Mathais 22:1-7
Nqe cim:
“Yeluxalees, Yeluxalees! Koj muab cov uas cev Vajtswv lus tua povtseg, koj muab pobzeb ntaus cov tubtxib uas Vajtswv txib los qhia koj! Muaj ntau zaus kuv twb yuav muab koj cov pejxeem los puag, ib yam li tus pojqaib cuab nws cov menyuam los puag rau hauv nws ob sab qab tis, tiamsis koj tsis cia kuv ua li ntawd!” (Mathais 23:37)
Lus nug rau sawvdaws xav:
– Tswv Yexus rov tham zaj lus dabtsi?
– Tus Tswv xav qhia yam dabtsi dhau ntawm zajlus no?
– Peb tau txais tus Tswv txoj koob hmoov hlub peb zoo li cas?
Tswv Yexus rov tham ntxiv zaj lus uas hais txog cov Yixalayees lub siab tawv, tsis nco Vajtswv txiaj ntsig. Zaj lus no pib ntawm ib tug vajntxwv xav npaj ib rooj tshoob rau nws tus menyuam, nov tsis yog ib rooj noj haus pheej tshaj, tiamsis yog rooj noj rooj haus loj, npaj zoo heev. Tau vajntxwv caw yog ib qhov uas zoo kawg nkaus, tiamsis peb xav tsis thoob, txog hnub uas noj tshoob tsis muaj neeg tuaj noj! Vajntxwv txib cov tub mab tubqhe mus hais cov neeg raug caw ib tug zuj zus, tiamsis lawv tsis yeem tuaj koom! Muaj qee tus tseem npau taws thiab muab cov tubtxib uas vajntxwv txib mus hu ntawd tua pov tseg thiab! Los ntawm qhov uas ua saib tsis taus cov lus caw thiab ua phem rau vajntxwv cov tubtxib, vajntxwv thiaj chim heev “nws txawm txhij nws cov tubrog mus muab cov neeg tua neeg ntawd tua povtseg, thiab muab lawv lub nroog hlawv tas huv tibsi.” (nqe 7).
Thaum tham zaj lus no, Tswv Yexus xav hais txog qhov uas “Ntuj Ceebtsheej piv ib yam li…” (nqe 2). Yog li, peb paub tias tus vajntxwv ntawd yog Vajtswv, cov qhua uas raug caw yog cov neeg Yixalayees. Lawv yog haivneeg uas tau Vajtswv xaiv, thiab lawv pheej xav hais tias lawv twb tau Ntuj Ceebtsheej los ua lawv tug, tiamsis qhov tseeb lawv twb poob txoj koob hmoov ntawd lawm, vim lawv ua neeg tawv ncauj, tsis ntseeg. Ntau zaus lawv yeej tawmtsam, tsimtxom, ntaus lossis muab Vajtswv cov cevlus tua pov tseg. Tswv Yexus lo lus hais txog lawv lub nroog hauv nqe 7 muaj tiav rau xyoo 70 T.Y.
Nimno, muaj ntau leej hauv peb kuj tabtom tsis lees yuav tus Cawmseej, vim muaj haujlwm ntau ntawm tus kheej ua rau peb tsis lees txais tus Cawmseej lo lus caw, uas yog txoj koob hmoov hlub uas Vajtswv pub dawb rau peb. Muaj ntau zaug peb pheej xav tias yus twb tau kev cawm dim los ntawm tej haujlwm yus ua, lossis vamkhom qhov yus ua haujlwm hauv Pawg Ntseeg tau, tiamsis zaj kawm no qhia rau peb paub tias yog tsis txais tus Tswv lo lus caw kom ntseeg Nws ces txawm yog nyob hauv tuamtsev los peb yeej tsis tau dim li. Thiab nco ntsoov hais tias yog peb pheej tsis kam txais tus Tswv txoj koob hmoov hlub, ces peb yeej yuav raug txim hnub uas Tswv Yexus rov qab los: “Thaum ntawd nej yuav pom ib lub cim tshwm saum nruab ntug qhia hais tias Neeg Leej Tub yuav los. Txhua haivneeg hauv qab ntuj noyuav quaj nyiav ntsoog qees thaum lawv pom Neeg Leej Tub nrog nws lub tshwjchim uas ci ntsa iab thiab nws lub hwjchim los saum ntuj los.” (Mathais 24:30).
Thov Vajtswv,
Tus Tswv, thov Koj zam txim rau nyuam yaus thaum nyuam yaus pheej nrhiav vim chiv los tav Koj tej lus caw, thov Koj pab kom nyuam yaus txhob ua siab qeeb tiamsis zoo siab thiab ua tsaug, txais yuav Koj txoj koob hmoov kom hnub Tswv Yexus rov los nyuam yaus ntsib Koj. Nyuam yaus tuav Tswv Yexus lub npe thov. Amees.
Peb puas pheej ua neeg tsis kam txais tus Tswv txoj koob hmoov hlub uas Nws muab pub rau peb?
Nyeem Vajluskub hauv peb lub xyoo: Yelemis 1
Kênh Youtube BHKTHN:
