Klei Aê Diê Blŭ: Y-Mathiơ 16:25-26
Êlan kliăng: “Kyuadah hlei pô čiăng bi mtlaih klei hdĭp ñu srăng luč gơ̆, ƀiădah hlei pô bi luč klei hdĭp ñu kyua kâo srăng bi mtlaih gơ̆” (Y-Mathiơ 16:25)
Klei êmuh ksiêm mĭn: Khua Yang Yêsu brei thâo hlei pô čiăng mtlaih klei hdĭp ñu si srăng jing? Hlei pô kyua Khua Yang luč klei hdĭp pô si srăng jing? Ya klei jing yuôm hĭn plah wah mngăt leh anăn klei mdrŏng sah hlăm lăn ala?
Khua Yang Yêsu lŏ dơ̆ng mblang klei yuôm bhăn mơ̆ng klei lăm lui pô leh anăn tŭ klei dleh dlan lông dlăng tơdah tui hlue Khua Yang hŏng klei bi msĕ plah wah klei hdĭp ti lăn ala anei leh anăn klei hdĭp mngăt. Khua Yang mtô hlei pô hdĭp ƀiădah mđing kluôm dhuôm hlăm klei jing êjai ti lăn ala anei snăn pô anăn srăng luč jih jang leh anăn amâo mâo klei hdĭp hlŏng lar ôh. Boh blŭ “mtlaih klei hdĭp” brei ƀuh pô anăn dôk gĭr jih ai tiê čiăng răng mgang, ngă kơ klei hdĭp pô ti lăn ala jing mdrŏng sah, ƀiădah knhal tuč pô anăn srăng amâo mâo ya mta klei ôh kyua klei hdĭp ti lăn ala êlâo êdei ăt mjưh mdei. Knŏng hlei pô dôk hdĭp hlăm Khua Yang, tŭ klei dleh dlan boh nik klei djiê hlăm asei mlei snăn srăng ƀuh klei hdĭp hlŏng lar.
Khua Yang Yêsu mtô kơ phung ƀĭng kna thâo kơ ênoh yuôm klei hdĭp mngăt leh anăn klei hdĭp hlŏng lar si jing tơdah Ñu mkă plah wah mngăt hŏng jih jang mnơ̆ng hlăm lăn ala, Khua Yang êmuh, “Kyuadah ya tŭ dưn kơ sa čô mnuih tơdah ñu mâo jih lăn ala ƀiădah mngăt ñu luč? Amâodah ya mnơ̆ng ñu srăng brei čiăng bi tui mngăt ñu?” (êlan 26), leh anăn klei wĭt lač kơ klei Khua Yang Yêsu êmuh jing amâo mâo sa mta klei hlăm lăn ala mâo ênoh yuôm msĕ si mngăt ôh kyua mngăt adôk hlŏng lar leh anăn phung hdĭp sĭt suôr hŏng Khua Yang srăng dưi brei klei hdĭp lă lar.
Hruê anei lu phung đăo čiăng tui hlue Khua Yang ƀiădah amâo dưm ôh Khua Yang jing mrô sa hlăm klei hdĭp. Diñu čiăng tui hlue Khua Yang ƀiădah amâo tŭ ư lui pô ôh; amâo tŭ ư klam klei dleh dlan hŏng Khua Yang ôh. Tơdah drei knŏng kƀĭn “mtlaih klei hdĭp pô” hlăm klei hdĭp ti lăn ala anei, jing drei dôk tui tiŏ klei mdrŏng sah, hing ang, klei dưi snăn drei srăng bi luč klei hdĭp hlŏng lar. Akâo kơ Khua Yang đru drei mâo Klei Aê Diê Blŭ mñă čiăng bi mlih, čuăn ngă kyua Khua Yang tla ênoh, lui pô čiăng tui hlue ñu, boh nik tơdah klei hdĭp hmăi djŏ ăt čuăn năng hŏng Khua Yang hlăm klei đăo srăng săn asei kơ Ñu.
Anei amâo djŏ jing sa klei ruah amâo djŏ ôh ƀiădah drei thâo klei hdĭp lă lar yuôm hĭn kơ djăp mta klei hlăm lăn ala anei. Amâo jing tŭ dưn ôh leh anăn amâo mâo klei čang hmăng ôh tơdah drei mâo jih jang mnơ̆ng hlăm lăn ala anei ƀiădah mngăt drei amâo mâo klei jăk mơak lă lar hlăm ƀuôn ala mtao, luč hĕ lă lar hlăm war pui.
Ruah săn asei, tŭ klei dleh dlan čiăng hdĭp kơ Khua Yang amâodah ruah hdĭp kơ pô, tui tiŏ klei hdĭp ti lăn ala anei leh anăn djiê hĕ lă lar hlăm war pui? Jih jang tui si klei grăp čô čuăn ruah tơdah adôk hdĭp ti lăn ala anei. Ya klei drei ruah?
Wah lač: Ơ Khua Yang, akâo kơ Ih đru kâo ruah klei thâo mĭn, klă mngač čiăng tui hlue Khua Yang truh knhal tuč wăt tơdah tŭ lu klei luč liê, dleh dlan ƀiădah kâo thâo sĭt kâo srăng dưi dôk hŏng Khua Yang lă lar hlăm Ƀuôn Ala Mtao guh kơang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
