Mathais 16:25-26
Nqe cim:
“Rau qhov tus uas khuvxim nws txojsia, tus ntawd yuav tsis tau txojsia, tiamsis tus uas tsis khuvxim nws txojsia, vim nws ntseeg kuv, tus ntawd yuav tau txojsia.” (Mathais 16:25).
Lus nug rau sawvdaws xav:
– Tswv Yexus qhia paub cov neeg uas khuvxim nws txojsia yuav zoo li cas?
– Cov neeg uas tuag vim tus Tswv yuav zoo li cas?
– Ntawm tus ntsujplig thiab tej kev tau zoo hauv lub ntiajteb, yam twg muaj nqis dua?
Tswv Yexus rov hais ntxiv txog lub ntsiab ntawm qhov uas tso yus tseg thiab ua siab ntev tiv txomnyem nrog tus Tswv mus los ntawm qhov uas muab lub neej nyob ntiajteb thiab ntsujplig sib piv. Tus Tswv qhia hais tias yog leejtwg ua neej nyob tsuas npaj rau tej yam uas nyob ib vuag hauv ntiajteb no ces tus ntawd yuav poob tagnrho txhua yam, thiab tsis tau txojsia ntev dhawv mus ibtxhis. Lo lus “khuvxim txojsia” qhia paub tus neeg ntawd siv zog tiv thaiv, ua kom nws lub neej hauv ntiajteb no npluanuj, tiamsis nws yuav tsis tau tej ntawd, rau qhov txojsia nyob ntiajteb no yeej yuav xaus mus. Tsuas yog tus uas txaus siab hlo nrog tus Tswv mus, tiv txomnyem, qee zaug raug tuag sab nqaij tawv thiaj tau txojsia ntev dhawv mus ibtxhis.
Tswv Yexus qhia rau cov thwjtim paub qhov muaj nqis ntawm sab ntsujplig thiab txojsia ntev ibtxhis tseemceeb li cas thaum Nws muab sab ntsujplig thiab tej uas nyob hauv ntiajteb no sib piv, tus Tswv nug, “yog leejtwg tau ib puas tsav yam hauv ntiajteb no los ua nws tug, tiamsis nws txojsia tu lawm, tej ntawd yuav muaj nqis dabtsi rau nws? yeej tsis muaj ib yam dabtsi uas nws yuav coj mus txhiv tau nws txojsia rov qab los.” (nqe 26), teb Tswv Yexus lo lus nug no hais tias tsis muaj ib yam nyob hauv ntiajteb no muaj nqis npaum sab ntsujplig thiab txojsia, tsuas yog tus neeg uas ncaj ncees nrog tus Tswv xwb thiaj tau txojsia ntev ibtxhis.
Nimno muaj ntau tus ntseeg xav nrog tus Tswv mus tiamsis tsis muab tus Tswv tso ua tus thawj hauv lub neej. Lawv xav nrog tus Tswv mus tiamsis tsis kam tso yus tus kheej tseg; tsis kam tiv txomnyem vim tus Tswv. Yog peb tsuas “khuvxim txojsia” tamsim no ces txhais tau tias peb tabtom caum kev npluanuj, kev vammeej, kev tau zoo xwb, peb yuav tsis tau txojsia ntev mus ibtxhis. Thov tus Tswv muab Nws Txojlus hnub no qhia kom peb hloov tshiab, vim tus Tswv peb txaus siab tso yus tseg nrog tus Tswv mus, thiab qee zaus txojsia yuav tu los yeej txaus siab hlo nrog tus Tswv mus. No tsis yog ib txoj kev xaiv dig muag lossis ruam tiamsis peb paub tias txojsia nyob mus ibtxhis muaj nqis dua tej uas nyob hauv ntiajteb no. Tsis muaj qab hau yog tias peb tau tagnrho tej uas nyob hauv lub ntiajteb no los ua peb tug, tiamsis peb txojsia tu tsis tau mus nyob saum ntuj ceebtsheej.
Thov Vajtswv,
Tus Tswv, thov Koj pab kom nyuam yaus paub xaiv qhov uas nrog Koj mus txog thaum kawg, txawm yog yuav tiv txomnyem, poob txhua yam los nyuam yaus ntseeg tias nyuam yaus yuav tau nrog Koj nyob saum ntuj ceebtsheej ci ntsa iab. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Xaiv qhov txaus siab hlo fij tus kheej, tiv txomnyem ua neej pub rau tus Tswv los yog xaiv qhov uas caum tej kev ntshaw lub ntiajteb es thaum kawg tuag mus ibtxhis hauv ntuj tawg? Thaum tseem ua neej nyob no, peb yuav xaiv ua qhov twg?
Nyeem Vajluskub hauv peb lub xyoo: Teev Npe 19
Kênh Youtube BHKTHN:
