Klei Aê Diê Blŭ: Y‑Mathiơ 6:9-13
Êlan kliăng: “Ƀiădah tơdah ih wah lač, mŭt hlăm adŭ ih, kđăl hĕ ƀăng bhă, leh anăn wah lač kơ Ama ih Pô dôk hlăm anôk hgăm, leh anăn Ama ih Pô ƀuh hlăm anôk hgăm srăng mưn ih.” (Y‑Mathiơ 6:6)
Klei êmuh ksiêm mĭn: Si drei dưi iêô kơ Khua Yang? Hlăm klei Wah lač Jih jang, si jar Khua Yang Yêsu brei čiăng kơ drei thâo Wah lač? Ya klei mñă kơ drei mơ̆ng klei Khua Yang bi hriăm Wah lač?
Hlăm Y‑Mathiơ 6:9-13, Khua Yang Yêsu brei jar kluôm kơ mta phŭn klei Wah lač, êlâo hĭn kơ Aê Diê, êdei anăn kơ drei pô. Phung anak ƀuôn sang Aê Diê mâo klei pap prŏng êdimi dưi iêô kơ Aê Diê jing “Ama”. Boh blŭ “hmei” ktuê jih klei wah lač kñăm kơ phung lu, hĭn kơ hjăn pô dê. Phung đăo kơ Krist mâo klei pap dưi iêô kơ Aê Diê jing Ama, kyua mơ̆ng klei Khua Yang Yêsu tŭ klei djiê bi tui brei klei soh drei. Boh blŭ “dôk hlăm adiê” čiăng mñă kơ drei hdơr kơ Ñu jing Pô myang hĭn, kdlưn hĭn kơ jih jang mnơ̆ng hrih mjing. Pô ƀuh jih hlăm anôk hgăm, thâo klă ai tiê leh anăn wĭt lač kơ klei kwưh akâo. Drei mâo klei bi mđĭ ai jhŏng nao giăm Khua Yang, ƀiădah brei nao kơ Ñu hŏng ai tiê mpŭ mni (Hêbrơ 4:14-16).
Hŏng Khua Yang, Ñu jing Pô Doh Jăk, “Anăn Ama mâo klei mpŭ doh jăk”, kyuanăn klei kwưh akâo mñă kơ drei yua klei hdĭp drei pô bi guh kơang kơ Anăn Khua Yang (I Kôrantô 10:31). Boh blŭ wah lač “Ƀuôn ala mtao … ti lăn ala msĕ si hlăm adiê” bi êdah ƀuôn ala mtao Khua Yang jing anôk Khua Yang kiă kriê. Ară anei, ƀuôn ala mtao Khua Yang drei amâo thâo ƀuh ôh, ƀiădah ƀuôn ala mtao Khua Yang dôk hlăm ai tiê phung đăo hŏng klei Yang Mngăt Jăk kiă kriê (I Kôrantô 6:19).
Hŏng anak mnuih, akâo “brei kơ hmei mnơ̆ng ƀơ̆ng huă bi djăp kơ grăp hruê” mñă kơ drei snei, Khua Yang jing Pô hơêč hmưi mnơ̆ng mnuă yua čiăng kơ drei mâo ai tiê thâo hdơr knga kơ Khua Yang, čiăng kơ đăm hưn ktưn, mgao ôh tơdah mâo klei čăt đĭ, mdrŏng sah (Klei Mtô Mñă Klei Bhiăn 8:17-18). Tĭng nah mkăn, đăm rŭng răng đei kơ mnơ̆ng mnuă yua msĕ mơh (Y‑Mathiơ 10:29-31).
Tơdah wah lač “Pap brei kơ klei soh hmei, msĕ si hmei pap brei mơh kơ mnuih bi msoh kơ hmei leh”, mñă kơ drei kơ klei drei bi mguôp hŏng Khua Yang leh anăn hŏng mnuih mkăn. Klei soh yơh jing phŭn knhal bi rai klei bi mguôp anei. Brei drei ksiêm dlăng ai tiê drei pô nanao, sĭt êmĭt, hưn klei soh (I Y‑Yôhan 1:8-9) leh anăn mâo ai tiê thâo pap brei kơ pô ngă bi ruă êka drei (Y‑Mathiơ 6:14-15). Tơdah wah lač “Đăm atăt ba hmei hlăm klei mplư ôh ƀiădah bi mtlaih hmei mơ̆ng Pô jhat”, mñă kơ drei brei răng kơ klei yang jhat mplư, ñu jing pô dôk lua kăp ngă jhat kơ phung anak ƀuôn sang Aê Diê. Klei Blŭ Khua Yang bi mđĭ ai drei brei dôk kjăp hlăm klei đăo leh anăn klei ktang myang Khua Yang čiăng bi kdơ̆ng hŏng ñu (I Y‑Pêtrôs 5:8-9).
Khua Yang Yêsu brei leh jar čiăng bi hriăm drei thâo wah lač hŏng Aê Diê Ama hŏng klei djŏ, bi mơak kơ Ñu. Êjai dôk wah lač brei drei bi êdah klei mpŭ mni leh anăn knang kơ Khua Yang. brei drei ksiêm dlăng drei pô nanao, hưn klei soh; dôk răng kơ djăp mta klei mplư, hŏng lu mta hdră êlan čiăng ngă jhat kơ drei pô, kơ mnuih mkăn, leh anăn ngă bi ênguôt kơ Khua Yang.
Si ngă drei khăng wah lač tui si jar Khua Yang mtô mơ̆?
Wah lač: Ơ Ama khăp mpŭ, bi mni kơ Ama bi hriăm leh kâo wah lač. Akâo Ih pŏk brei ală kâo čiăng kơ kâo thâo ƀuh mnĭt mmông bi mguôp hŏng Ama jing mnĭt mmông jăk mmih bŏ hŏng klei jăk jĭn. Brei kâo dôk hdĭp nanao hlăm klei bi mguôp hŏng Ama hlăm adiê. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: Klei Mmuñ Hđăp 27-28
Kênh Youtube BHKTHN:
