Klei Aê Diê Blŭ: Y‑Êsai 9:2
Êlan Kliăng: “Phung ƀuôn sang êbat leh hlăm klei mmăt ƀuh leh klei mngač prŏng. Klei mngač mtrang leh kơ phung dôk hlăm čar mmăt tĭt.” (Y‑Êsai 9:2)
Klei êmuh ksiêm mĭn: Si boh klei phung ƀuôn sang Aê Diê jing leh anăn ya klei Aê Diê ƀuăn brei kơ diñu? Klei mngač lač kơ hlei pô? Klei Khua Yang Yêsu trŭn hriê ti lăn ala si bi sĭt leh klei ƀuăn anei?
Lu êtuh thŭn êlâo kơ Khua Yang Yêsu trŭn hriê ti lăn ala, Khua pô hưn êlâo Y‑Êsai lač leh kơ boh klei knap mñai mnuih ƀuôn sang Aê Diê jing. Diñu “êbat hlăm anôk mmăt”, leh anăn “ti krĭng jing êyui kơ klei djiê”. “Anôk mmăt tĭt” lač kơ klei soh, jhat ƀai, kbưi hŏng Aê Diê jing klei mngač guh kơang. “Êyui mơ̆ng klei djiê” lač kơ klei truh kjham snăk diñu dơ̆ng tlă anăp, klă klơ̆ng jing lăn čar dơ̆ng mâo phung roh kwang dar, klei hdĭp arăng arưp aram. Hlăm klei knap mñai kjham snăk hlăk anăn, Klei Aê Diê Blŭ ƀuăn hŏng diñu srăng dưi ƀuh “klei mngač prŏng” leh anăn klei mngač anăn srăng mtrang, srăng guôm diñu.
Klei mngač prŏng tinei lač kơ klei Aê Diê bi mtlaih. Ñu amâo brei phung ƀuôn sang Ñu dôk nanao hlăm klei soh diñu ôh. Ñu srăng mtrang mngač kơ digơ̆, ba digơ̆ wĭt kơ klei sĭt nik myang yuôm bhăn čiăng dưi ba digơ̆ mơ̆ng ƀuôn ala mtao klei djiê nao kơ ƀuôn ala mtao klei hdĭp. Phung ƀuôn sang Israel thâo săng klei mngač prŏng lač kơ Pô Bi Mtlaih. Kyua hlăm dŭm êlan êdei anăn, Khua pô hưn êlâo Y‑Êsai lač, “Kyuadah kkiêng leh kơ drei sa čô anak, brei leh kơ drei sa čô anak êkei; leh anăn ñu srăng klam klei kiă kriê ti mra ñu. Leh anăn arăng srăng pia anăn ñu, Pô Yuôm Bhăn, Khua Kčĕ, Aê Diê Myang, Ama Dôk Hdĭp Hlŏng Lar, Khua kơ Klei Êđăp Ênang” (Y‑Êsai 9:6).
Hlăm sa mlam mmăt mơ̆ng êbeh 2000 thŭn êlâo, Pô Bi Mtlaih trŭn hriê jing mnuih. Sa mlam mmăt tĭt kriêp ñăt mtrang mngač leh kyua mâo phung dĭng buăl jăk hlăm adiê, hưn lar klei mơak kơ jih jang mnuih Pô Bi Mtlaih arăng kkiêng leh. Khua Yang Yêsu hriê jing mnuih, hdĭp ti krah anak mnuih, jing klei mngač prŏng mtrang ti anôk mmăt tĭt. Ñu Pô lač leh, “Yêsu lŏ blŭ kơ phung diñu, lač, “Kâo jing klei mngač kơ lăn ala. Hlei pô tui hlue kâo amâo srăng êbat hlăm klei mmăt ôh, ƀiădah srăng mâo klei mngač kơ klei hdĭp” (Y‑Yôhan 8:12).
Grăp yan Noel truh, dŭm ktuê êlan arăng bi msiam hŏng lu pui mtrang mngač ƀlêč ƀlir. Ƀiădah ti tluôn pui mtrang mngač anăn jing klei hdĭp dleh dlan, jing phung mnuih dôk êbat ƀiădah amâo thâo ôh klei kñăm kơ klei hdĭp pô. Drei mơak tơdah ƀuh pui mtrang mngač ƀiădah knŏng hjăn Khua Yang Yêsu dưi bi mtlaih drei mơ̆ng klei mmăt tĭt hlăm klei hdĭp. Akâo kơ Khua Yang brei kơ drei yan Noel thŭn anei mâo klei mngač prŏng Khua Yang leh anăn kah mbha klei mngač anăn kơ lu mnuih.
Si drei čang hmăng kah mbha klei mngač prŏng truh hŏng phung dôk hdĭp hlăm klei mmăt?
Wah lač: Ơ Khua Yang khăp hơiêng, ti krah klei jăk siam ƀlêč ƀlir hlăm yan Noel, ti êngao dih adôk lu klei hdĭp ăt dôk soh čhuai hlăm klei mmăt tĭt, amâo mâo ôh klei mngač kơ klei hdĭp. Akâo kơ Ih đru kâo thâo mprăp ai tiê čiăng kơ klei mngač Ih mtrang mngač, leh anăn thâo ba yua klei găl anei čiăng ba klei bi mtlaih kơ hlei pô ka thâo kral Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
