jing dlăng phă Khua Yang, hưn mdah kơ Khua Yang jih jang klei truh hlăm klei hdĭp hŏng klei đăo kơ Khua Yang jing Pô brei klei wĭt ngă dưi găn klei lông dlăng.
Klei tŭ klei knap mñai Y‑Yakơ lač tinei amâo djŏ tŭ klei knap mñai kyua boh jhat mơ̆ng bruă ngă soh ôh, ƀiădah tŭ klei knap mñai kyua klei đăo kơ Khua Yang Yêsu msĕ si khua ƀĭng kna Y‑Pêtrôs mtô: “Ƀiădah đăm brei ôh sa čô hlăm phung diih tŭ klei knap mñai kyua ñu jing pô bi mdjiê mnuih, amâodah pô knĕ, amâodah pô ngă soh prŏng, amâodah pô khăp mŭt bi rŭng hlăm bruă arăng. Ƀiădah lĕ tơdah sa čô tŭ klei knap mñai kyua ñu jing pô đăo kơ Krist, đăm brei ñu hêñ ôh, ƀiădah brei ñu mpŭ mni kơ Aê Diê kyua ñu mâo anăn Krist.” (I Y‑Pêtrôs 4:15-16). Mbĭt ti djiêô anăn, Y‑Yakơ lač kơ klei mmuñ bi mni kơ Khua Yang êjai hơ̆k mơak wăt êjai dôk knap mñai, čiăng kơ grăp čô drei bi êdah ai tiê đăo knang kơ klei jăk leh anăn klei pap Khua Yang, đăo kơ Khua Yang kiă kriê jih jang klei, leh anăn đăo kơ Khua Yang brei klei jăk hĭn kơ phung anak Aê Diê tui si klei čiăng jăk Ñu. Mơak hlăm klei lông dlăng kyuadah thâo săng klei lông dlăng đru kơ grăp čô drei đĭ hriê kơ prŏng hlăm klei đăo leh anăn dưi jing jăk klă (Y‑Yakơ 1:2-3). Ti knhal tuč, Y‑Yakơ kñăm kơ klei wah lač kơ hdơ̆ng găp, sa ai hlăm klei wah lač amâo knŏng đru mnuih ruă Khua Yang bi hlao hlăm asei mlei, ƀiădah yuôm hĭn jing klei bi hlao kơ klei hdĭp myang. Hlăm klei phung khua mduôn sa ai wah lač hŏng klei đăo, klei hưn klei soh ti krah hdơ̆ng ayŏng amai adei leh anăn wah lač kơ hdơ̆ng găp, Khua Yang srăng bi hlao leh anăn pap brei kơ mnuih ruă. Klei hưn klei soh amâo knŏng bi rŭ mdơ̆ng klei bi mguôp sĭt suôr ti krah phung đăo hŏng Khua Yang, ƀiădah wăt ba hriê klei sa ai, klei khăp ti krah hdơ̆ng phung ayŏng amai adei.
Akâo kơ Khua Yang brei kơ grăp čô drei jih ai tiê, uêñ mĭn hlăm klei bi mguôp wah lač. Klei wah lač rŭ mdơ̆ng klei bi mguôp sĭt suôr hŏng Khua Yang, wăt čiăng đru rŭ klei đăo hdơ̆ng pô, leh anăn mă tŭ klei wĭt lač myang čiăng dưi găn klei dleh dlan hlăm klei hdĭp.
Si klei sa ai bi mguôp wah lač ti krah drei hŏng phung ayŏng amai adei hlăm Khua Yang?
Wah lač: Ơ Khua Yang, bi mni kơ Khua Yang pap brei leh klei soh kâo, brei kâo dưi jing anak Ih leh anăn dưi bi mguôp hŏng Khua Yang hŏng klei wah lač. Akâo kơ Khua Yang brei kơ hmei thâo khăp kơ Khua Yang leh anăn bi khăp hdơ̆ng hmei, thâo bi đru rŭ klei đăo hdơ̆ng hmei hŏng klei sa ai hlăm klei wah lač. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 5
Kênh Youtube BHKTHN:
