Yakaunpaus 5:13-16
Nqe cim:
“Yog li ntawd, nej ib tug yuav tsum lees kev txhaum rau ib tug, thiab ib tug thov Vajtswv pab rau ib tug, nej tej mob thiaj yuav zoo” (Yakaunpaus 5:16a)
Lus nug rau sawvdaws xav:
– Yakaunpaus hais txog peb yam kev twg thiab qhov kev daws tej yam ntawd li cas?
– Koom siab hauv kev thov Vajtswv tau nqi zog dab tsi?
– Peb kev koom siab ntawm tsev neeg, phoojywg thiab pawg ntseeg zoo li cas?
Kev koom siab thov Vajtswv hauv txhua tus, tus neeg muaj mob thiab cov txwjlaug mas muaj kuab tiag tiag. Hauv ntu Vajlugkub hnub no, Yakaunpaus hais txog peb yam kev sib txawv: ntawd yog tiv kev txom nyem, kev zoo siab thiab kev mob nkeeg. Thiab Yakaunpaus kuj qhia Vajtswv cov menyuam haukev daws tej yam kev ntawd zuj zus. Hauv kev txomnyem ciali thov Vajtswv; hauv kev sim siab cia li zoo siab; hu nkauj qhuas Vajtswv; hauv kev mob nkeeg cia li hu cov txwj laug hauv pawg ntseeg tuaj sib thov Vajtswv pab. Peb pom 3 txoj kev no puavleej muaj tib lub homphiaj yog tig mus rau ntawm Vajtswv, qhia txhua yam hauv peb lub neej rau Vajtswv, ntseeg hais tias Vajtswv yog Tus uas pub haukev rau peb hla dhau tej kev sim siab.
Kev tiv kev txomnyem uas Yakaunpaus hais txog ntawm no tsis yog tiv kevtxomnyem nuj nqi ntawm txoj kev ua txhaum, tiamsis yog tiv kev txomnyem vim ntseeg Tswv Yexus li timthawj Petus qhia: “Nej tsis txhob tua neeg, tsis txhob ua tubsab, tsis txhob ua phem thiab tsis txhob thab plaub, yog leejtwg ua li no, tus ntawd yeej yuav raug kev txomnyem. Tiamsis yog nej cov uas ntseeg Yexus Khetos, nej raug kev tsimtxom, nej cia li ua Vajtswv tsaug, nej tsis txhob txajmuag qhia rau cov neeg uas tsimtxom nej ntawd hais tias nej yog cov uas ntseeg Yexus Khetos” (1Petus 4:15-16). Dua li ntawd, Yakaunpaus hais txog kev txhawb nqa, qhuas Vajtswv hauv kev txomnyem, kev zoo siab kom peb qhia tshwm lub siab ntseeg hauv Vajtswv kev ua siab ntev thiab hlub tshua, ntseeg Vajtswv yog Tus uas tswj rawv txhua yam, ntseeg hais tias Vajtswv pub yam zoo tshaj rau Nws cov menyuam raws li Nws siab nyiam. Zoo siab rau hauv kev sim siab vim zeem paub hais tias kev sim siab pab peb txhua tus loj hlob rau hauv kev ntseeg thiab dhau los ua yam zoo kawg nkaus (Yaukaunpaus 1:2-3). Qhov kawg, Yakaunpaus tau hais meej txog kev sib thov Vajtswv pab, koom siab thov Vajtswv mas tsis yog pab tus muaj mob tau Vajtswv kho zoo sab nqaij tawv xwb, tiamsis tseem kho zoo tus ntawd sab ntsujplig thiab. Hauv kev koom siab los ntawm cov txwj laug kev ntseeg, kev sib lees txim thiab kev sib thov Vajtswv pab, Vajtswv yuav zam txim thiab kho tus muaj mob zoo. Kev lees txim tsis yog kho tau kev sib txuas ntawm tus ntseeg rau Vajtswv xwb, tiamsis tseem pab tau koom ua ib siab, muaj kev sib hlub ntawm txhua tus.
Thov Vajtswv pab peb txhua tus tag siab, mob siab rau hauv kev koom siab thov Vajtswv. Kev thov Vajtswv ua rau muaj kev sib raug zoo nrog Vajtswv, thiab kuj yog kev sib txhawb kev ntseeg, thiab txais tau kev pab kom hla dhau tej teebmeem hauv kev ua neej.
Thov Vajtswv,
Vajtswv, ua tsaug uas Koj twb zam nyuam yaus lub txim lawm, pub nyuam yaus tau los ua Koj ib tus menyuam. Thov pab kom peb txawj hlub Koj thiab ib leeg txawj hlub ib leeg, sib txhawb hauv txoj kev ntseeg dhau los ntawm kev thov Vajtswv. Nyuam yaus tuav Yexus Khetos lub npe thov, Amees.
Peb puas nrog cov ntseeg koom ua ib lub siab thov Vajtswv?
Nyeem Vajluskub hauv peb lub xyoo: 2 Xamuyees 5
Kênh Youtube BHKTHN:
