Mathais 20:29-34
Nqe cim:
“Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhovrooj rau nej” (Mathais 7:7)
Lus nug rau sawvdaws xav:
– Ob tug dig muag zaum ntawm ntug kev thov dab tsi thaum Tswv Yexus mus dhau kev?
– Txawm raug pab neeg coob coob thaiv kev los vim cas ob tug dig muag txeev ua siab ntev taij thov?
– Peb kawm tau dab tsi txog tus cwjpwm ua siab ntev thov?
Nov yog Tswv Yexus ncua kev zaum kawg ntawm Kalilais mus rau Yeluxalees hauv lub caij ua kevcai Hla Dhau. Tswv Yexus tabtom taug kev hauv cheebtsam lub nroog Yelikaus qaumteb sab hnub poob Yeluxalees, deb kwvyees li 27 kilumev. Lub nroog Yelikaus qub tiam Vajluskub qub twb raug puastsuaj thiab muab pov tseg lawm, ib lub nroog tshiab uas yog vajntxwv Helauj ua dua nrug deb qhov qub kwvyees 2 kilumev rau sab qabteb. Tswv Yexus tawm hauv lub nroog qub (nqe 29) thiab mus rau lub nroog tshiab (Lukas 18:35). Kevcai Hla Dhau yog ib lub kevcai loj ua ntev xya hnub (Levis Kevcai 23:5-6), txhua tus txiv neej yuavtsum mus rau hauv Yeluxalees koom kevcai Hla Dhau (2 Kevcai 16:16). Vim li ntawd, lub sijhawm no muaj tibneeg coob heev rov los rau hauv Yeluxalees. Thiab lub sijhawm no yog caij rau cov neeg thov khawv noj zaum ntawm tej ntug kev thov khawv.
Hnub ntawd muaj ob tug dig muag zaum ntawm ntug kev. Thaum hnov pab tibneeg coob coob mus dhau kev, ob tug digmuaj nug thiab paub Tswv Yexus tabtom tuaj txog qhov ntawd ces nkawd txawm hu nrov nrov hais tias, “Daviv tus Tub! Thov koj hlub wb!” lolus “Daviv tus Tub!” yog lub npe rau tus Mexiyas uas cov cev lus tiam Vajluskub qub tau hais txog (Yaxayas 9:5-6; 11:1; Yelemis 23:5-6). Ob tug digmuag no ntseeg hais tias Tswv Yexus yog tus Mexiyas uas tau hais tseg lawm, Nws muaj hwjchim kho tau txhua yam kev mob nkees, “Tus neeg digmuag yuav pom kev, thiab tus lagntseg yuav hnov lus” (Yaxayas 35:5-6). Vim li ntawd, lawv lub suab hu nrov nrov tsis yog thov khawv noj tiamsis yog thov Tswv Yexus kho kom lawv pom kev.
Pab neeg coob coob uas nrog Tswv Yexus mus xav hais tias Tswv Yexus yog ib tug tibneeg tseemceeb heev, tabtom mus rau Yeluxalees ua tes haujlwm loj, lawv tsis xav kom Nws raug ntxhov siab rau tej yam me me uas cov neeg thov khawv ua thiab yog cov tibneeg uas tsis nyob nrog zej zog, yog li ntawd, lawv cem ob tug neeg digmuag thiab hais kom lawv nyob twjywm. Tiamsis nkawm kavliam pab neeg coob coob txoj kev thaiv, nkawm haj yam hu nrov dua qub ntxiv hais tias: “Daviv tus Tub! Thov koj hlub wb!”. Thaum kawg nkawd tau Tswv Yexus kho qhovmuag pom kev thiab nkawd txiav txim nrog Tswv Yexus mus.
Ob tug tibneeg digmuag ua siab ntev thov Tswv Yexus vim lawv ntseeg tseeb hais tias Tswv Yexus yog tus kho tau lawv. Lawv thov Tswv Yexus ntawm ib lub homphiaj meej tseeb, yog li ntawd, lawv tsis cia ib yam kev nyuaj twg yuav los thaiv tau lawv. Tswv Yexus hais tias: “Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhovrooj rau nej. Rau qhov txhua tus uas thov yeej yuav tau, txhua tus uas nrhiav yeej ntsib, thiab txhua tus uas khob, Vajtswv yeej yuav qhib qhovrooj rau nws” (Mathais 7:7-8). Thov Vajtswv pab kom peb muab peb lub neej tso rau ntawm Vajtswv tus muaj kev hlub lub xubntiag, ib yam li tus menyuam mos uas nyob hauv leejniam xubntiag. Tsis qaug zog thaum ua tsis tau ib yam dab tsi twg tiamsis txeev ua siab ntev thov Vajtswv thiab khob qhov rooj mus txog thaum “ua tau raws li koj lub siab nyiam ib yam li cov uas nyob saum ntuj”.
Thov Vajtswv,
Vaj Leej Txiv tus uas muaj kev hlub, thov pab nyuam yaus kom muaj lub siab tawv los cuag Koj ua siab ntev thov tej yam uas haum Koj siab. Txawm yog yuav muaj tej yam kev nyuaj twg los txeev ua siab ntev thov. Nyuam yaus tuav Tswv Yexus Khetos lub npe thov. Amees.
Ib tsoom mloog uas hmov tshua,
Peb puas yoojyim qaug zog thiab tso tseg kev thov Vajtswv rau ib yam kev cheemtsum twg thaum uas thov ntev loo los lawm?
Nyeem Vajluskub hauv peb lub xyoos: Yaxayas 30
Kênh Youtube BHKTHN:
