Qhuas Tus Tswv – 31/12/2021

715

 

Yaxayas 25:1-9

1 Tus Tswv, koj yog kuv tus Vajtswv; kuv yuav hwm koj thiab qhuas koj lub npe. Koj tau ua ntau yam txujci tseemceeb tiav tas los lawm; koj ua ncaj ua ncees thiab ua tseeb raws li koj tau npaj tseg puag thaum ub los lawm. 2 Koj tau ua rau ntau lub nroog puastsuaj tas, thiab muab lawv tej chaw fajxwm rhuav povtseg huv tibsi. Tej loog uas peb cov yeebncuab ua tseg rau hauv lub nroog yuav tsis txhim kho ntxiv mus tas, ibtxhis. 3 Txhua haivneeg uas muaj zog yuav qhuas koj; Tej nroog uas tej haivneeg limhiam nyob yuav ntshai koj. 4 Koj yog lub chaw cawm siav rau cov neeg pluag thiab txomnyem, thiab cawm lawv dim thaum lub sijhawm uas lawv ntsib kev nyuaj siab. Koj yog lub tsev rau lawv nraim nagxob nagcua thiab yog tus duab ntxoov ntxoo rau lawv nraim tshav. Cov neeg limhiam ntaus lawv ib yam li cua daj cua dub ntsawj thaum lub caij ntuj no 5 thiab ib yam li tshav kub heev hauv lub tebchaws ntuj qhua teb nkig. Tiamsis Vajtswv, koj tau ua rau peb tej yeebncuab ploj tas lawm; koj ua rau cov neeg limhiam tej suab qw ntsiag tas ib yam li tauv huab roos tshav ntuj kub. 6 Nyob saum Roob Xi-oos, tus Tswv uas muaj hwjchim loj kawg nkaus yuavnpaj ib rooj mov rau txhua haivneeg hauv ntiajteb noj, yog ib rooj mov uas muaj tej zaub mov thiab tej cawv uas qab heev. 7 Thaum nyob saum lub roob nws yuav muab txhua haivneeg tej kev nyuaj siab uas zoo ib yam li tauv huab tshem mus povtseg. 8 Tus Tswv uas kav ib puas tsav yam yuav rhuav txojkev tuag kom puastsuaj mus ibtxhis; nws yuav so txhua tus lub kua muag, thiab nws yuav rhuav qhov uas lub ntiajteb no tsimtxom nws haivneeg. Tus Tswv yog tus hais tej lus no. 9 Thaum muaj tej xwmtxheej no lawm, txhua tus neeg yuav hais tias, “Nws yog peb tus Vajtswv! Peb tso siab plhuav rau nws, thiab nws tau cawm peb txojsia. Nws yog tus Tswv! Peb tso siab plhuav rau nws; nimno peb zoo siab thiab xyivfab heev vim nws cawm peb dim lawm.”

 

Nqi cim: 

“Tus Tswv, koj yog kuv tus Vajtswv; kuv yuav hwm koj thiab qhuas koj lub npe. Koj tau ua ntau yam txujci tseemceeb tiav tas los lawm; koj ua ncaj ua ncees thiab ua tseeb raws li koj tau npaj tseg puag thaum ub los lawm” (Yaxayas 25:1).

 

Lus nug rau sawvdaws xav: 

  • Xibfwb Yaxayas qhuas tus Tswv vim yam dab tsi?
  • Koj tab tom ntsib kev txomnyem li cas?
  • Yam dab tsis pab tau koj hla dhau kev txomnyem kom zoo siab qhuas tus Tswv?

Tus cevlus Yaxayas tau hu ib zaj nkauj qhuas tus Tswv, ua Vajtswv tsaug vim tau tus Tswv tsomkwm hauv “tus Tswv hnub” los ntawm peb yam li no. Tim ib, Yaxayas qhuas tus Tswv vim tej txujci loj thiab tseemceeb uas tus Tswv tau ua los lawm (nqi 1-3). Tus Tswv yeej ncaj ncees thiab ua tseeb raws li tej uas nws tau npaj tseg los lawm. Tej nroog yuav loj thiab vam meej npaum twg, thiab tibneeg yuav txawj ntse npaum li cas los tej ntawd puavleej tsis muaj qab hau, yuav puastsuaj ua hmoov tas rau ntawm tus Tswv lub zog. Txhua haiv neeg, txhua lub tebchaws yuav zeem paub tus Tswv lub fwjchim uas loj kawg nkaus thiab txhawb nqa tus Tswv lub npe. Tim ob, lus qhuas tus Tswv muaj tawm vim tus Tswv yog qhov chaw nkaum rau cov ntseeg nws hauv “Tus Tswv hnub” (nqi 4-5). Tus Tswv yog lub chaw nraim ruaj khov rau tibneeg thaum muaj cua daj cua dub, yog tus duab ntxoov ntxoo rau tibneeg nkaum tshav kub thiab yog tus ua rau cov neeg limhiam tej suab qw ntsiag. Tus Tswv yog lub chaw nraim ruaj khov rau nws haiv neeg txhua tus, thaum muaj tej xwm tsis zoo tshwmsim thiab thaum ntsib tej neeg limhiam caij tsuj. Tim peb, lus ua tsaug thiab qhuas tus Tswv muaj tshwm tuaj vim tus Tswv yog tus pab cawm thiab yog tus ua kom nws haiv neeg rov muaj kev zoo siab (nqi 6-9). Thaum kawg, cov neeg limhiam yuav raug puastsuaj huv tibsi, tus Tswv yuav so txhua tus lub kua muag, rhuav tshem cov neeg tsimtxom nws haiv neeg tawm mus. Tus Tswv cov neeg yuav zoo siab xyiv fab rau tus Tswv txojkev pab cawm.

Lub xyoo dhau los, ntau yam kev nyuaj siab tshwm muaj los ntawm kev cai tswj, kev nrhiav noj, kev mob kis puv thoob ntiajteb… Ntau lub nroog muaj neeg nyob xauv npo tiamsis tsis kam tawm hauv tsev mus tom kev, tej kws tshuaj pab tsis tau tsheej pua pua txhiab tus tibneeg tas simneej vim kab mob kis. Txhua yam uas tibneeg xav hais tias yog kev txawj ntse thiab yog yam ruaj khov dhau mus ua yam tsis muaj qab hau. Peb coobleej ntau tus twb ntsib lossis tab tom ntsib kev nyuaj siab. Txhua hnub, peb hnov xov txog kev tu siab ntau dua kev zoo siab, kev poob tsam ntau dua kev ua tau thiab kev tshaib nqhis ntau dua qhov uas muaj nplua mias… Tus Tswv tsis tau hais tias, nws tej menyuam yuav tsis ntsib teebmeem, tiamsis tus

Tswv cog lus hais tias nws yuav nyob nrog nraim, tiv thaiv, saib xyuas peb txhua tus ntseeg nws. Cov ntseeg Yexus yuav tsum tso siab rau tus Tswv txawm yuav ntsib ntau yam kev nyuaj siab lossis kev sim siab tuaj raug. Vajtswv yeej ua ncaj ncees thiab hlub peb, nws yuav so peb tej kua muag thiab pub peb muaj kev kaj siab, kev zoo siab hauv nws. Heev tshaj qhov ntawd, hauv “tus Tswv hnub”, tus Tswv yuav rov qab los muab nqi zog rau peb thiab peb yuav tau mus koom tus menyuam yaj rooj tshoob. Cia li ua tus Tswv tsaug thiab qhuas nws lub npe vim; “Tej teebmeem me me uas peb raug ib nyuag ntu no, yuav ua rau peb tau koob hmoov zoo uas nyob mus ibtxhis, tej teebmeem uas peb raug piv tsis tau txoj koob hmoov uas peb tau” (II Kauleethaus 4:17).

Koj puas cia siab khov kho rau tus Tswv thiab qhuas nws ntawm txhua lub sijhawm?

 

Thov Vajtswv:

Tus Tswv, nyuam yaus ua koj tsuag vim koj tau nyob nrog nyuam yaus hauv lub xyoo dhau los. Thov pab nyuam yaus niaj hnub cia siab rau tus Tswv koj thiaj ua neej kaj siab, muaj chaw vam thaum twb taubhau rau txhua yam. Thov tus Tswv koj pab nyuam yaus paub koj tej txiajntsig thiab qhuas koj tsis tseg. Ameeg.

Email: kawmvajluskubtxhuahnub@gmail.com

Kênh Youtube BHKTHN:

https://www.youtube.com/c/bhkthn

Bài trướcLong An: Bồi Linh Quý IV/2021
Bài tiếp theoBi Mni Hdơr Knga Kơ Aê Diê – 31/12/2021