Mathais 6:9-13
Nqe cim:
“Tiamsis thaum nej thov Vajtswv, nej cia li mus rau hauv txaj thiab kaw rooj paim tso, nej mam li thov nej Leej Txiv tus uas nej qhovmuag tsis pom. Nws thiaj yuav muab nqi zog rau nej” (Mathais 6:6)
Lus nug rau sawvdaws xav:
– Peb muaj cai hu Vajtswv li cas?
– Hauv zaj lus thov Vajtswv, Tswv Yexus tau muab ib tug qauv qhia kom peb paub thov Vajtswv li cas?
– Peb tau ntuas yam dabtsi dhau zaj lus thov Vajtswv Tswv Yexus qhia?
Hauv Mathais 6:9-13, Tswv Yexus qhia tawm tus cai sau zog txog cov ntsiab lus thov Vajtswv, tig xubntiag mus rau ntawm Vajtswv ua ntej, tom qab ntawd tig los rau ntawm peb. Vajtswv cov menyuam tau txoj koob hmoov tshwjxeeb loj heev uas tau hu Vajtswv ua “Txiv”. Lolus “peb” hauv zaj lus thov Vajtswv yog hais txog sawvdaws ntau dua li ib leeg. Cov ntseeg tau hu Vajtswv ua txiv los ntawm Tswv Yexus kev tuag txhiv peb. Soblus “saum Ntuj Ceebtsheej” qhia hais tias Vajtswv yog tus ua tau ib puas tsav yam. Tus uas pom qhov nraim nkoos, paub peb lub siab thiab teb peb tej lus thov. Peb tau txhawb zog tsis ntshai mus cuag Vajtswv, tiamsis yuavtsum mus cuag Vajtswv los ntawm lub siab hwm Nws (Henplais 4:14-16).
Vajtswv Nws yeej ib txwm yog tus dawbhuv “Thov kom sawvdaws hwm koj lub npe” vim li ntawd tej lus thov Vajtswv ntuas kom peb paub siv lub neej ua rau Vajtswv tau ntsejmuag (1 Kauleethaus 10:31). Lolus thov Vajtswv “Thov cia koj lub tebchaws los” (HMOWSV) qhia txog qhov chaw uas Vajtswv tswj kav. Niaj hnub nimno Vajtswv lub tebchaw qhovmuag ntsia tsis pom, yog hauv peb lub siab uas Vaj Ntsujplig tabtom tswj kav (1 Kauleethaus 6:19).
Los ntawm tibneeg “Thov koj pub mov rau peb muaj noj hnub no” ntuas peb hais tias tej khoom qhov txhia chaw ntawm sab nqaij tawv puav leej yog Vajtswv tej koob hmoov kom peb paub ua Vajtswv tsaug, txhob xav tias yog yus cim civ muaj txaus txhua yam, khav theeb thaum vammeej, npluanuj (2 Kevcai 8:17-18). Hais ua lwm seem, kuj tsis txhob txhawj dhau thaum tsis muaj txhua yam uas cheemtsum ntawm sab nqaij tawv (Mathais 10:29-31).
Thaum thov Vajtswv “Thov koj zam txim rau peb ib yam li peb twb zam txim rau cov uas ua txhaum rau peb lawm” ntuas peb txog txoj kev sib raug zoo ntawm peb thiab Vajtswv thiab lwm tus. Kev txhaum yog qhov vimchiv uas ua tu txoj kev sib raug zoo no. Peb yuavtsum pheej tshuaj xyuas yus tus kheej thiab lees kev txhaum (1 Yauhas 1:8-9) thiab zam txim rau tus uas ua mob yus (Mathais 6:14-15). Thaum thov Vajtswv “Thov koj tsis txhob cia tej kev sim siab ntxias tau peb, tiamsis thov koj pab kom peb dim ntawm dab Ntxwgnyoog txhais tes”, ntuas peb ceevfaj txog dab ntxwgnyoog txoj kev dag ntxias, nws yog tus uas nrhiav nrhws kev ua rau Vajtswv cov menyuam mob. Vajtswv Txojlus txhawb kom peb cia li sawv ruaj hauv kev ntseeg txog Vajtswv lub hwjchim thiab tawmtsam dab ntxwgnyoog (1 Petus 5:8-9).
Tswv Yexus qhia tus cai rau peb paub thov Vajtswv kom thov yog cai thiab haum Vajtswv siab. Hauv lub sijhawm thov Vajtswv yuavtsum qhia tshwm lub siab hwm thiab ntseeg Vajtswv. Peb yuavtsum pheej tshuaj xyuas yus, lees txim, ceevfaj txhua txoj kev dag ntxias uas yuav ua kev mob rau yus tus kheej, lwm tus thiab ua rau Vajtswv tu siab.
Thov Vajtswv,
Vaj Leej Txiv tus uas muaj kev hlub, ua tsaug uas Koj qhia nyuam yaus paub thov Vajtswv. Thov qhib nyuam yaus lub qhov muag kom nyuam yaus pom hais tias thaum uas nrog Koj sib tham yog lub sijhawm uas zoo tshaj. Thov pab kom nyuam yaus txawj txuas nrog Leej Txiv saum ntuj txhua lub sijhawm. Nyuam yaus tuav Yexus Khetos lub npe thov, Amees.
Peb puas thov Vajtswv raws li tus qauv uas tus Tswv qhia?
Nyeem Vajluskub hauv peb lub xyoo: Phau Ntawv Nkauj 27-28
Kênh Youtube BHKTHN:
