Klei Aê Diê Blŭ: Y‑Êsai 25:1-9
Êlan kliăng: “Ơ Yêhôwa, ih jing Aê Diê kâo; kâo srăng mpŭ mni kơ ih, kâo srăng bi mni kơ anăn ih, kyuadah ih ngă leh klei yuôm bhăn, hdră ih mkra leh mơ̆ng ênuk đưm hŏng klei sĭt suôr leh anăn sĭt klă.” (Y‑Êsai 25:1).
Klei êmuh ksiêm mĭn: Ya klei Khua pô hưn êlâo Y‑Êsai mmuiñ bi mni hdơr knga kơ Aê Diê? Ya klei dleh dlan drei dôk găn? Ya klei đru drei hgao klei dleh dlan čiăng hơ̆k mơak bi mni hdơr knga kơ Khua Yang?
Khua pô hưn êlâo Y‑Êsai mmuñ leh klei mmuñ bi mni, hdơr knga kơ Aê Diê kyua Ñu răng kriê hlăm “Hruê Aê Diê” mơ̆ng tlâo mta phŭn êdah kdlưn. Tal sa, ñu bi mni kơ Aê Diê kyua dŭm bruă yuôm bhăn leh anăn prŏng prĭn mơ̆ng Ñu (êlan 1-3). Aê Diê jing Pô sĭt suôr, bi sĭt dŭm hdră Ñu kčah leh. Dŭm ƀuôn prŏng p’prŏng leh anăn kjăp ktang dưn mơh, wăt tơdah anak mnuih mâo lu klei thâo mĭn dưn mơh, jih jang srăng jing hơaĭ mang, dlưh rai jing ƀruih lăn ti anăp klei ktang Aê Diê. Grăp djuê ana, grăp ala čar srăng thâo kral klei myang prŏng prĭn mơ̆ng Aê Diê leh anăn mpŭ mni kơ Ñu. Tal dua, klei bi mni kơ Aê Diê dưi kwang kyua Ñu jing anôk kđap kơ hlei? pô đaŏ kơ ñu hlăm “Hruê Aê Diê” (êlan 4-5). Aê Diê jing anôk kđap êđăp ênang kơ hlei pô dôk hlăm angĭn êbŭ, jing êyui mgang kơ mđiă ktang, jing Pô mkhư̆ ênai hao hao phung tue. Aê Diê jing Boh tâo kjăp kơ grăp čô anak Aê Diê hlăm klei yan adiê ngă, klei truh jhat, klei arăng ktư̆ juă. Tal tlâo, klei bi mni, hdơr knga myơr kơ Aê Diê kyua Ñu jing Pô bi mtlaih leh anăn bi mrâo phung ƀuôn sang Ñu (êlan 6-9). Hlăm hruê knhal tuč, phung ƀai srăng djiê, Aê Diê srăng sut êa ală, mă hĕ klei hêñ phung ƀuôn sang ñu. Phung ƀuôn sang Aê Diê srăng hơ̆k mơak kyua klei Ñu bi mtlaih.”
Hlăm thŭn êgao, lu klei dleh dlan mơ̆ng bruă kđi čar, bruă duh mkra, klei ruă tưp tar ƀar anôk dlông rŏng lăn. Lu ƀuôn prŏng lu mnuih jing kriêp êyăng, bruă mdrao mgŭn mơ̆ng anak mnuih amâo dưi gang mkhư̆ ôh lu ênoh mnuih djiê hlăm klei ruă tưp. Djăp mta klei anak mnuih lač jing thâo mĭn, kjăp jing hơaĭ mang. Lu phung drei tuôm leh, leh anăn dôk găn klei dleh dlan. Grăp hruê drei hmư̆ klei ênguôt lu hĭn kơ klei mơak, klei amâo tŭ jing lu hĭn kơ klei tŭ, ư̆ êpa lu hĭn kơ trei mđao… Aê Diê amâo lui ôh klei truh kơ phung ƀuôn sang Aê Diê ƀiădah Ñu ƀuăn nao mbĭt nanao, răng mgang, kriê dlăng phung drei. Phung đaŏ kơ Krist brei dôk kjăp hlăm Khua Yang wăt tơdah tlă anăp hŏng lu klei dleh dlan, lông dlăng. Aê Diê jing pô sĭt suôr leh anăn khăp kơ drei, Ñu srăng sut êa ală kơ drei, leh anăn brei kơ drei klei êđăp ênang, klei hơ̆k mơak hlăm Khua Yang. Hĭn mơh, hlăm “Hruê Aê Diê”, Ñu srăng lŏ hriê, brei klei pah mni leh anăn brei drei dưi mŭt hlăm Klei Bi Kuôl Êđai Biăp. Brei bi mni leh anăn hdơr knga kơ Aê Diê “Kyuadah klei knap mñai hdjul bhiâo anei mjing kơ hmei klei guh kơang prŏng hĭn hlŏng lar êgao kơ arăng dưi mkă” (II Kôrantô 4:17).
Drei dôk kjăp hlăm Khua Yang leh anăn bi mni kơ Ñu hlăm djăp boh klei mơ̆?
Wah lač: Ơ Khua Yang, kâo bi mni kơ Ih kyua Ih dôk mbĭt hŏng kâo hlăm jih thŭn êgao. Akâo kơ Ih đru kâo dôk kjăp hlăm Khua Yang leh anăn hdĭp êđăp ênang, čang hmăng hlăm djăp boh klei. Akâo kơ Ih đru kâo thâo hdơr knga leh anăn bi mni nanao kơ Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 2:10-41
Kênh Youtube BHKTHN:
