II Xwmtxheej Vajntxwv 20:14-19
Nqe cim:
“Tus Tswv tsomkwm thiab tiv thaiv kuv, kuv cia siab rau Nws xwb. Nws pab kuv thiab ua rau kuv zoo siab kawg nkaus li, kuv thiaj zoo siab hu nkauj qhuas Nws” (Phau Ntawv Nkauj 28:7).
Lus nug rau sawvdaws xav:
– Tom qab uas mloog tus Tswv cov cevlus qhia, Vajntxwv Yehausafas, coj cov pejxeem thiab cov Levis ua dabtsi?
– Vim li cas lawv ua li ntawd thaum cov yeebncuab tseem nyob ntawd?
– Tej kev txomnyem, sim siab twg ua rau peb nyuaj tsa suab qhuas taus tus Tswv?
Tom qab uas mloog Yahaxiyees qhia, Yehausafas thiab cov pejxeem sawvdaws tsa suab qhuas thiab pehawm tus Tswv. Lawv txhos caug ntua ntawm tus Tswv xubntiag pehawm Nws, ces cov Levis uas yog cuab Kauhas thiab Kaulas sawv ntsug qw nrov nrov qhuas tus Tswv (nqe 18-19). Lawv paub hais tias tus Tswv nrog lawv nyob thiab ntseeg ruaj tus Tswv tej lus cog tseg uas Nws hais tias Nws yuav nrog nraim lawv mus ntaus yeebncuab (nqe 14-17).
Hauv tus Tswv haivneeg kev pehawm Vajtswv, tom qab uas thov Vajtswv thiab qhia tej teebmeem rau tus Tswv, ces lawv hu ib zaj nkauj ua tsaug qhuas Nws thaum tej kev txomnyem dhau mus. Tiamsis lub sijhawm no, cov yeebncuab tabtom nyob ntawd, vajntxwv thiab cov pejxeem koom siab nrog cov Levis hu nkauj qhuas tus Tswv. Qhov no kuj yog qhov uas thaum ub Vajntxwv Daviv ua tom qab uas nws tau tus Tswv cawm dim, tom qab uas thov Vajtswv xaus, vajntxwv ua Vajtswv tsaug vim Nws teb vajntxwv tej lus thov, “Cia li qhuas tus Tswv, Nws yeej hnov kuv lub suab quaj qw thov Nws pab. Tus Tswv tsomkwm thiab tiv thaiv kuv, kuv cia siab rau Nws xwb. Nws pab kuv thiab ua rau kuv zoo siab kawg nkaus li, kuv thiaj zoo siab hu nkauj qhuas Nws” (Phau Ntawv Nkauj 28:6-7). Nyob rau tiam Vajluskub Tshiab, Paulus thiab Xilas kuj ua tib yam nkaus li ntawd, tom qab uas nkawd raug nplawm thiab coj mus kaw hauv tsev lojcuj, nkawd kuj hu nkauj qhuas Vajtswv (Tes Haujlwm 16:25). Cia kom hu tau nkauj qhuas tus Tswv thaum tej kev txomnyem tsis tau dhau mus, thaum yeebncuab tseem nyob ces Vajntxwv Yehausafas thiab cov pejxeem, Vajntxwv Daviv, Paulus thiab Xilas yuav tsum muaj kev ntseeg ruaj khov rau tus Tswv tej lus cog tseg muaj hwjchim.
Peb yog cov uas nrog tus Tswv Yexus mus kuj khiav tsis dhau tej kev txomnyem, sim siab, tiamsis tus Tswv tsis tso peb tseg, Nws niaj hnub nrog peb nyob, txhawb zog thiab cawm peb. Peb tsis yog hnov tus Tswv Txojlus los ntawm Nws cov cevlus, tiamsis Vaj Ntsujplig nrog nraim peb thiab hnov Vajtswv Txojlus los ntawm Phau Vajluskub. Peb kawm xyaum Vajntxwv Yehausafas tus qauv thiab cov neeg uas muaj kev ntseeg kom peb niaj hnub ua tus Tswv tsaug txawm yog txomnyem thiab tau zoo los peb paub tus Tswv nrog nraim, saib xyuas peb.
Thov Vajtswv,
Tus Tswv, thov Koj pub rau nyuam yaus muaj lub siab hu nkauj qhuas Koj thaum ntsib tej kev txomnyem, rau qhov nyuam yaus ntseeg ruaj Koj tej lus hais hauv Phau Vajluskub. Amees.
Peb puas ntseeg ruaj thiab zoo siab qhuas tus Tswv tom qab uas yus qhia tej teebmeem rau tus Tswv?
Nyeem Vajluskub hauv peb lub xyoo: Lukas 9:1-36
Kênh Youtube BHKTHN:
