Klei Aê Diê Blŭ: Y-Mathiơ 20:29-34
Êlan kliăng: “Akâo bĕ, leh anăn arăng srăng brei kơ diih; duah bĕ, leh anăn diih srăng ƀuh; khŏk bĕ, leh anăn arăng srăng pŏk brei kơ diih.” (Y-Mathiơ 7:7)
Klei êmuh ksiêm mĭn: Ya klei dua čô bum ală dôk ti djiêô êlan ur kwưh tơdah hmư̆ Khua Yang Yêsu găn tinăn? Ya ngă dua čô bum ală ăt dôk gĭr kwưh akâo mơh wăt tơdah phung lu ghă bi kgăn digơ̆? Ya klei drei hriăm kơ knuih dôk gĭr kwưh akâo?
Anei jing knhuang êlan knhal tuč, Khua Yang kbiă mơ̆ng ƀuôn Yêrikô nao kơ ƀuôn Yêrusalem hlăm knăm Ƀơ̆ng Klei Găn. Khua Yang dôk êbat găn ƀuôn Yêrikô, tĭng phă yŭ dưr ƀuôn Yêrusalem, kbưi hlăm brô 27 kilômet. Ƀuôn Yêrikô hlăk đưm ênuk Klei Bi Mguôp Hđăp dlưh rai leh, leh anăn lui ênguôl, mâo sa boh ƀuôn mrâo mtao prŏng Hêrôt mdơ̆ng, tĭng phă dhŭng hlăm brô 2 kilômet. Khua Yang Yêsu kbiă leh mơ̆ng ƀuôn đưm (êlan 29) leh anăn dôk êbat dơ̆ng truh kơ ƀuôn mrâo (Y-Luk 18:35). Knăm Ƀơ̆ng Klei Găn jing sa knăm prŏng sui hruê truh kơ kjuh hruê (Bruă Lêwi 23:5-6), jih jang phung êkei brei nao sơăi bi kƀĭn mbĭt ti Yêrusalem (Klei Mtô Mñă Klei Bhiăn 16:16). Kyuanăn, hlăk anăn mâo lu snăk mnuih êbat nao. Leh anăn anei yơh jing mmông găl kơ phung knap mñai hiu dan dôk ti djiêô êlan kăp čiăng akâo mnơ̆ng pap.
Hruê anăn mâo dua čô bum ală dôk ti djiêô êlan. Tơdah hmư̆ ênai hao hao phung lu mdê hŏng yang đar dôk găn tinăn, dua čô bum ală êmuh kña arăng leh anăn thâo kơ Khua Yang Yêsu dôk truh giăm, digơ̆ ur kraih: “Ơ Khua Yang, Anak Y-Đawit, pap mñai kơ hmei đa!” Pruê̆ boh blŭ “Anak Y-Đawit” jing sa Anăn pioh kơ Yang Mêsi, phung khua pô hưn êlâo hlăk ênuk Klei Bi Mguôp Hđăp tuôm yua leh (Y-Êsai 9:5-6; 11:1; Y-Yêrêmi 23:5-6). Dua čô bum ală anei đăo kơ Khua Yang Yêsu yơh jing Yang Mêsi hưn leh hlăk êlâo, Ñu bŏ hŏng klei myang dưi bi hlao djăp mta klei ruă duam, “Ală phung bum srăng ƀuh mngač, knga phung kngăl srăng thâo hmư̆” (Y-Êsai 35:5-6). Kyuanăn klei digơ̆ ur kraih amâo djŏ čiăng akâo mnơ̆ng ƀơ̆ng ôh, ƀiădah akâo klei bi hlao brei ală digơ̆ čiăng dưi ƀuh mngač.
Phung lu tui hlue Khua Yang Yêsu mĭndah Khua Yang Yêsu jing sa čô mnuih yuôm prŏng snăk, dôk êbat nao kơ ƀuôn Yêrusalem čiăng ngă bruă prŏng, diñu amâo čiăng ôh mâo klei bi kpăk gun Khua Yang hŏng mta bruă đơ điêt mơ̆ng phung hiu dan, arăng yap digơ̆ jing phung mnuih hdĭp ti êngao ala ƀuôn, snăn diñu ghă dua čô bum ală brei digơ̆ dôk kriêp ñăt. Ƀiădah lĕ, digơ̆ amâo mđing uêñ ôh kơ klei phung lu ghă bi kgăn, dua čô bum ală anei ăt dôk gĭr nanao, lŏ ur kraih ktang hĭn êjai: “Ơ Khua Yang, Anak Y-Đawit, pap mñai kơ hmei đa!” boh tŭ dưn truh kơ dua čô bum ală, Khua Yang wĭt lač kơ digơ̆, bi hlao ală digơ̆ dưi ƀuh mngač leh anăn digơ̆ čuăn ai tiê tui hlue Khua Yang.
Dua čô bum ală dôk gĭr kwưh akâo kyuadah diñu đăo sĭt Khua Yang yơh jing Pô bi hlao diñu. Diñu kwưh akâo kơ Khua Yang hŏng sa klei kñăm čiăng klă mngač, kyuanăn amâo tŭ ôh ya mta klei dưi bi kgăn diñu. Khua Yang Yêsu lač: “Akâo bĕ, leh anăn arăng srăng brei kơ diih; duah bĕ, leh anăn diih srăng ƀuh; khŏk bĕ, leh anăn arăng srăng pŏk brei kơ diih.” (Y-Mathiơ 7:7-8). Akâo kơ Khua Yang brei drei jao kluôm jih klei hdĭp drei hlăm păl kngan klei khăp Khua Yang nanao, msĕ si sa čô hđeh điêt dôk hlăm păl kngan amĭ gơ̆. Amâo tuôm êdu ai ôh ti anăp klei dluh lĕ, ƀiădah ăt dôk gĭr kwưh akâo leh anăn khŏk ƀăng bhă nanao tơl kơ “klei Ama čiăng srăng jing, ti lăn ala msĕ si hlăm adiê”.
Si ngă drei djăl êdu ai phưi lui mkrah dưh mơ̆, tơdah kwưh akâo ya mta klei sui hruê leh?
Wah lač: Ơ Aê Diê, jing Ama djăl khăp djăl pap, akâo kơ Ih đru kâo jhŏng nao giăm jhưng mtao klei pap Ih, ăt dôk gĭr kwưh akâo nanao ya mta klei bi mơak kơ Ih. Wăt tơdah tuôm hŏng ya mta klei bi kpăk gun dưn, ăt dôk gĭr kwưh akâo nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
