Klei Aê Diê Blŭ: Klei Bi Hriêng 19:1‑2
Êlan kliăng: “Amâo jăk ôh sa čô mnuih mâo klei hur har ƀiădah kƀah klei thâo săng, leh anăn hlei pô ruăt nao srăng wơr êlan.” (Klei Bi Hriêng 19:2)
Klei êmuh ksiêm mĭn: Ya klei mtao Salômôn hưn êlâo brei răng? Hruê anei hŏng si êlan drei lĕ hlăm klei soh čhuai msĕ snei? Si klei hưn êlâo brei răng anei đru diih lŏ dlăng wĭt leh anăn ƀư̆ mkra knhuah hdĭp phung đăo drei pô?
“Ai tiê” (êlan 2) hlăm klei blŭ phŭn jing “klei hur har, klei tluh čiăng, hmăng hmưi”, kyuanăn “kƀah klei thâo săng” mblang jing “hur har ƀiădah kƀah klei thâo săng”. Mtao Salômôn bi mđĭ ƀrư̆ ƀrư̆ hnơ̆ng kjham hŏng dŭm êlan Klei Bi Hriêng: Tơdah hmiêt mkăp hrô klei “ênuah ênô” hŏng klei mdrŏng sah mơ̆ng klei “blŭ luar” jing jhat (êlan 1), snăn klei hur har čiăng bi hrăp pral djăl klei tluh čiăng pô, jing jhat kjham hĭn mơh (êlan 2). Blŭ mdê, êjai mnuih thâo mĭn dôk êbat hlăm êlan kpă ênô wăt tơdah ƀun ƀin dưn, bi “mnuih mluk” dôk “ruăt nao” hlăm êlan ngă tui si klei kđeh tluh ñu pô. Mnuih thâo mĭn amâo tŭ ư, amâo tluh leh anăn amâo bi hrăp kơ klei kđeh tluh ñu pô ôh, ƀiădah diñu bi leh klei diñu hmăng hmưi hlăm klei thâo săng klei sĭt nik. Mtao Salômôn hưn êlâo brei răng, mnuih ruăt čiăng bi hrăp klei ñu tluh srăng “wơr êlan”, boh blŭ anei dưi mblang jing klei ngă soh amâodah plêč weh hŏng anôk bi kčah. Tơdah sa čô mnuih mluk ngă hŏng klei ruăt čiăng bi hrăp klei ñu pô hmăng hmưi wăt tơdah hŏng êlan hdră amâo kpă ênô snăn srăng ngă soh, bi luč hĕ klei kñăm čiăng Aê Diê pioh kơ ñu.
Klei hdĭp ƀuôn sang hruê anei mtrŭt bi mđĭ knhuah hdĭp mdê bi pô. Drei khăng hmư̆ lač: Brei jing ih pô, brei hdĭp sĭt tui si mnuih ih pô jing. Tơdah klei ih tluh čiăng jing êkei hdơ̆ng êkei, mniê hdơ̆ng mniê hdĭp snăn yơh. Tơdah ih hmăng hmưi hdĭp kăp dưn ngăn drăp snăn tui tiŏ yơh klei ih êpa mhao duah prăk… Ƀiădah hlăm klei mtrang mngač mơ̆ng Klei Aê Diê Blŭ, brei drei thâo kral klei êpa mhao, klei hmăng hmưi dưi mplư drei, leh anăn ênưih bi hmăi tui si klei jing mơ̆ng êngao.
Lu blư̆ drei bi mđĭ klei hur har hĭn kơ Klei Sĭt Nik, klei bi knal hĭn kơ Klei Aê Diê Blŭ. Boh jing mơ̆ng klei anăn drei êran tui tiŏ jih nguh bruă anei kơ nguh bruă mkăn hrô kơ klei čiăng thâo săng ya Klei Aê Diê Blŭ mtô kơ drei. Msĕ si, klei êpa mhao čiăng kơ arăng đăo kơ Khua Yang jing klei djŏ, ƀiădah čiăng bi hrăp klei êpa mhao anăn lu mnuih amâo lŏ mđing uêñ kơ djăp mta klei ôh, tơl wăt klei mtô mblang sa Klei Mrâo Mrang Jăk mdê, soh hŏng Klei Aê Diê Blŭ. Răng kyuadah lu blư̆ hưn bi sĭt kơ Khua Yang, klei mtrŭt amâo lŏ jing kyua Aê Diê amâodah kyua klei khăp kơ mnuih soh ôh, ƀiădah jing hĕ kyua čiăng bi hrăp klei hur har, leh anăn tăp năng wăt kyua klei mgao drei pô mơh. Kyuanăn jih jang ya klei drei tui tiŏ leh anăn ngă hlăm knhuah hdĭp phung đăo drei pô brei kna ti dlông Klei Aê Diê Blŭ, leh anăn đăm ôh “mă klei bi mtlaih kăp mgang kơ hdră êlan ngă mkra”.
Si ngă drei tuôm ngă soh mơ̆ kyua hur har ƀiădah kƀah klei thâo săng?
Wah lač: Ơ Khua Yang, akâo Ih đru kâo mâo klei thâo săng čiăng thâo kral ya jing klei tluh pô leh anăn ya jing klei Khua Yang čiăng, čiăng kơ kâo đăm ngă soh tơdah tui duah klei čiăng bi hrăp klei tluh čiăng kơ kâo pô.
Dlăng Klei Aê Diê Blŭ hlăm tlâo thŭn: Y‑Đaniel 8:23‑9:19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
